گۇلجان ءماۋىتحانعا قاتىستى اپپەلياسيالىق سوت بۇگىن اياقتالدى، دەپ جازادى قامشى اقپاراتتىق اگەنتتىگى bag.kz-كە سىلتەمە جاساي وتىرىپ.
ەكى كۇنگە سوزىلعان اپەللياسيالىق سوت وتىرىسى بارىسىندا شەكارادا بار اقشاسىنان ايىرىلىپ قالعان قىتايلىق قانداسىمىزدىڭ ءىسى بۇگە-شىگەسىنە دەيىن قارالىپ، تەرگەۋ بارىسىندا بولعان، سونداي-اق شەكارادا بولعان قۇيتۇرقىلىقتاردى ەسكەرىپ، ءىستى پروكۋراتۋراعا جىبەردى. پروكۋراتۋرا جان-جاقتى قايتادان قاراپ، تەرگەۋ امالدارىن جۇرگىزەتىن بولدى.
10 ءساۋىر كۇنگى زايسان قالاسىنىڭ شىعارعان سوت شەشىمى تۇگەلدەي كۇشىن جويدى.
ەسكە سالا كەتەيىك، 8 اقپان كۇنى قىتايدان قازاق ەلىنە ورالۋ ماقساتىندا كوشىپ كەلە جاتىپ، شقو زايسان اۋدانىنا قاراستى «مايقاپشاعاي» كەدەندىك باقىلاۋ بەكەتىندە 49،900 اقش دوللارى تاركىلەنگەن ءماۋىتحان گۇلجان ەسىمدى جەسىر انانىڭ تاعدىرى قىل ۇستىندە ەدى.
كۇيەۋىنەن جاستاي جەسىر قالىپ، ەكى بالاسىن ءومىردىڭ نەبىر تاۋقىمەتىن تارتا ءجۇرىپ ەر جەتكىزگەن گۇلجان قىتايداعى وزىنە تيەسىلى ءۇيى مەن بار دۇنيە-مۇلكىن ساتىپ، ول اقشاعا استانا قالاسىنان ءۇي الۋدى كوزدەگەن ەكەن. الايدا، قيىن جاعدايعا تاپ بولامىن دەپ ويلاماعان.
بىرنەشە كۇن وتكەن سوڭ تەرگەۋشىلەر كەلىپ، ءمان-جايدى تۇسىندىرگەن ءارى زايسان اۋدانىنداعى ەكونوميكالىق تەرگەۋ بولىمىنە شاقىرىپ الىپ، گۇلجان ءماۋىتحانعا: «زاڭ بويىنشا سىزگە تيەسىلى اقشا وسى» دەپ قولىنا 10 مىڭ اقش دوللارىن قايتارىپ بەرگەن. قالعان 49،900 اقش دوللارى شقو بويىنشا مەملەكەتتىك كىرىستەر دەپەرتامەنتىنە جىبەرىلگەنى جايلى ايتقان.
ساۋىردە بولعان شىعىس قازاقستان وبلىسى زايسان اۋداندىق سوتى جالعىزباستى ايەلدى ق ر قىلمىستىق كودەكسىنىڭ 234-بابى (ەكونوميكالىق كونتراباندا) بويىنشا ايىپتى دەپ تانىپ، ۇستىنەن 68 مىڭ تەڭگە ايىپپۇل سالدى.
بۇل جاعدايدى ەسكەرگەن ۇلاربەك دالەي ۇلى، ەرلان سايىروۆ، مۇحتار تايجان، ابزال قۇسپان، ايجان دارىبايەۆا سىندى وزگە دە تىلەكتەس بولعان بارشا ازاماتتار ءىستى قايتا قاراۋ ءۇشىن اپپەلياسياعا بەرگەن ەدى. ادىلدىكتى قالاعان ەل ازاماتتارىنىڭ كۇشى مەن ىقىلاسى بوسقا كەتپەپتى.
شولۋشى: گۇلىم جاقان
