وسكەمەن قالاسىنداعى شقو بالالار جانە جاسوسپىرىمدەر كىتاپحاناسىندا قازاقستان جازۋشىلار جانە جۋرناليستەر وداعىنىڭ مۇشەسى، بالالار جازۋشىسى تولىمبەك ءابدىرايىمنىڭ «اعىل-تەگىل» اتتى كىتابىنىڭ تۇساۋكەسەر ءراسىمى ءوتتى.

تۇساۋكەسەرگە كىتاپ اۆتورى استانادان ارنايى كەلىپ قاتىسىپ، بالالارمەن كەزدەستى. تۇساۋكەسەر راسىمىنە كەلگەن قالا مەكتەپتەرىنىڭ وقۋشىلارى اۆتوردى سۇراقتىڭ استىنا الدى. «بىلسەم، كورسەم، ۇقسام» دەيتىن قۇيماقۇلاق بالالار جازۋشىنىڭ شىعارمالارى جايىندا كوڭىلدەرىندە جۇرگەن سۇراقتاردىڭ جاۋابىن تولىمبەك ءابدىرايىمنىڭ ءوز اۋزىنان ەستىپ، قانىقتى. قالاداعى №16 مەكتەپتىڭ وقۋشىلارى جازۋشىنىڭ «ينە مەن ءجىپ» ەرتەگىسىنىڭ جەلىسىندە قويىلىم قويدى. وسى شارا ءۇشىن ەلوردادان ارنايى ات تەرلەتىپ كەلىپ، كىتاپحانانىڭ كىشكەنتاي وقىرماندارىمەن سىر شەرتىسكەن جازۋشىعا كىتاپحانا ديرەكتورى گۇلزادا كارچالوۆا العىسىن ءبىلدىردى. تولىمبەك ءابدىرايىم - اياگوزدىڭ تۋماسى. ەڭبەك جولىن بۇرىنعى شۇبارتاۋ اۋدانىنىڭ «جاڭا ءومىر» گازەتىنەن باستاعان. ودان كەيىن الاتاۋعا ات باسىن بۇرعان جۋرناليست «الاتاۋ جۇلدىزى»، «جەتىسۋ»، «قازاق ادەبيەتى» سىندى باسىلىمداردا، كوكشەتاۋ تەلەراديو كوميتەتىندە ەڭبەك ەتكەن. 2006 جىلدان بەرى مادەنيەت جانە اقپارات مينيسترلىگىنە قاراستى «جاس وركەن» ج ش س‑ءنىڭ استاناداعى وكىلى. بۇگىنگە دەيىن بالالارعا ارنالعان 117 اڭگىمە، ءۇش حيكايا، 25 ەرتەگى جازعان.