ريم كەلىسىمشارتىنىڭ 60 جىلدىعىن اتاپ ءوتۋ اياسىندا الماتى قالاسىنىڭ «Kinopark 11  IMAX Esentai» كينوتەاترىندا ەۋروپا كينوفەستيۆالى وتۋدە. بيىل كورەرمەندەر نازارىنا ەۋروپالىق وداققا مۇشە مەملەكەتتەردىڭ ۇزدىك كينوفيلمدەرى ۇسىنىلۋدا. فەستيۆال باعدارلاماسىنا چەحيا، اۆستريا، شۆەسيا، ەستونيا، يسپانيا، سلوۆەنيا، گەرمانيا، نيدەرلاندى، رۋمىنيا، سلوۆاكيا جانە لاتۆيا ەلدەرىندە تۇسىرىلگەن 11 فيلم كىردى.

كينو تۋىندىلارى اراسىندا ءار ءتۇرلى جانرداعى كينو سالاسىنداعى حالىقارالىق ماراپاتتاردىڭ جۇلدەگەرلەرى مەن ۇمىتكەرلەرى بار، اتاپ ايتقاندا، 1987 جىلعى «وسكار» سىيلىعىنىڭ ۇزدىك شەتەلدىك فيلم اتالىمىنا ۇمىتكەر - "دەريەۆەنكا مويا سەنترالنايا" ءفيلمى (چەحيا)، ەۋروپا كينواكادەمياسىنىڭ جۇلدەگەرى، 10 "گوييا" سىيلىعىنىڭ يەگەرى - "مينياتيۋرنىي وستروۆ" (يسپانيا) ءفيلمى، رۋمىنيا كينەماتوگرافيستەر وداعى سىيلىعىنىڭ يەگەرى - "وبەزگلاۆلەننىي پەتۋح" ءفيلمى جانە تاعى باسقالارى.

 20  شىلدە كۇنى فەستيۆالدىڭ اشىلۋ راسىمىندە كورەرمەندەرگە قازاقستاندىق رەجيسسەر كاتەرينا سۋۆوروۆانىڭ "زاۆترا مورە" ءفيلمىنىڭ كورسەتىلىمى، سونداي-اق، رەجيسسەردىڭ كورەرمەندەرمەن كەزدەسۋى بولىپ ءوتتى. "زاۆترا مورە" دەرەكتى ءفيلمى بۇرىنعى ارال تەڭىزى جاعالاۋى تۇرعىندارىنىڭ ءومىرىن باياندايدى. فيلم روبەرت بوش اتىنداعى نەمىس قورى تاعايىندايتىن گرانتتىڭ جۇلدەگەرى بولىپ تابىلادى. ءفيلمنىڭ تۇساۋكەسەرى 2016 جىلى تامىزدا لوكارنو كينوفەستيۆالىندە وتكەن بولاتىن.

 شارانىڭ اشىلۋ سالتاناتىنا قازاقستانداعى ەۋروپالىق وداق وكىلدىگىنىڭ باسشىسى ترايان حريستەا جانە «زاۆترا مورە» دەرەكتى ءفيلمىنىڭ رەجيسسەرى كاتەرينا سۋۆوروۆا قاتىستى.

 «فەستيۆال فيلمدەرى ەۋروپالىق كينووندىرىستىڭ ءتۇرلى جانرلارىن قامتيدى. ءبىزدىڭ جىل سايىن ۇيىمداستىراتىن ەۋروپالىق كينوفەستيۆالدەرىمىز تەك جارقىن كارتينالاردىڭ كورسەتىلىمى عانا ەمەس، سونىمەن قاتار، قازاقستان مەن ەۋروپانىڭ مادەني ءارى الەۋمەتتىك جاعىنان تاجىريبە الماسۋىنىڭ كورسەتكىشى. ءبىز الماتىداعى جانكۇيەرلەرىمىزگە ەۋروپالىق بولمىس الەمىنە ساياحاتتاۋلارىنا مۇمكىندىك بەرەتىنىمىزگە قۋانىشتىمىز»، - دەپ، اتاپ ءوتتى ەلشى ترايان حريستەا.

 فيلمدەر ورىس تىلىندەگى سۋبتيترلەرمەن بىرگە ءتۇپنۇسقا تىلىندە كورسەتىلەدى. بارلىق فيلمدەرگە كىرۋ تەگىن جانە كەشكى ساعات 19:00-دەن باستاپ كورسەتىلەتىن بولادى.

 كينوفەستيۆالدىڭ تولىق باعدارلاماسى قازاقستانداعى ەۋرووداقتىڭ Facebook جەلىسىندەگى رەسمي پاراقشاسىندا جاريالانعان - @euinkz