كەز-كەلگەن داۋ، جانجال اتاۋلى وعان ساياسي ادام، ساياسات قىزمەتكەرىنىڭ قاتىسى بولسا ۇلكەن رەزونانس تۋدارىتىنى بەلگىلى.  قامشى اقپاراتتىق اگەنتتىگى  الەمدەگى ەڭ اتى شۋلى جانجالداردى وقىرمان نازارىنا ۇسىنادى.

العاشى ساتىدا، ارينە "ۋوتەرگەيت وقيعاسى" نەمەسە "ۋوتەرگەيت جانجالى"

اقش-تاعى جانە الەمدەگى ەڭ تانىمال جانجال.  1972 جىلى جازدا اقش پرەزيدەنتىنىڭ سايلاۋى وتۋىنە 4 اي قالعاندا ورىن العان. «ۋوتەرگەيت» اتالاتىن قوناقۇيدە بەس ادام ۇستالادى. ولار قۇپيالى قۇجاتتاردى الىپ، تىڭداماقشى بولعان. بارلىق كۇدىك ەكىنشى رەت سايلاۋعا قاتىسقالى وتىرعان پرەزيدەنت ريچارد نيكسونعا تۇسەدى. ورىن العان جانجالعا قاراماستان نيكسون پرەزيدەنتتىك سايلاۋعا قاتىسىپ جەڭىپ شىعادى. الايدا «ۋوتەرگەيت» وقيعاسىنا بايلانىستى زەرتتەۋ جۇمىستارى سايلاۋدان كەيىن دە جۇرگىزىلەدى. وسى كەزدە «ۆاشينگتون پوست» باسىلىمىنىڭ جۋرناليستەرى نيسكوننىڭ وسى وقيعادا كىنالى ەكەنىن دالەلدەپ شىعارادى. ناتيجەسىندە العاش رەت اقش تاريحىندا پرەزيدەنت ءوز ەركىمەن ورنىنان كەتەدى.

ۆەنگريا پرەزيدەنتىنىڭ دوكتورلىق ديسسەرتاسياسى

1992 جىلى ۆەنگرلىك ساياساتكەر پال شميتت وليمپيادا ويىندارىنا بايلانىستى ديسسەرتاسيا قورعايدى. جيىرما جىل وتكەن سوڭ ول پرەزيدەنت قىزمەتىندە بولعان كەزدە ونىڭ ديسسەرتاسياسى پلاگيات دەپ تانىلادى. ديسسەرتاسيا تولىق باسقا اۆتوردان، ناقتىراق ايتقاندا سپورت قايراتكەرىنەن كوشىرىلگەن بولىپ شىعادى. وسىدان كەيىن پال شميتت دوكتورلىق دارەجەسىنەن ايىرىلادى، ءۇش كۇننەن كەيىن پرەزيدەنتتىگىنەن دە باس تارتادى.

بيلل كليونتوننىڭ جانجالى

1998 جىلى اقش-تىڭ 42-پرەزيدەنتى بيلل كلينتون بۇكىل الەمگە ءوزىنىڭ پرەزيدەنتكە لايىقتى ەمەس جۇرىس-تۇرىسىمەن تانىمال بولدى. ول ءوزىنىڭ جاس كومەكشىسى مونيكا ليەۆينسكيمەن قارىم-قاتىناستا بولعانى ءۇشىن ايىپتالعان. ءاۋ باستا ءوزىنىڭ بۇل جانجالعا ەش قاتىسى جوق ەكەنىن ايتىپ اقتالسا دا، كەيىننەن ءبارىن مويىنداعان.

يرلانديا پرەمەر-مينيسترىنىڭ سۇحباتى

2010 جىلى يرلانديا پرەمەر-مينيسترى برايان كوۋەن دۋبلين راديوستانسياسىنا سۇحبات بەرەدى. ول قاراپايىم ەكونوميكالىق ساياساتقا بايلانىستى سۇراقتارعا جاۋاپ بەرە الماعان. ءوزىنىڭ داۋسىمەن ادامداردى قورقىتىپ جىبەرگەن. ونىڭ سۇحباتتان ءبىر كۇن بۇرىن ءوزىنىڭ كەڭەسشىلەرىمەن كەيبىر سۇراقتاردى تالقىلاۋ ءۇشىن «جينالىسى»  وتكەنى بەلگىلى بولعان. كەلەسى جىلى پرەمەر ءوز قىزمەتىنەن كەتكەن. الايدا وعان تەك قانا ونىڭ  ناشار سۇحباتى عانا ەمەس  ەلدەگى ەكونوميكالىق داعدارىس تا سەبەپ بولعان.

گەورگيي گونگادزە ءولىمى

گەورگيي گونگادزە ۋكراينالىق جۋرناليست، «ۋكراينسكايا پراۆدا» پورتالىنىڭ نەگىزىن سالۋشى. پرەزيدەنت  لەونيد كۋچمانىڭ كريمينالدى ءومىرىن زەرتتەگەن. 2000 جىلى ول جاقىندارىنا ءوزىنىڭ ارتىنان بەلگىسىزدەر اڭدىپ جۇرگەنىن حابارلاعان. ەكى ايدان كەيىن جۋرناليست ءىز-تۇسسىز جوعالعان. ارادا ءبىراز ۋاقىت وتكەن سوڭ ونىڭ باسسىز دەنەسىن كييەۆكە جاقىن جەردە تابىلدى. جۋرناليست ولىمىنە مەملكەت باسشىلىعىنىڭ قاتىسى بار ەكەنى كەيىننەن انىقتالدى.

دايىنداعان: نازەركە مۇسا