شاعىن جانە ورتا بيزنەستىڭ نەگىزگى ماسەلەلەرىن تالقىلاۋ، كاسىپكەرلەرگە كەڭەس بەرە وتىرىپ، سۇراقتارىنا جاۋاپ بەرۋ ماقساتىندا شقو ءىرى كونسالتينگتىك كومپانيا قاتارىنداعى Parasat consulting ج ش س وكىلى وسكەمەن قالاسىندا ماستەر كلاسس وتكىزدى، - دەپ حابارلايدى Qamshy.kz پورتالى شقو باسپا ءسوز قىزمەتىنە سىلتەمە جاساي وتىرىپ.

شقو كاسىپكەرلەر پالاتاسى مەن «DAMU» كاسىپكەرلىكتى دامىتۋ قورىنىڭ» قولداۋىمەن، «بيزنەستىڭ جول كارتاسى – 2020» مەملەكەتتىك باعدارلاماسى اياسىندا  Parasat consulting ج ش س «ماركەتينگ جانە بيزنەس-جوسپارلاۋ نەگىزى» تاقىرىبىندا ماستەر كلاسس وتكىزدى.

شارا ماقساتى – قاتىسۋشىلاردى ماركەتينگ پەن بيزنەس جوسپارلاۋ سالاسىنىڭ نەگىزگى تەندەنسيالارىمەن تانىستىرۋ. ماستەر كلاسسقا قاتىسۋ ارقىلى كاسىپكەرلەر بىر-بىرىمەن كەڭەسە وتىرىپ، تاجىريبە الماسۋ ارقىلى ءوز ۇسىنىسىن دا بىلدىرە الادى.

ەرىكتى تىڭداۋشىلار دا ەرە كەلگەن باس قوسۋدا كومپانيا وكىلى جەكە بيزنەس قۇرۋ يدەياسى مەن جۇمىستاعى ماركەتينگتى قۇرالداردى قولدانۋ تۋرالى تاجىريبەلىك ساباق وتكىزدى. 30 كاسىپكەر قاتىسقان وتىرىستا ماركەتينگ پەن بيزنەس جوسپارلاۋدىڭ ماڭىزدى سۇراقتارى تالقىلاندى. ماسەلەن، باسەكەگە قابىلەتتى كاسىپكەرلىكتى قالىپتاستىرۋ ءۇشىن «بيزنەس زەرتتەۋ» ءىسىن قولعا الۋ كەرەك. سونداي-اق، ءتۇسىم مەن ورىستەۋدى بيزنەستىڭ قوس ماقساتى دەپ بىلەتىن كاسىپكەرلەرگە تاۋار نەمەسە قىزمەتتىڭ ساپاسى جونىندە پايدالى اقىل-كەڭەستەر ايتىلدى.

– كاسىبىمدى ورىستەتۋ ءۇشىن ماستەر كلاسسقا كەلدىم. كومپانيا وكىلى ءبىرقاتار سۇراقتارىما جاۋاپ بەردى. شىنىمدى ايتسام، «بيزنەس زەرتتەۋ» سالاسىنا كوپ كوڭىل ءبولىپ كورمەپپىن. كەلەشەكتە دە كاسىپكەرلىكتى قولدايتىن وسىنداي شارالاردىڭ ءوتىپ تۇرعانىن قولدايمىن، – دەيدى جاس كاسىپكەر ەرىك قۇلجىنوۆ.

ماستەر كلاسس سوڭىندا قاتىسۋشى كاسىپكەرلەرگە سەرتيفيكات تاپسىرىلدى.