شەتەلدەن كەلەتىن قانداستارىمىزدى ق ر ۇكىمەتى تەگىن پاتەرمەن قامتاماسىز ەتەدى. ال، ازاماتتىقتى التى ايدىڭ ىشىندە الۋعا بولادى. بۇل تۋرالى بۇگىن ق ر پرەزيدەنتى جانىنداعى وكق-نىڭ بريفينگىندە ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ەڭبەك جانە ميگراسيا كوميتەتىنىڭ ءتوراعاسى اسلان قارجاۋبايەۆ مالىمدەگەن.
Baq.kz سايتى حابارلاعانداي، كوميتەت ءتوراعاسى ءوز سوزىندە: «وزدەرىڭىز بىلەسىزدەر، وسى ۋاقىتقا دەيىن ورالمانداردىڭ كوشىپ كەلۋ كۆوتاسى توقتاتىلعان بولاتىن. وسىعان سايكەس قارجىلاي كومەك بەرۋ دە توقتاتىلدى. ال، ازاماتتىق الۋ قۇقىعى 4 جىلعا قالدىرىلعان ەدى. كۆوتا توقتاعان 2012 جىلدان بەرگى ستاتيستيكاعا قاراساق، 2012 جىلى 39 مىڭ اعايىندار كوشىپ كەلدى. 2013 جىلى 35 مىڭ اعايىن كەلدى. بيىلعى جىلدىڭ العاشقى جارتىجىلدىعىنىڭ مالىمەتتەرىنە سۇيەرسەك، 7 مىڭ قانداسىمىز كوشىپ كەلگەن»، - دەپ شەتەلدەن كوشىپ كەلگەن ەتنيكالىق قازاقتاردىڭ ستاتيستيكاسىنان حاباردار ەتتى.
سونداي-اق كوميتەت ءتوراعاسى: «كوشىپ كەلۋ دەگەن وڭاي نارسە ەمەس. سوندىقتان ۇكىمەت تاراپىنان ولارعا كومەك كەرەك ەكەنى بەلگىلى. ۇكىمەت وسىنى ەسكەرىپ جاڭا قابىلدانعان زاڭعا وزگەرىستەر ەنگىزدى. زاڭعا سايكەس، اعايىندار قازاقستان اۋماعىنىڭ قاي وڭىرىنە كەلسە دە ءوزى تاڭدايتىن بولادى. ەلىمىزگە كەلىسىمەن «ورالمان» مارتەبەسىن الادى. تۇراقتى تۇرۋعا رۇقسات ءۇشىن تولەم قابىلەتىن راستامايتىن بولادى. تۇراقتى تۇرۋعا رۇقسات الىسىمەن ازاماتتىق الۋعا ءوتىنىش بەرە الادى. بىلاي قاراساڭىز جارتى جىلدىڭ ىشىندە قازاقستان ازاماتى اتانۋعا مۇمكىندىك بار»، - دەپ بار قازاققا ءسۇيىنشى حاباردى جەتكىزدى.
قارجاۋبايەۆتىڭ سوزىنشە، قانداستارىمىز ءۇشىن ماتەريالدىق جاعداي دا جاسالماق. ولاردىڭ ەڭ باستى پروبلەماسى باسپانا ماسەلەسى دە شەشىمىن تاباتىن بولدى. «ۇكىمەت بەلگىلەگەن مەكەندەرگە كەلگەن اعايىندارعا كوشىپ كەلۋ شىعىندارىن تولەيدى. مىندەتتى تۇردە قىزمەتتىك پاتەرمەن دە قامتاماسىز ەتىلەدى. بۇل قىزمەتتىك پاتەردى ولار 5 جىلدان سوڭ مەنشىگىنە الۋعا قۇقىلى. ەندى وسىنداي جاعدايلار جاسالىپ وتىرعاندا شەتەلدەن كەلەتىن قانداستارىمىزدىڭ سانى ارتادى دەپ ويلايمىن. شەتەلدەن كەلەتىن قازاقتار ءۇشىن قازاقستاننىڭ ەسىگى ءاردايىم اشىق. كەيبىر ازاماتتاردىڭ جاڭساق اقپارات تاراتىپ «شەتەل قازاقتارىنا قازاقستان توسقاۋىل قويدى» دەگەن ءسوز دۇرىس ەمەس. وسىنى ءاربىر قازاق بىلە جۇرگەنى ءجون. شەتەلدەن قازاق وسى ۋاقىتقا دەيىن كوشىپ كەلدى. الداعى ۋاقىتتا دا كوشىپ كەلە بەرەدى»، - دەدى اسلان قارجاۋبايەۆ.
بيىل ءساۋىر ايىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا شەتەلدەن كەلەتىن قانداستارىمىزعا بارلىق جاعدايلار جاسالاتىنىن، ولاردىڭ ازاماتتىق الۋىنا بايلانىستى قۇقىقتىق كەدەرگىلەر الىنىپ تاستالاتىنىن حابارلاعان بولاتىن. 6 تامىزدا ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ «قانداستارىمىزعا جاعداي جاساڭدار» مينيسترلىكتەرگە تاپسىرما بەرگەن ەدى. الايدا پارلامەنت قابىرعاسىندا ءالى كۇنگە «كوشى-قون زاڭىنا» وزگەرىستەر ەنگىزۋ تۋرالى ماسەلە كوتەرىلە قويمادى. تارىداي شاشىلعان قازاقتىڭ باسى ءبىر شاڭىراق استىنا جينالىپ، الاشتىڭ ايبارلانعانىنا مۇددەلى بارشا قازاق بالاسى پارلامەنتتىڭ تەزدەتىپ زاڭ قابىلداۋىنا ەلەڭدەپ وتىر.
