قازاقستان رەسپۋبليكاسى ۇلتتىق بانكىنىڭ ەسەبىنە سايكەس، اقشانى جاريا ەتۋ ءۇشىن ەكىنشى دەڭگەيلى بانكتەردە 17 جيناق شوت اشىلعان. بۇل تۋرالى بۇگىن «مۇلىكتى جەكەشەلەندىرۋ جانە جاريا ەتۋ بارىسى» تۋرالى وتكەن ورتالىق كوممۋنيكاسيالار قىزمەتىنىڭ كەزەكتى بريفينگىندە ق ر قارجى مينيسترلىگى مەملەكەتتىك كىرىستەر كوميتەتىن قاداعالاۋ دەپارتامەنتىنىڭ ديرەكتورى ارعىن قىپشاقوۆ ءمالىم ەتتى.

«2014 جىلعى قاراشاداعى جاعداي بويىنشا، قازاقستان رەسپۋبليكاسى ۇلتتىق بانكىنىڭ ەسەبىنە سايكەس، اقشانى جاريا ەتۋ ءۇشىن ەكىنشى دەڭگەيلى بانكتەردە 17 جيناق شوت اشىلدى. وسى شوتتارعا 2 ملرد تەڭگە اقشا تۇسكەن. جيناق شوتتارىنان 372 ملن تەڭگە شىعارىپ الىنىپ، وسى سومادان اقشانى جاريا ەتۋ ءۇشىن بيۋدجەتكە 37 ملن تەڭگە الىم تولەندى»، - دەپ حابارلادى ول.

ا.قىپشاقوۆتىڭ ايتۋىنشا، اكسيا باستالعانعا دەيىن بارلىق ايماقتاردا مۇلىكتى جاريا ەتۋ بويىنشا كوميسسيالار قۇرىلعان.

جەرگىلىكتى اتقارۋشى ورگاندار جانىنداعى كوميسسيالارعا مۇلىكتى جاريا ەتۋ ءۇشىن 7096 ءوتىنىش كەلگەن. وسى وتىنىشتەردىڭ جالپى سوماسى 57 ملرد تەڭگە. كوميسسيالار 1379 نىساندى جاريا ەتۋ تۋرالى شەشىم قابىلدادى. شەشىمدەردىڭ جالپى سوماسى 8 ملرد تەڭگە»، - دەپ تولىقتىردى ول.