شانحاي ىنتىماقتاستىق ۇيىمىنىڭ 14-وتىرىسىندا حاتتاماعا قول قويىلدى. حاتتاماعا سايكەس، شىۇ اياسىنداعى كوپجاقتى جانە ەكىجاقتى مادەني بايلانىستاردىڭ ودان ءارى دامۋى كوزدەلگەن، دەپ جازادى قامشى اقپاراتتىق اگەنتتىگى. سونداي-اق، ءۇندىستاننىڭ قازاقستانمەن بىرىگىپ كينو تۇسىرمەك ويلارىنىڭ بارى دا انىقتالدى.

«ءبىز حاتتاماعا قۋانا قول قويدىق. ەڭ الدىمەن، ءبىز تىعىز قارىم-قاتىناسقا مۇددەلىمىز. مەن ءبىرىنشى كەزەكتە بىزدە بەيرەسمي قارىم-قاتىناستىڭ بارىن ايتا كەتكىم كەلەدى. ءبىزدىڭ ىنتىماقتاستىعىمىز ءوز جەمىسىن بەرۋدە. ەكسپو اياسىندا تەرراكت جاۋىنگەرلەرىنىڭ اتاقتى كورمەسى ۇيىمداستىرىلاتىن بولادى، ال ول كورمەنىڭ قارجىسىن جۇڭگو مادەنيەت مينيسترلىگى تولىعىمەن وتەيتىن بولدى. سونداي-اق، وزبەكستان مادەنيەت مينيسترلىگىمەن دە تىعىز قارىم-قاتىناستامىز. قىرعىزستانمەن دە بىرىگىپ قىزمەت جاساۋدى قولعا الماقپىز. بۇل ۇلتتىق سپورت ويىندارىن دامىتۋ بولىپ تابىلادى: كوكپار، قىز قۋۋ جانە تاعى باسقالارى»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.

ۇندىستانمەن كينويندۋستريا سالاسىن دامىتۋ ماقساتىندا ىنتىماقتاستىق ورناتۋ جونىندە دە ءسوز بولدى.

«ءبىز قازاقستانمەن تەرەڭ قارىم-قاتىناستامىز. ەكى ەلدىڭ مادەني قۇندىلىقتارى ۇقسايدى. شىۇ ارقىلى ىنتىماقتاستىعىمىز ودان ءارى نىعايا تۇسەدى دەگەن ۇمىتتەمىن. ءار ءسوزىن بيمەن جەتكىزەتىن ءۇندى فيلمدەرىنىڭ دارەجەسىنىڭ جوعارىلىعى بارىنە ءمالىم. ەندىگى كەزەكتە قازاقستانمەن كينويندۋستريا سالاسىن بايلانىستىرماق نيەتتەمىز»، - دەدى ءۇندىستان مادەنيەت ءمينيسترىنىڭ ورىنباسارى شيفالي شاح.

شولۋشى: گۇلىم جاقان