الماتىدا ۆەلوسيپەد قويۋعا بولاتىن قۇرىلعىسى بار قوعامدىق كولىكتەر جۇرە باستادى، - دەپ حابارلايدى tengrinews.kz. قوعامدىق كولىكتىڭ الدىڭعى بولىگىندە ورنالاسقان بۇل جاڭا قوندىرعىلار قازاقستاندا ۆەلوسپورتتىڭ جاپپاي دامۋىنا اسەرىن تيگىزەدى دەلىنەدى. الماتى قالاسى جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىنشە، قالادا 23 شاقىرىم ۆەلوسيپەدكە ارنالعان جولدار سالىنعان.

الايدا كوبى بىر-بىرىمەن بايلانىسپاعان، سول سەبەپتى دە قيىندىقتار بار.  "وسى ماسەلەنى شەشۋ ماقساتىندا وسى جوبانى ەنگىزىپ وتىرمىز. قازىرگى ۋاقىتتا № 29 جانە     № 45 باعىتىندا جۇرەتىن اۆتوبۋستارعا ۆەلوسيپەد قويۋعا بولاتىن قۇرىلعى ورناتىلدى. اۆتوبۋس سالونىنا ۆەلوسيپەد الىپ كىرۋ قيىن بولعاندىقتان، وسى ءتاسىل وتە ءتيىمدى"، - دەدى الماتى قالاسى جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ماقسۇت يساحوۆ.