بيىلعى جىلى 9 قىركۇيەكتە استانا قالاسىندا حالىقارالىق ەكسپو كورمەسى اياسىندا شارشى الاڭعا شىعاتىن قازاقستاندىق بوكسشىلاردىڭ ءتىزىمى انىقتالدى، دەپ حابارلايدى qamshy.kz اقپاراتتىق اگەنتتىگى.
بوكس كەشىنىڭ باستى جەكپە-جەگىندە ورتا سالماقتاعى WBO NABO جانە WBA Inter-Continental تۇجىرىمدارى بويىنشا الەم چەمپيونى قانات «QAZAQ» يسلام (24-0، 19 كو) ءوز بەلبەۋلەرىن جەڭىلىپ كورمەگەن كانادالىق برەندون كۋكقا قارسى قورعايدى.
بۇل كۇنگى بوكس كەشىندە تاعى سەگىز قازاقستاندىق بوكسشىلار رينگتە ونەر كورسەتەدى. ولار الىس جانە جاقىن شەتەلدىك بوكسشىلارمەن جۇدىرىقتاسادى.
ولاردىڭ ءتىزىمى تومەندەگىدەي:
- قانات يسلام - كاسىپقوي بوكستا ءالى جەڭىلمەگەن قازاقستاندىق بوكسشى. وسى ۋاقىتقا دەيىن وتانداسىمىز كاسىپقوي بوكس الاڭىندا 24 كەزدەسۋ وتكىزىپ، بارلىعىندا جەڭىسكە جەتكەن. 19 كەزدەسۋدە قارسىلاستارىن نوكاۋتقا تۇسىرگەن. قازىرگى ۋاقىتتا ورتا سالماقتاعى WBA Inter-Continental، WBO NABO (WBO Inter-Continental: WBA Fedelatin جانە WBA Fedecari بەلبەۋلەرىنىڭ يەگەرى. ونىڭ قارسىلاسى كانادالىق برەندون كۋك.
- جانقوش تۇراروۆ – جارتىلاي ورتا سالماقتاعى ۇلتتىق بوكس اسسوسياسىنىڭ (NBA) چەمپيونى. كاسىپقوي بوكستا 21 كەزدەسۋ وتكىزىپ، بارلىعىندا جەڭىسكە جەتكەن. 15 رەت قارسىلاسىن نوكاۋتقا تۇسىرگەن.
- جانىبەك ءالىمحان ۇلى – ەڭبەك سىڭىرگەن سپورت شەبەرى، ريو-دە-جانەيرو قالاسىندا وتكەن وليمپيادا ويىندارىنىڭ شيرەك فينالىنا شىققان، ازيا ويىندارىنىڭ، ازيا بىرىنشىلىگىنىڭ جانە الەم چەمپيوناتىنىڭ جەڭىمپازى. كاسىپقوي بوكستا ءبىر كەزدەسۋ وتكىزىپ، جەڭىسكە جەتكەن.
- مەيىرىم نۇرسۇلتانوۆ – ورتا سالماقتاعى ەلىمىزدەگى ەڭ تالانتتى بوكسشىلاردىڭ ءبىرى. كاسىپقوي بوكستا ءۇش كەزدەسۋ وتكىزىپ، ۇشەۋىندە دە جەڭىسكە جەتتى. سوڭعى كەزدەسۋىن 15 شىلدە كۇنى اقش-تىڭ لوس-اندجەلەس قالاسىندا امەريكالىق لەنني داردارعا قارسى وتكىزىپ، جەڭىسكە جەتتى.
- رۋسلان مىرساتايەۆ – حالىقارالىق دارەجەدەگى سپورت شەبەرى. الەم چەمپيوناتى مەن وليمپيادا ويىندارىنىڭ شيرەك فينالىنا شىققان. بەس ماۋسىم بويى بۇكىلالەمدىك بوكس سەرياسىندا (WSB) ونەر كورسەتەتىن ەلوردالىق «استانا ارلاندارى» كلۋبىنىڭ نامىسىن قورعاعان. كاسىپقوي بوكستا ەكى كەزدەسۋ وتكىزىپ، ەكەۋىندە دە جەڭىسكە جەتكەن.
- ءالي احمەدوۆ – كاسىپقوي بوكس الاڭىندا جەتى كەزدەسۋ وتكىزىپ، بارلىعىندا جەڭىسكە جەتكەن.
- ايدوس ەربوسىن ۇلى – كاسىپقوي بوكستا التى كەزدەسۋ وتكىزىپ، بارلىعىندا جەڭىسكە جەتكەن.
- ديماش نيازوۆ – نيۋ-يورك قالاسىنىڭ پوليسيا قىزمەتكەرى. كاسىپقوي بوكستا 11 كەزدەسۋ وتكىزىپ، بارلىعىندا دا قارسىلاستارىنان ۇستەم تۇسكەن. تۋعان جەرىندە ءبىرىنشى رەت كەزدەسۋ وتكىزگەلى وتىر. ويتكەنى، ديماش 13 جاسىندا اقش-قا كوشىپ كەتكەن. دەگەنمەن ول بوكستىڭ الىپپەسىن شىمكەنت قالاسىندا قازاقستاننىڭ ەڭبەك سىڭىرگەن جاتتىقتىرۋشىسى نۇرعالي سافيۋلليننەن ۇيرەنگەن.
- نۇرسۇلتان جاڭابايەۆ – WBA China بەلبەۋىنىڭ يەگەرى. كاسىپقوي بوكستا ءۇش كەزدەسۋ وتكىزىپ، ۇشەۋىندە جەڭىسكە جەتكەن.
جەكپە-جەك كەشىنىڭ باس دەمەۋشىسى ق ر مادەنيەت جانە سپورت مينيسترلىگى، استانا اكىمشىلىگى، استانا-ەكسپو-2017 كورمەسى، «سامۇرىق-قازىنا» ءۇاق، Zhersu كورپوراسياسى، Nelson Promoutins جانە Qazaq Promoutions كومپانيالارى.
