تۇرىك رەسپۋبليكاسى جاريالانعان كۇن – 29 قازاننىڭ قارساڭىندا، انكارادا ازاتتىق جىرشىسى، ايبىندى اقىن ماعجان جۇمابايەۆتىڭ رۋحىنا تاعزىم كەشى ۇيىمداستىرىلدى. ماعجان اتامىزدىڭ تۋىسقان تۇرىك جۇرتىنا ارناعان «الىستاعى باۋىرىما» جىرىنا 83 جىلدان سوڭ «التايداعى جۇرەگىم»-دەپ، جاۋاپ جىرىن جازعان قارىمدى قالامگەر، اقىن فەيزۋللاح بۋداك مىرزا مازمۇندى كەشتىڭ باستى قوناعى بولدى.
وردالى وسمان يمپەرياسىنىڭ كۇنى ەڭكەيىپ، ەل شەتىن دۇشپان تاپتاپ، قيلى كەزەڭ كيلىككەن تۇستا «الىستا اۋىر ازاپ شەككەن، باۋىرىم»-دەپ، قانى ءبىر حالىقتىڭ قامىن جەگەن ماعجان جىرىنىڭ ماڭىزىن فەيزۋللاح بۋداك تەبىرەنە جەتكىزىپ، جاۋاپپەن ءۇن قاتۋ نيەتىنىڭ قالاي تۋىنداپ، قالايشا ورىستەگەنىن بايىپپەن باياندادى. 
تاعىلىمدى تاعزىم كەشىنە جينالعان كوپشىلىك فەيزۋللاح مىرزانىڭ ايبىندى اقىن جىرلارىن قوس تىلدە وقىپ، شەبەر تالداۋىن ىستىق ىقىلاسپەن قابىلداپ، دۇركىن-دۇركىن قول شاپالاعىمەن قۋاتتاپ وتىردى.
سونىمەن قاتار، قۇرمەتتى قوناق، مۇستافا كەمال اتاتۇرىك پەن ماعجاننىڭ تۇلعالىق قالىپتاسۋلارىنداعى ۇقساستىقتار تۋراسىندا تۇششىمدى تۇجىرىمدارىن ورتاعا سالىپ، تۇركيا ءانۇرانىنىڭ اۆتورى مەحمەت اكيف ەرسويمەن اراداعى شىعارماشىلىق ۇندەستىكتى سالىستىرمالى تۇردە كوركەم كەستەلەدى.
جيىندى تۇيىندەر تۇستا ونەرپاز جاستار – مەيىرجان مەن دىنمۇحاممەت انمەن شاشۋ شاشتى. اۋەزدى اننەن اسەر العان قاۋىم جانە ءبىر تولقىنىستى وقيعاعا كۋا بولدى. ساحناعا ون ءبىر جاستاعى بالعىن ماعجان التاي شىعىپ، ەسىمىن قۇرمەتپەن ارقالاپ جۇرگەن ۇلى اتاسىنىڭ «مەن جاستارعا سەنەمىن» جىرىن جاتقا وقىدى جانە دە فەيزۋللاح مىرزاعا ىستىق ىقىلاس بەلگىسى رەتىندە سىيلىق تابىس ەتتى.
«انكارا قازاق جاستارى» بىرلەستىگىنىڭ ۇيىمداستىرۋىمەن وتكەن كەشتەن العان ءتالىم مول بولىپ، اقيىق اقىن، كورنەكتى قايراتكەر ماعجان اتامىزدىڭ رۋحتى جىرلارى انادولىدا اسقاقتاي ءتۇستى.
مىرزاحان بايبولوۆ،
گازي ۋنيۆەرسيتەتىنىڭ دوكتورانتى.
