بۇل كۇندە جارناما بەتى جۇلدىزدار جينالار مەكەن بولعان. تىڭدارماندارىن تاڭ قالدىرۋ ءۇشىن «تاڭعاجايىپ» ونەر ادامدارى قاي جولدىڭ بولسىن باسىن شالىپ كورەدى. سەلك ەتكىزەر سەلفيى بولسىن، جەكە باسىنا قاتىستى دۇنيەلەرى بولسىن، دۇركىن-دۇركىن جاريالاپ، جالپىماقتاۋ الىپ جاتقانى. جالت ەتىپ جارنامادان دا كورىنىپ قالادى. حالىق اراسىندا قالىپ بارا جاتقان ابىرويىن ءبىر سىلكىندىرىپ الۋ دا ماقسات بولسا كەرەك. الەۋمەتتىك جەلىدە انشىلەردىڭ تەك اجەتحاندا تۇسكەن سۋرەتى جوق قالعانىنا قايىرىمدىلىق جاساعان. بۇل دا جارناما. حوش، جانكۇيەرلەرىنىڭ جان قيىلا سۇرانىسى بويىنشا شىعار. ءقازىر «سەنساسيا» جاساۋدىڭ جالقاۋ تۇرلەرى قاپتاپ كەتتى. پيار ارقىلى بەرەكەسى كەتە باستاعان ابىرويىڭىزدىڭ ءبارىن بولماسا دا ءبىراز بولىگىن قايتارىپ الۋعا مۇمكىندىگىڭىز بار. بۇل ءۇردىستى انشىلەر قاۋىمى قاجەتىنە جاراتىپ-اق كەلەدى. تەلەديدار جارناماسىنىڭ تۇقاقتى كورەرمەنىنە اينالعان بىزدەر ءۇشىن جىلت ەتكەن بەينە-روليكتەن كورىنگەن ونەر ادامى كوڭىلىمىزدەگى بەينەسىن كەمەلدەندىرە تۇسەدى. قالا كوشەلەرىندەگى بيلبوردتاردا دا سولاي، يليا يلين، روزا رىمبايەۆا، بايان ەسەنتايەۆالار تۇسكەن جارنامالار قالا كوشەلەرىن كورىكتەندىرىپ تۇر. بۇل تانىمالدىلىق ءونىمنىڭ دە، ءوزىنىڭ دە ابىرويىنا «جۇمىس ىستەيدى». ايتار اۋىزدىڭ الدىندا جۇرەدى. جالپى حالىق تەرىس كورمەيدى. ال ەندى ءبىزدى ويلاندىرىپ، ىشكى قارسىلىعىمىزدى تۋدىرعانى مىنا جارناما بولاتىن.
بۇل قالامىزداعى جەڭىلدىكتەن كوز اشپايتىن KIMEX GRAZIE برەندتىك دۇكەنىنىڭ جارناماسى. سۋرەتتە نۇرلان ابدۋللين مىرزا. بۇل كىسىنىڭ دە ءبىر كىسىلىك ابىرويى، انشىلىگى بار ادام. ءبىراق مىنا جارنامانىڭ قانشالىقتى ماتەريالدىق پايدا تۇسىرگەنىن بىلمەسەم دە مورالدىك تۇرعىدان مىسقالداي ابىروي اكەلگەنىنە ءشۇبام بار. حالىق ونەر ادامىنىڭ اۋزىندا دۋاسى بار دەۋشى ەدى، مىنادان كەيىن دۋامىزدىڭ يەسىن تاپپاي جۇرگەن شىعار. ەردىڭ جاسى ەلۋگە كەلگەن اعامىزدىڭ اۋزى ءتۋفليدىڭ وكشەسى تۇراتىن جەر بولعانى ما؟ ساحنا سۋىت قاراعالى سول دەڭگەيگە ءتۇستى مە؟ ايتپاقشى بۇل جارناما پلاگيات بولىپ شىقتى. جارنامانىڭ تۇپكى يەسى MAX Shoes شۆەساريالىق برەندى ەكەن. كوپتەگەن فەستيۆالدەردىڭ جۇلدەسىن جەڭىپ العان كورىنەدى. بۇنىڭ ارتى قىرعىزدان العان «قىزىل ورىكتەي» اعايىنگەرشىلىكپەن شەشىلسە قۇبا-قۇپ..!
ورىنباسار باقىتبەك
