جۇمىس ساپارى اياسىندا ق ر پرەمەر-مينيسترى باقىتجان ساعىنتايەۆ قازاقستانداعى مۇناي ونىمدەرىن وندىرەتىن ءىرى كاسىپورىنداردىڭ ءبىرى - «پاۆلودار مۇناي-حيميا زاۋىتى» ءجشس-ىن جاڭعىرتۋ بارىسىن تەكسەردى، دەپ حابارلايدى Qamshy.kz اقپارات اگەنتتىگى ق ر پرەمەر-مينيسترىنىڭ باسپا ءسوز قىزمەتى سىلتەمە جاساپ.

پاۆلودار مۇناي-حيميا زاۋىتىن جاڭعىرتۋ يندۋستريالىق-يننوۆاسيالىق دامىتۋ مەملەكەتتىك باعدارلاماسى بويىنشا جۇرگىزىلىپ جاتىر جانە باسقارۋ جۇيەسىن اۆتوماتتاندىرۋدان، ەنەرگيا ۇنەمدەيتىن جانە ەكولوگيالىق تازا تەحنولوگيالاردى ەنگىزۋدەن تۇرادى، بۇل شيكى مۇنايدى قايتا وڭدەۋ بويىنشا ونىمدىلىكتى ارتتىرۋعا مۇمكىندىك بەرەدى. «پاۆلودار مۇناي-حيميا زاۋىتى» ج ش س باس ديرەكتورى شۋحرات دانباي جاڭعىرتۋدى اياقتاعاننان كەيىن جوعارى وكتاندى بەنزين ءوندىرىسى 297 مىڭ تونناعا ۇلعاياتىنىن، سونداي-اق حالىقارالىق Jet A1 ستاندارتتى اۆياوتىن ءوندىرىسى قامتاماسىز ەتىلەتىنىن باياندادى.

پمحز جاڭعىرتۋ جوباسى بويىنشا 12 تەحنولوگيالىق قوندىرعى مەن 16 جالپى زاۋىتتىق شارۋاشىلىق نىسانى سالىنىپ جانە جوندەلىپ جاتىر. جاڭعىرتۋدان كەيىن اقشىل مۇناي ونىمدەرى ءوندىرىسى جىلىنا 333 مىڭ تونناعا ارتادى. زاۋىتتى جاڭعىرتۋ اياسىندا سونداي-اق قولدانىستاعى قوندىرعىلاردى جوندەۋ جۇرگىزىلۋدە، بۇل اعىمداعى جىلدىڭ سوڭىندا ك4، ك5 ستاندارتتى ديزەل وتىنىن جانە اۆياسيالىق وتىن ءوندىرۋدى باستاۋعا مۇمكىندىك بەرەدى.

جالپى، پمحز جاڭعىرتۋ تۇتىنۋشىلاردى ساپالى مۇناي ونىمدەرىمەن قامتاماسىز ەتۋگە جانە جاڭا تەحنولوگيالار ەنگىزۋ، باسقارۋدى اۆتوماتتاندىرۋدى ارتتىرۋ ەسەبىنەن قورشاعان ورتاعا جۇكتەمەنى ازايتۋعا مۇمكىندىك بەرەدى.

ەسكە سالايىق، «پاۆلودار مۇناي-حيميا زاۋىتى» ج ش س – قازاقستان رەسپۋبليكاسىنىڭ ءۇش مۇناي وڭدەۋ زاۋىتىنىڭ ءبىرى. زاۋىتتا 19000-دەن استام ادام جۇمىس جاسايدى. بۇگىنگى تاڭدا كاسىپورىننىڭ وندىرىستىك قۋاتى جىلىنا 5،1 ملن. توننا مۇنايدى قۇرايدى. كاسىپورىن قازاقستاننىڭ ىشكى نارىعىن مۇناي ونىمدەرىمەن قامتاماسىز ەتەدى، سونداي-اق رەسەي، وزبەكستان، جۇڭگو، اقش، نيدەرلاندى، يتاليا، ۋكراينا سياقتى ەلدەرگە ونىمدەر جەتكىزەدى.