اقتوبە وبلىسى پروكۋرورىنىڭ

اقتوبە وبلىستىق ءىسب-نىڭ

نازارىنا

اقتوبەدەگى ريكا اقپارات كەڭىستىگى مەن بيزنەس جەلىلەرىن ۇستاپ وتىرعان مەديا توپتىڭ ءتىلشىسى ءلاززات ساقييەۆا تاراپىنان «ءوزىنىڭ قىزمەتتىك سۇحباتى اياسىندا» (ق ر قىلمىستىق كودەكسىنىڭ 141 بابىنىڭ 2 تارماعى)، قازاق ازاماتى فارحاد دوسماعانبەتوۆتىڭ «تەگىنە، ناسىلىنە، ۇلتىنا قاراي كەمسىتۋشىلىك» (قر-سى كونستيتۋسياسىنىڭ 14-باپ، 2-تارماق)، جانە «ءبۇتىن ءبىر حالىقتىڭ ار-نامىسىنا تيەتىن» اۋىر سوزدەر ايتقانى جانە «ناسىلدىك، ۇلتتىق استامشىلىقتى» ۋاعىزدايتىن «ديسكريميناسيا» ماسەلەسىن كوتەرگەنى ءۇشىن ءتىلشىنىڭ ۇستىنەن قۇقىقتىق شارا الىنۋى ءتيىس. بۇل جونىندە سوڭعى كۇندەرى ب ا ق قۇرالدارىندا، الەۋمەتتىك جەلىلەردە كوپ جازىلدى. 

ۇلتتىق مۇددە، ۇلتتىق نامىستان بيىك تۇراتىن ەشقانداي مۇرات جوق. ساياسي تۇرعىدان العاندا ءتىلشى ل.ساقييەۆانىڭ ءىسى جۇگەنسىزدىك، ازاماتتىق نامىسىمىزدى قورلاۋ. سونداي-اق، ءلازاتتىڭ سوزىندە قازاقستان حالىقتارىنىڭ تاتۋلىعى مەن بىرلىگىنە، ىنتىماقتا ءومىر سۇرۋىنە سىنا قاعاتىن قارەكەت بارىنا نازار اۋدارۋ قاجەت دەپ ەسەپتەيمىن.

مۇنى اياقسىز قالدىرۋعا بولمايدى. كوپشىلىكتىڭ بۇل نارازىلىعى اقتوبە وبلىستىق باس پروكۋرورىنىڭ نازارىنا الىنۋى ءتيىس. وسى ماسەلەگە بايلانىستى

مالىمدەيمىن:

1. ريكا تەلەارناسى فاكت باعدارلاماسىنىڭ جۇرگىزۋشىسى، ءتىلشىسى ءلازات ساقييەۆانىڭ «استامشىلىق» ارەكەتىنە بايلانىستى - قوعام بەلسەندىلەرىنىڭ قاتىسۋىمەن «ارنايى كوميسسيا» قۇرىلسىن. كوميسسيا قۇرامىنا ساياسي پارتيالار مەن قوعامدىق ۇيىمدار، زاڭگەرلەر، وبلىستىق ىشكى ساياسات باسقارماسى جانە جەرگىلىكتى «ۇلتتار اسسامبلەياسىنداعى» دياسپورا وكىلدەرى دە تارتىلسىن. 
2. ق ر ازاماتى رەتىندە ونى جاۋاپكەرشىلىككە تارتىپ، ونىڭ ىس-ارەكەتىنە قر-سىنىڭ «اكىمشىلىك، قىلمىستىق كودەكسى» تۇرعىسىنان قۇقىقتىق باعا بەرىلەتىن بولسىن.
3. كوميسسيا قورىتىندىسىنىڭ كوشىرمەسى جەرگىلىكتى قوعامدىق ۇيىمدار مەن اقتوبە وبلىستىق اكىمى مەن پروكۋراتۋراسىنا جىبەرىلسىن. 
4. الداعى ۋاقىتتا مۇنداي «استامشىلىقتى» قايتالاماۋ ءۇشىن كوميسسيا جۇمىسىنىڭ ناتيجەسى بۇقارالىق اقپارات قۇرالدارى ارقىلى جۇرتشىلىققا جاريا ەتىلسىن.

ق ر جۋرناليستەر وداعىنىڭ مۇشەسى: ن.قوشامان ۇلى
اقتوبە قالاسى.
04.06.2017.