قازاقستان رەسپۋبليكاسى ىشكى ىستەر ءمينيسترى ق.ن. قاسىموۆ اۋعانستان پرەزيدەنتىنىڭ كەڭەسشىسى، ۇلتتىق قاۋىپسىزدىك جونىندەگى كەڭەستىڭ باسشىسى حانيف اتمارمەن كەزدەستى دەپ حابارلايدى Qamshy.kz  اقپارات اگەنتتىگى ق ر ىشكى ىستەر مينيسترلىگىنىڭ باسپا ءسوز قىزمەتىنە سىلتەمە جاساي وترىپ.

ىىم-دە وتكەن كەزدەسۋدە ق.قاسىموۆ شەتەلدىك مەيمانعا ەلىمىزدەگى ىشكى ىستەر ورگاندارى جۇيەسى تۋرالى اڭگىمەلەدى. مينيستر ءوز سوزىندە قازاقستاندىق پوليسيا قىزمەتىنىڭ باسىم باعىتتارىنىڭ ءبىرى – ەسىرتكى بيزنەسىنە قارسى ءىس-قيمىل ەكەنىن اتاپ ءوتتى. بۇل باعىتتاعى مىندەتتەر شەتەلدىك ارىپتەستەرمەن ەكىجاقتى، ءتىپتى كەيدە بىرنەشە تاراپپەن بىرلەسىپ اتقارىلادى.

قازاقستان رەسپۋبليكاسىنىڭ ءىىم اۋعانستانداعى ەسىرتكىگە قارسى كۇرەستى كۇشەيتۋ شارالارىن قولداۋ جونىندەگى حالىقارالىق جوبالارعا بەلسەنەدى قاتىسادى. كەزدەسۋ بارىسىندا بۇل ماسەلە دە نازاردان تىس قالعان جوق.

مەملەكەتتەر اراسىنداعى ۇكىمەتارالىق كەلىسىم شەڭبەرىندە ق ر ءىىم قاراعاندى اكادەمياسىندا «قۇقىق قورعاۋ قىزمەتى» ماماندىعى بويىنشا 73 اۋعان ازاماتىن وقىتۋ قاراستىرىلعان، ونىڭ ىشىندە 26 كۋرسانت وسى اكادەميانى ءتامامدادى.

 اۋعانستانمەن ەكى اراداعى ءوزارا ىنتىماقتاستىق تۇرعىنداردى ازاماتتىق قورعاۋ سالاسىندا دا ىسكە اسىرىلادى. قازىرگى ۋاقىتتا بۇل مەملەكەتكە الماتى قالاسىندا جاڭادان قۇرىلعان توتەنشە جاعدايلار جانە دۇلەي ءزىلزالالاردى ازايتۋ جونىندەگى ورتالىق جانىنداعى باقىلاۋشى مارتەبەسى ۇسىنىلعان.

كەزدەسۋگە قاتىسۋشىلار ەسىرتكى بيزنەسىنە، زاڭسىز كوشى-قونعا قارسى كۇرەستەگى ىنتىماقتاستىق، ازاماتتىق قورعانىس سالاسىندا ءوزارا ءىس-قيمىل جاساسۋدىڭ، اقپارات الماسۋ جانە باسقا دا وڭىرلىك قاۋىپسىزدىكتى قامتاماسىز ەتۋ اسپەكتىلەرىنىڭ نەگىزگى فورمالارىن تالقىلادى.

كەزدەسۋ ءوزارا تۇسىنىستىك جانە كونسترۋكتيۆتى ديالوگ تۇرىندە ءوتتى.