ق ر پرەزيدەنتى نۇرسۇلتان نازاربايەۆ قازاقستان حالقىنا ءداستۇرلى جىل سايىنعى جولداۋىن جاريالادى.

«مەنىڭ تاپسىرماما سايكەس ۇكىمەت دامۋدىڭ اۋقىمدى جاڭا باعدارلاماسىن ازىرلەۋدى اياقتادى. بۇگىندە بىزدەردىڭ الدىمىزدا تۇرعان سىن-قاتەرلەرگە جاۋاپ بەرە وتىرىپ، مەن قازاقستاننىڭ «نۇرلى جول» جاڭا ەكونوميكالىق ساياساتىن جاريا ەتەمىن. ءدال وسىعان مەن 2015 جىلعا ارنالعان حالىققا جولداۋىمدى ارنايمىن»، - ن.نازاربايەۆ.

ەلباسىنىڭ اتاپ وتۋىنشە، جاڭا ساياسات ەلىمىزدىڭ قۇرىلىمدىق رەفورمالارىن ودان ءارى جۇزەگە اسىرۋعا باعىتتالاتىن بولادى.

"مەن ءوزىمنىڭ ۇلكەن تاجىريبەمە قاراپ، الداعى جىلدارى الەمدە جانە ءبىز ءۇشىن دە جاھاندىق سىناقتار بولاتىنىن كۇنى بۇرىن سەزەمىن. الەمنىڭ ارحيتەكتۋراسى وزگەرەتىن بولادى. بۇل كۇردەلى كەزەڭنەن مەملەكەتتەردىڭ ءبارى بىردەي لايىقتى تۇردە وتە المايدى، بۇل شەپتەن تەك مىقتى، بىرىككەن حالىقتار مەن ەلدەر عانا وتە الادى"، - دەپ مالىمدەدى پرەزيدەنت.

مەملەكەت باسشىسى جولاۋدى نە سەبەپتى كۇنى بۇرىن ارناپ وتىرعانىن ءتۇسىندىردى. "قۇرمەتتى وتانداستار! 2007 جىلى الەمدىك داعدارىس باستالدى، سىن-قاتەرلەر ءالى كۇنگە دەيىن بار جانە بۇل داعدارىس جالعاسىپ كەلە جاتىر. رەسەي مەن باتىس اراسىندا سانكسيالىق ساياسات بار. تاياۋ شىعىستا بولىپ جاتقان وقيعالار دا قازاقستانعا بەلگىلى ءبىر دارەجەدە ىقپال ەتەدى. ءبىز حالىقتىڭ سەنىمىن اقتاۋ ءۇشىن شارالاردى قولعا الىپ، ودان باسىمىز ءبۇتىن كۇيدە شىعۋىمىز كەرەك. تاياۋ جىلدارى ەلىمىز ءۇشىن اسا وڭاي بولمايىن دەپ تۇر، سول سەبەپتى ءوز جولداۋىمدى، جاڭا جىلدان باستاپ نەنى قولعا الۋ كەرەكتىگىن كۇنى بۇرىن ارناۋدى ءجون كوردىم. سوعان ۋاقىت بەرۋ ءۇشىن مەن جىلدىڭ سوڭىندا جولداۋىمدى ارناپ وتىرمىن"، - دەدى ول.

نازاربايەۆتىڭ ايتۋىنشا، قازاقستان الەمدىك ەكونوميكانىڭ ءبىر بولىگى - گەوساياسي شيەلەنىس ەپيسەنترىنە جاقىن ورنالاسقان ەل رەتىندە الەمدەگى پروسەستەردىڭ جاعىمسىز اسەرىن باستان وتكەرىپ وتىر. "ءبىز نە بولىپ جاتقانىن كورىپ وتىرمىز. الەمدىك نارىقتاردا باعا قۇلدىراپ جاتىر، تۇتاستاي العاندا، ەكونوميكالىق ءوسىم باياۋلاپ قالدى. حالىقارالىق ۆاليۋتا قورىنىڭ الەمدىك ەكونوميكا دامۋىنىڭ 2014 جىلعا جانە سودان كەيىنگى ەكى جىلعا ارنالعان بولجامدارىن تومەندەۋگە قاراي قايتا قاراعانى بەلگىلى. بۇل دا بىزگە اسەر ەتەتىن بولادى. سوندىقتان كەيبىر ۇستانىمداردى جەدەل قايتا قاراۋ كەرەك جانە الداعى كەزەڭگە ارنالعان جوسپارلارعا تۇزەتۋ ەنگىزگەن ءجون. بىزدە ارقانى كەڭگە سالۋعا ۋاقىت جوق. ءبىز ايتىپ وتىرعان شارالاردى 2015 جىلدىڭ 1 قاڭتارىنان باستاپ ىسكە اسىرۋ كەرەك، ءبىز كەلەڭسىز ۇردىستەردىڭ الدىن الۋ ءۇشىن بارلىق شارانى قولعا الىپ، بىزگە مۇنىڭ زيانى تيمەيدى دەپ ەسەپتەيتىن حالىقتىڭ ءۇمىتىن اقتاۋىمىز قاجەت. بىزدە مۇنداي تاجىريبە بار"، - دەدى ەلباسى.