تاۋەلسىزدىك مەيرامىنا 35 كۇن قالدى. قايراتتىڭ قانى، ءلاززاتتىڭ كوز جاسى تامعان الماتى بيىل بۇل مەرەكەنى قاي دەڭگەيدە اتاپ وتەر ەكەن؟ الدە جىلداعىداي "1 قاڭتاردىڭ" قالتارىسىندا قالىپ قويا ما؟ بىلتىر كەيبىر وبلىستاردا 31 جەلتوقسانعا ءبىر جارىم اي بۇرىن دايىندىق باستالىپ،16-شى جەلتوقسان ناعىز جۇمىستىڭ قىزعان شاعى بولدى. ءبىر عانا پاۆلودار وبلىسىنىڭ اكىمدىگى "1 قاڭتار" ءۇشىن بيۋدجەتتىڭ 38 ميلليون تەڭگەسىن شىرشاعا شىعىن قىلعان.

ال، تاۋەلسىزدىك مەيرامىن ءسىز قالاي قارسى الاسىز؟

ايدوس سارىم،ساياساتتانۋشى:

شىنىن ايتسام، بىلمەيدى ەكەنمىن. بىرەۋگە دەمالىس بولسا، ساياسات ماڭىندا جۇرگەن ادامدار ءۇشىن بۇل كۇن جۇمىس. قازىردەن باستاپ جوسپارلانىپ قويىلعان شارالار بار، سولارعا قاتىسامىن. جىلداعى ءداستۇر بويىنشا الماتىداعى تاۋەلسىزدىك ەسكەرتكىشىنە بارىپ، ەل ازاتتىعى ءۇشىن كۇرەسكەن، وسى جولدا شەيىت بولعاندارعا ءتاۋ ەتەمىن.

اۋىت مۇقيبەك، اقىن:

بۇكىل دۇنيە جۇزىندەگى قازاقتار تويلايتىن جالعىز مەرەكە، ۇلى مەرەكە - ول- تاۋەلسىزدىك مەرەكەسى. بۇل ناۋرىز مەرەكەسىنەن دە بيىك، قۇندى. ناۋرىز بۇكىل تۇركى حالقىنا ورتاق. جاڭا جىل دەپ جۇرگەن 1-قاڭتاردىڭ قازاقپەن ەش قاتىسى جوق. ول بىزگە وزبىر بيلەۋشىلەردەن قالعان "مۇرا". ال، قالعان مەرەكەلەر دە جەتەرلىك قوي، مەرەكەنىڭ بولعانى جاقسى. قالاي دەسەك تە، قازاق حالقى ءۇشىن، قازاق ەلى ءۇشىن بار مەرەكەدەن تاۋەلسىزدىك مەرەكەسىنىڭ ورنى دا، قۋانىشى دا الابوتەن. ال، قالاي تويلايمىن؟ ەڭ الدىمەن ەڭ جاقىن اعايىن تۋىستى قۇتتىقتايمىن، ارعى بەتتەگى قانداستارىما دا تەلەفون شالام. اقشام كەتتى دەپ ەش ايامايمىن. سوسىن قۇدايدىڭ بۇل كۇنگە جەتكىزگەنىنە تاۋبە كەلتىرەم. شەتتەگى اعايىنداردىڭ دا تەزىرەك ەلگە ورلۋىن تىلەيمىن. ازاتتىق جولىندا مەرت بولعان، تەر توككەن اتا-اعالارىمدى ەسكە الىپ، دۇعا باعىشتايمىن. حاسەن اعا ورالتايدىڭ "ەلىم-ايلاپ وتكەن ءومىر" كىتابىن پاراقتايمىن. باتىر ناعاشىلارىم اكپار-سەيىت جونىندە جازىلعان نارسەلەردى، شەشەم ايتقان اڭگىمەلەردى ويىما جاڭعىرتام.

نۇرلان ءسادىر:

ۋاعالەيكۋم اسسالام. ۇيدە تاۋەلسىزدىك جولىندا شەيىت بولعاندارعا ارناپ بىلەتىن سۇرەلەرىمنەن دۇعا قىلامىن. اتاۋلى كۇننىڭ قارساڭىندا جۇمىستا سالتاناتتى جيىندى ۇيىمداستىرۋعا ات سالىسامىن، ءسوز سويلەيمىن. تاۋەلسىزدىك تۋرالى ءوز ويلارىممەن بولىسەمىن. جۇمىستا تۇسكى ءۇزىلىس كەزىندە داستارحان جايىپ، ۇجىم بولىپ ءشاي ىشەمىز. تاۋەلسىزدىك تۋرالى پىكىرىمىز ءبىر جەردەن شىقپايتىن بولعاندىقتان ايتىسىپ تا الامىز. بىلتىر دا، ودان بۇرىن دا جاڭاوزەن وقيعالارىنا ارنالعان جيىندارعا قاتىستىم. ونداي شارا تاعى ۇيىمداستىرىلىپ جاتسا، بۇيىرسا، بيىل دا بارىپ قارا كوبەيتەتىن نيەتىم بار.

ايدوس جۇقان ۇلى،جۋرناليست:

تاۋەلسىزدىك مەرەكەسىن قارسى الۋ ءۇشىن ونى سەزىنۋ كەرەك. مەن سەزىنگەن ەمەسپىن. تاۋەلسىزدىك مونۋمەنتىنە ءتاۋ ەتۋگە بارعاندا، قاراما قارسىسىندا ھاكىم ەمەس اكىم پيانينودا "الما - اتا - مويا پەرۆايا ليۋبوۆ" دەپ اندەتىپ وتىرادى. ودان قالسا «نوۆىي گودقا» دايىندالىپ جاتادى. ءوز تىلىندە ەركىن سويلەپ، ويناپ-كۇلىپ، ۋايىم-قايعىسىز جۇرەتىن ورتانى عانا تاۋەلسىز دەپ بىلەم. ونداي ورتانى تۇركىستاننان، باتىستاعى بەينەۋدەن، وڭتۇستىك شىعىستاعى نارىنقولدان، شىعىستاعى تارباعاتايدان، قيىر شىعىستاعى باي-ولكەدەن عانا كوردىم. الماتى مەن استانادان كورمەدىم. ال الماتى مەن استانا قازاقتانبايىنشا، قازاقستانعا تاۋەلسىزدىك جوق. ونى اپەرەتىن 30-50 جاس ارالىعىنداعى مىقتى جىگىتتەر كوپ. جولاتپايدى. ويتكەنى، "شومەلە ۇستىندە يت جاتىر، نە ءوزى جەمەيدى، نە وزگەگە جەگىزبەيدى". بىلايشا ايتقاندا، تىنىش قانا الىم سالىقتى تولەپ وتىرعان ارتىق دەپ ەسەپتەيدى. جەرىن قورعاپ قالعان 5 ملن. فيندەر قۇرلى جوقپىز. تاۋەلسىزدىك تاۋەكەلسىز كەلمەيدى. سەبەبى، تەگىن جاتقان ازاتتىق جوق. قىسقاسى، تاۋەلسىزدىك كۇنىن تاۋەلسىز ەكەنىمدى تولىق سەزىنگەن كەزدە عانا قارسى الارمىن.

قۇل-كەرىم ەلەمەس، اقىن:

اۋەلى اللاھ تاعالاعا سان شۇكىر ەتىپ، ەكى باس ناماز وقيمىن! سوسىن بالالارىما ونىڭ ءمانى مەن ورىنى ءجايلى بىلگەنىمدى، ءتىلىمنىڭ جەتىسىنشە ايتامىن. ولاردىڭ دا كوزقاراستارىن تىڭدايمىن! ارنالاردان ول ءجايلى ەل نە دەپ جاتقانىن ەستىپ كورەمىز. ال، ەندى، جىلدا كوڭىلىمدى بۇزاتىن نارسە - ول مەرەكەنىڭ ىلعي دا "جاڭا جىلدىڭ" كولەڭكەسىندە قالىپ قوياتىنى...

تولەن رامازان ۇلى:

جوسپار بويىنشا، تاڭەرتەڭ بالالارىممەن مەشىتكە بارىپ، ءار جىلدارى ەل تاۋەلسىزدىگى جولىندا قۇربان بولعان ازاماتتاردىڭ ارۋاقتارىنا قۇران باعىشتاپ، سوسىن قالا ورتالىعىنداعى مەرەكەلىك شارالارعا قاتىسۋىمىز كەرەك.