ۇلكەن الماتى اينالما تاس جولىنىڭ سالىنۋى 2015 جىلى باستالادى.

بۇل جونىندە ق ر ۇلتتىق ەكونوميكا ءمينيسترى ەربولات دوسايەۆ «مەملەكەتتىك-جەكەمەنشىك ارىپتەستىك جوبالارى ارقىلى ينفراقۇرىلىمعا جەكە ينۆەستيسيالاردى تارتۋ» فورۋمىندا مالىمدەدى.

- ءقازىر ءبىز «ۇلكەن الماتى اينالما تاس جولى» جوباسىن جاساۋدى اياقتاعالى جاتىرمىز. قاراشا ايىنىڭ ورتاسىنا دەيىن ينۆەستورلارعا ۇسىناتىن قۇجاتتار پاكەتىن تولىق داينىداپ، 9 جەلتوقسان ەۋروپا قايتا قۇرۋ جانە دامۋ بانكى مەن حالىقارالىق قارجى كورپوراسياسىنىڭ قولداۋى ارقىلى تىكەلەي ينۆەستورلارمەن جيىن وتكىزۋدى جوسپارلاپ وتىرمىز، - دەدى.

اتالمىش جوبانىڭ كەلەسى جىلى جۇزەگە اسىرىلاتىندىعىن ايتقان مينيستر: - «ۇلكەن الماتى اينالما تاس جولى» جوباسىنىڭ بايقاۋى ەكى كەزەڭنەن تۇراتىن بولادى. ول جوبانىڭ 2-3 جىل دايىندىق ۋاقىتىن 6-9 ايعا قىسقارتۋعا مۇمكىندىك بەرەدى، - دەپ اتاپ ءوتتى.

ايتا كەتەيىك، بۇگىن استانادا «مەملەكەتتىك-جەكە مەنشىك ارىپتەستىك جوبالارى ارقىلى ينفراقۇرىلىمعا جەكە ينۆەستيسيالاردى تارتۋ» فورۋمى وتۋدە. فورۋمنىڭ سوڭىندا «ۇلكەن الماتى اينالما تاس جولى» جوباسى تانىستىرىلادى.