مۇمكىندىگى شەكتەۋلى جانداردىڭ ءومىر ساپاسىن ارتتىرۋ ماقساتىندا وسكەمەندە «نۇر وتان» پارتياسىنىڭ شقو پارتيالىق باقىلاۋ كوميسسياسى قالا ىشىندە بەيىمدەلگەن مونيتورينگ جۇرگىزدى، دەپ حابارلايدى Qamshy.kz پورتالى شقو اقپاراتتىق ورتالىعىنا سىلتەمە جاساي وتىرىپ.

تەكسەرۋدەن بۇرىن باقىلاۋ كوميسسياسى سانكت-پەتەربۋرگتەن اكەلىنگەن جىلجىمالى پاندۋستى تاماشالادى. گەرمانيالىق «بوينگ» زاۋىتىنان شىققان پاندۋستىڭ قۇنى 1 ملن. 200 مىڭ تەڭگە. اليۋمينييدەن جاسالعان زاماناۋي جابدىق تاسىمالداۋعا بولارلىق ىڭعايلىلىعىمەن ەرەكشەلەنەدى.

باقىلاۋ نىساندارىن تەكسەرۋدى كوميسسيا «ءۇلبى» حالىققا قىزمەت كورسەتەتىن قالالىق-اۋماقتىق ورتالىعىنان باستادى. ورتالىقتا مۇگەدەكتەرگە تۇگەل دەرلىك جاعداي جاسالعان. ارنايى باسپالداققا شىعۋعا ارنالعان گيدروكوتەرگىش قىزمەتكەرلەرگە تاپتىرماس جابدىق. گيدروكوتەرگىش ارقىلى ارباداعى مۇگەدەكتى 3-4 مينۋتتا 2 قاباتقا شىعارۋعا بولادى. سونداي-اق، ورتالىقتا كەڭ اۋقىمدى جەدەلساتى ارقىلى جۇرۋگە مۇمكىندىك بار.

– ورتالىق 10 بالدىق كورسەتكىشپەن ەسەپتەگەندە 9 بالدىق دەڭگەيدە بەيىمدەلگەن. قالالىق № 19، 26، 37 مەكتەپتەردىڭ بەيىمدىلىگى قالىپتى دەڭگەيدە. بۇل سالادا پاندۋس بارلىق مەكەمەلەردە بولۋى مىندەتتى. ءاليۋميندى زاماناۋي پاندۋس بولماسا دا سەمەنتتەن جاسالعان پاندۋستاردى سالۋعا كوپ قاراجات جۇمسالمايدى، – دەدى كوميسسيا ينسپەكتور جادىگەر قاناپين.

№ 37 مەكتەپتە اقىل-ەسى دامۋى تەجەلگەن بالالارعا 6 سىنىپ، ناشار ەستيتىندەر 1 سىنىپ جاساقتالعان. مەكتەپ ديرەكتورى يننا گراچيەۆانىڭ ايتۋىنشا، مەكتەپتە مۇمكىندىگى شەكتەۋلى بالالارعا بارلىق جاعداي جاسالعان. «ارنايى سىنىپتاردى ءتيپتى باعدارلامالارمەن وقىتامىز. بۇل سالادا مەكتەپتە بالالارمەن پسيحولوگتار مەن لوگوپەدتار جۇمىس اتقارادى»، – دەدى يننا گراچيەۆا.