قىرعىزستان پرەزيدەنتى المازبەك اتامبايەۆ لاتىن الىپبيىنە كوشۋ تۋرالى ءوز پىكىرىن ءبىلدىردى، دەپ جازادى Qamshy.kz اقپارات اگەنتتىگى. ونىڭ ويىنشا، لاتىنعا كوشۋ تۇركى تىلدەس حالىقتاردىڭ اراسىن الشاقتاتادى، سونداي-اق كەدەيلىكتى ءالى كۇنگە دەيىن جەڭە الماي كەلە جاتقان افريكانى ەسىنە الدى.

ءوز ويىن اتامبايەۆ ءوزىنىڭ باستاماسىمەن بىشكەكتە وتكەن «التاي سيۆيليزاسياسى جانە التاي ءتىلدى وتباسىلاردىڭ تۋىستاستىعى» حالىقارالىق فورۋمى بارىسىندا ايتتى. پرەزيدەنتتىڭ ايتۋىنشا، ءالىپبيدى وزگەرتۋ جايىنداعى ءار ۇسىنىستىڭ وزىندىك جاڭا تۇسىنىكتەمەسى بار.  

“لاتىن - دامىعان ەلدەردىڭ ءالفاۆيتى جانە ەل ەكونوميكاسىنىڭ دامۋىنا وڭ اسەر ەتەدى دەگەن پىكىر بار. ءبىراق يەروگليف جۇڭگو، جاپونيا جانە كورەيانىڭ دامۋىنا كەدەرگى كەلتىردى مە؟ لاتىنعا كوشكەن افريكا ەلدەرى كەدەيلىكتى جەڭە الدى ما؟" دەدى اتامبايەۆ.

سونداي-اق اتامبايەۆ كيريلليسا تۇركى حالىقتارىن ءبىر ارنادا توعىستىرعان ءالىپبي دەپ اتادى.

“كيريلليسا سوۆەت وداعىنىڭ قۇرامىندا بولعان تۇركى حالىقتارىن ءبىر مادەني ارنادا بولۋعا سەپتىگىن تيگىزدى. شىڭعىس ايتماتوۆ، مۇحتار اۋەزوۆ باستاعان ءبىزدىڭ جازۋشىلار مەن عالىمدار ءوز ەڭبەكتەرىن كيريلليسادا جازدى" دەدى قىرعىزستان پرەزيدەنتى.

سوۆەت وداعى قۇلاعان سوڭ ازەربايجان، تۇركىمەنستان جانە وزبەكستان لاتىن الىپبيىنە كوشكەن. قازاقستان پرەزيدەنتى نۇرسۇلتان نازاربايەۆ 2017 جىلدىڭ سوڭىنا دەيىن لاتىن ءالىپبيىنىڭ ستاندارتتارىن جاساۋدى تاپسىرعان.

اتامابايەۆ 21 ماۋسىمدا قىرعىز دياسپوراسىمەن كەزدەسۋدە لاتىن الىپبيىنە كوشۋگە قارسىلىعىن ءبىلدىردى.