سوڭعى ۋاقىتتا ورگانداردى ترانسپلانتاسيالاۋ جايىندا جاڭالىقتار كوبەيىپ كەتتى. بىرنەشە كۇن بۇرىن كوز جۇمعان جىگىتتىڭ ورگاندارىن رۇقساتسىز العان دارىگەرلەر ول جىگىتتىڭ تۋىستارى تاراپىنان ۇلكەن داۋعا ىلىككەن بولاتىن. بەلگىلى بولعانداي، وتانداستارىمىزدىڭ كوبىسى كوز جۇمعاننان كەيىن ولاردىڭ اعزالارىن وزگە بىرەۋگە سالۋعا قارسى ەكەن، دەپ حابارلايدى Qamshy.kz اقپارات اگەنتتىگى Karavan.kz سايتىنا سىلتەمە جاساپ.

الايدا، بۇل ماسەلەنىڭ ەكىنشى جاعى بار. كەيبىر ادامدار، ءتىپتى، كوزى تىرىسىندە وزدەرىنىڭ ىشكى اعزالارىن ساتىلىمعا قويىپ، ينتەرنەتكە جاريالايدى ەكەن. عالامتوردا اعزالاردى ساتىلىمعا قوياتىن ءتۇرلى فورۋمداردى كەزدەستىرۋگە بولادى. ولاردىڭ ىشىندە ەڭ كوپ ۇسىنىلعان تاۋارلار – بۇيرەك پەن باۋىر.

وزدەرىنىڭ ىشكى اعزالارىن ساتىلىمعا قويعان بىرنەشە قازاقستاندىقتاردىڭ پىكىرىن نازارلارىڭىزعا ۇسىنامىز.

"ماعان وتە قوماقتى قارجى كەرەك، سول سەبەپتى دە ءوزىمنىڭ بۇيرەگىمدى فورۋمعا جارنامالاپ، ساتىلىمعا قويدىم. ول جەردەگى ادامدار بۇل ماسەلەگە شىنايى ءمان بەرمەيتىن سەكىلدى. مەن باعاسىن ايتقانىم جوق، ەگەر دە ماعان جاقسى ۇسىنىس ءتۇسىپ، كوپ قارجى ۇسىناتىندار بولسا، مەن بۇيرەگىمدى ساتۋعا دايىنمىن.

بۇدان ەش قورىقپايمىن. ەگەر باعىم جانسا، ءبىر بۇيرەكپەن دە ءومىر سۇرە الامىن، بولماسا، تاعدىردىڭ دەگەنىنە كونەمىن.

ماعان ەكى ەر ادام حابارلاستى، الايدا ولاردىڭ داۋىستارى ماعان ۇناماعاندىقتان باس تارتتىم. سونىمەن قاتار، مەنىڭ قاسىمدا اكە-شەشەم وتىرعان بولاتىن. ولار بۇل جايىندا بىلمەۋى قاجەت"، - دەيدى 19 جاستاعى ساۋلە ەسىمدى بويجەتكەن.

ال، اينۇر ەسىمدى قىز ءوزىنىڭ بۇيرەگى مەن باۋىرىنىڭ ءبىر بولىگىن ساتىلىمعا قويىپتى: «ماعان شۇعىل تۇردە اقشا قاجەت، سول سەبەپتى دە بۇيرەگىم مەن باۋىرىمنىڭ ءبىر بولىگىن ساتىلىمعا شىعاردىم. قازىرگى ماعان كوپتەگەن ادامدار قوڭىراۋ شالادى. ماعان 5 ميلليون تەڭگە ۇسىنعان بولاتىن، الايدا مەن باس تارتتىم. سەبەبى، مەن ءوزىمنىڭ بۇيرەگىمدى 10 ميلليونعا باعالايمىن.

ءتىپتى، 10 ميلليون تەڭگەنىڭ ءوزى از سياقتى. سەبەبى مەن بۇيرەگىمدى ساتىپ جاتىرمىن، ال ونى ماعان كەيىن ەشكىم دە قايتارىپ بەرە المايدى. ال ەگەر باۋىرىمنىڭ ءبىر بولىگىن ساتسام، ول كەيىن قالپىنا كەلەدى.

مەن، ارينە، قورقامىن. ءبىر بۇيرەكپەن عانا قالسام، نە بولار ەكەن دەپ ۇنەمى ويلاپ جۇرەمىن. ەكىنشى بۇيرەگىممەن قيىندىقتار تۋىندامايدى ما ەكەن دەپ قورقامىن. سونىمەن قاتار، بۇل ءىس زاڭدى ما، جوق پا، ونى دا بىلمەيمىن، سول جاعىنان دا ازداپ قورقىنىشىم بار»، - دەيدى اينۇر.

26 جاستاعى ساندۋعاش ەسىمدى قىزدىڭ جاعدايى مۇلدەم بولەك ەكەن: «مەنىڭ جيەنىم قاتتى اۋرىپ قالدى، وعان وتا جاساتۋ ءۇشىن قوماقتى قارجى كەرەك. ەگەر، اقشا قاتتى قاجەت بولعان جاعدايدا، ءوز ىشكى اعزاڭدى ساتۋعا بولادى دەگەندى كوپ ەستىگەنمىن. مەن ينتەرنەتتەن فورۋمدى تاۋىپ الىپ، ول جەرگە ءوزىمنىڭ بۇيرەگىمدى ساتىلىمعا قويدىم. الايدا، قاتتى قورقامىن، دەگەنمەن ساتۋعا ءماجبۇرمىن.

ماعان ەكى ادام حابارلاسىپ 2،5 جانە 3 ميلليون تەڭگە ۇسىندى. ول ادامدار بارلىق جاۋاپكەرشىلىكتى ءوز مويىندارىنا الىپ وتىر جانە دە ماعان الاڭداۋعا ەش سەبەپ جوق ەكەندىگىن ايتادى. ولار مەنى دارىگەرگە تۋىسىمىز نەمەسە دوسىمىز دەپ تانىستىرماق.

بۇل ماسەلە ءقازىر شەشىلدى. مۇنداي قادامعا شىنىمەن دە بارۋىم كەرەك پە، جوق پا دەپ مۇلدەم ويلانبايمىن دا»، - دەيدى ول.

23 جاستاعى ايدوس ەسىمدى جىگىت ءوزىنىڭ بۇيرەگىن ساتپاق ەكەن.

«مەن يپوتەكانى قالاي تولەيتىنىمدى بىلمەيمىن. سول سەبەپتى دە ءوز بۇيرەگىمدى ساتىلىمعا قويدىم. ادامدار وزدەرىنىڭ ىشكى اعزالارىن ساتىلىمعا شىعاراتىندىعىن كوپ ەستىگەنمىن. كەيىن مەن دە عالامتوردا فورۋمدى تاۋىپ الىپ، حابارلاندىرۋ بەردىم.

قورقامىن، ءبىراق قالاي دا ءومىر ءسۇرۋ قاجەت. مەنىڭ باسقا امالىم جوق. اكەم قايتىس بولىپ كەتكەن، ءقازىر كىشكەنتاي ءىنىمىز ەكەۋمىز عانا قالدىق. تاماققا اقشا تابۋ كەرەك جانە دە پاتەردىڭ اقىسىن تولەۋ قاجەت.

بۇيرەگىمدى 4 ميلليون تەڭگەگە ساتپاقپىن. الايدا ماعان قوڭىراۋ شالعاندار 2 نەمەسە 3 ميلليون عانا ۇسىنىپ وتىر. ول ماعان جەتپەيدى، سوندىقتان دا قولايلى ۇسىنىستاردى كۇتەمىن»، - دەيدى جاس جىگىت.

قازىرگى تاڭدا ءتۇرلى فورۋمدارداعى بۇيرەكتىڭ باعاسى 3 ميلليوننان 5 ميلليونعا دەيىن بارادى. الايدا، كەبىر حابارلاندىرۋ بەرۋشىلەر 10 ميلليون مەن 30 ميلليون تەڭگەگە دەيىن باعالاپ جاتىر.

وتكەن جىلعا قاراعاندا بۇيرەكتىڭ باعاسى تىم تومەن ءتۇسىپ كەتكەندىگىن بايقاۋعا بولادى. 2016 جىلدىڭ اياعىنا قاراي بۇيرەكتىڭ باعاسى 4 ميلليوننان باستالىپ 125 ميلليون تەڭگەگە دەيىن جەتكەن. ال باۋىردىڭ ءبىر بولىگىن $20 000-عا الۋعا بولادى ەكەن.

دايىنداعان: نازەركە لابيحان