عابيت  مۇسىرەپوۆ  اتىنداعى قازاق  مەملەكەتتىك  اكادەميالىق بالالار  مەن  جاسوسپىرىمدەر  تەاترىندا «تەاتر - ءومىر ايناسى» باعدارلاماسى ءوتىپ جاتىر. بۇل ونەر ورداسىنىڭ  الماتى وبلىسى ىلە اۋدانىنىڭ اكىمشىلىگىمەن بىرلەسىپ جۇزەگە اسىرعان ءىس-شاراسى. ول 4ء-شى قاراشا كۇنى م. ماقاتايەۆتىڭ  «مەن ۇمىتىلمايمىن...» (رەجيسسەرى ب.سەيىتمامىتوۆ) ليريكالىق دراماسىمەن باستالدى.

6-شى قاراشادا ر. كيپلينگتىڭ «ماۋگلي» (رەجيسسەرى ج. حادجييەۆ) ەرتەگىسى، 7-شى قاراشادا ءو.بورانبايەۆتىڭ «ەر كوجەك» (رەجيسسەرى ي. ءابىلماجىنوۆ) مۋزىكالىق ەرتەگىسى مەن يران-عايىپتىڭ «ەستايدىڭ قورلانى» (رەجيسسەرى م.احمانوۆ) ماحاببات-ناماسى قويىلاتىن بولادى.

تەاتردىڭ باس  اكىمشىسى گۇلزيا ەسەنجانوۆانىڭ ايتۋىنشا، تەاتر قويىلىمدارىن كورگەننەن كەيىن اۋدان مەكتەپتەرىندە  «تەاتر - ءومىر ايناسى» تاربيە ساعاتى وتكىزىلەدى. ول ەلباسىنىڭ  «قازاقستان جولى – 2050: ءبىر ماقسات، ءبىر مۇددە، ءبىر بولاشاق» دەپ اتالاتىن حالىققا ارناعان بيىلعى جولداۋىنداعى  «جالپى قازاقستاندىق مادەنيەتتى دامىتۋعا جاڭاشا سەرپىن بەرۋ» مىندەتى اياسىندا قولعا الىنىپ وتىر. باستى ماقسات - وسكەلەڭ جاس ۇرپاققا ەلىمىزدىڭ مادەني-رۋحاني جانە پاتريوتتىق-يدەولوگيالىق ساياساتىن جۇرگىزۋ جانە  قازاق تەاتر ونەرىن ناسيحاتتاۋ. سەبەبى  تەاتر – حالىققا ەستەتيكالىق، رۋحاني، پاتريوتتىق تاربيە بەرەتىن ءبىرەگەي مادەنيەت وشاعى. ال الەمدىك جاھاندانۋ ۇدەرىسى ەكپىن العان كەزەڭدە ەل بولاشاعىن ايقىندايتىن وسكەلەڭ ۇرپاق - بالالار مەن جاسوسپىرىمدەر تاربيەسىنىڭ ماڭىزى كۇن ساناپ ارتىپ كەلە جاتىر.