قىزىلوردا وبلىسىندا اعىمداعى جىلدىڭ التى ايىندا قازاقستان رەسپۋبليكاسىنىڭ كوشى-قون زاڭناماسىن بۇزعانى ءۇشىن 3085 شەتەلدىك ازامات اكىمشىلىك جاۋاپكەرشىلىككە تارتىلدى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

جارتى جىل ىشىندە وبلىس اۋماعىندا 20 689 شەتەل ازاماتى ۋاقىتشا تىركەۋگە الىندى، ونىڭ 709 - الىس شەت مەملەكەتتەردەن، 19 980 تمد ەلدەرىنەن كەلگەندەر. ولاردىڭ ەلگە كەلۋىنىڭ باستى ماقساتى ەڭبەك قىزمەتىمەن اينالىسۋ بولىپ تابىلادى. اتالمىش ۋاقىت ارالىعىندا  كوشى-قون زاڭناماسىن بۇزعان 3085 شەتەلدىك انىقتالىپ، ولاردىڭ بارلىعى اكىمشىلىك جاۋاپكەرشىلىككە تارتىلدى.

سونىمەن قاتار، ق ر اقبك-نىڭ 518-بابى بويىنشا، ياعني شەتەلدىكتەردى جانە ازاماتتىعى جوق ادامداردى قابىلدايتىن جەكە نەمەسە زاڭدى تۇلعالاردىڭ كوشى-قون زاڭناماسىن بۇزعانى ءۇشىن - 148 جانە ق ر اقبك-نىڭ 519-بابى بويىنشا،  شەتەلدىك جۇمىس كۇشىن ق ر زاڭناماسىن بۇزا وتىرىپ تارتقانى ءۇشىن 60 ازاماتقا اكىمشىلىك شارا قولدانىلدى.

قازاقستان رەسپۋبليكاسىنىڭ مەملەكەتتىك شەكاراسىن زاڭسىز كەسىپ وتكەنى ءۇشىن وزبەكستان رەسپۋبليكاسىنىڭ 3 ازاماتىنا قاتىستى ق ر قىلمىستىق كودەكسىنىڭ 392-بابى بويىنشا قىلمىستىق ءىس قوزعالدى.  

كوشى-قون زاڭنامالارىن بۇزۋعا جول بەرگەن  11 شەتەلدىك جانە وزبەكستان رەسپۋبليكاسىنىڭ 162 ازاماتى رەسپۋبليكا اۋماعىنان الاستاتىلىپ، 551 شەتەلدىكتىڭ قازاقستان رەسپۋبليكاسىندا بولۋ مەرزىمدەرى قىسقارتىلدى.

اعىمداعى جىلدىڭ التى ايىندا كوشى-قون پوليسياسى قىزمەتى بولىنىستەرىمەن 12 ملن.-نان استام تەڭگەگە ايىپپۇل سالىنىپ، ونىڭ 95% ءوندىرىلدى.

سونىمەن قاتار، جىل باسىنان 8681 رۇقسات راسىمدەلىپ، جەرگىلىكتى بيۋدجەتكە سالىق رەتىندە 85 ملن. 650 مىڭ 512 تەڭگە ءتۇسىم ءتۇستى.