بقو-نىڭ اقساي قالاسىندا اكىمدىك كەڭەس وداعىنان بەرى ەسىمى وزگەرتىلمەي كەلە جاتقان كوشەلەرگە قاتىستى تۇرعىنداردىڭ باسىن قوسىپ،  جينالىس وتكىزدى. تالقىلانعان ماسەلە – يۋبيلەينايا جانە ەليەۆاتورنايا كوشەلەرىنىڭ اتىن اۋىستىرىپ، قازاق باتىرلارىنىڭ ەسىمىن بەرۋ. الايدا جەرگىلىكتى تۇرعىنداردىڭ باسىم كوپشىلىگى (ورىس ۇلتىنىڭ ادامدارى) كوشەنىڭ اتاۋىن وزگەرتۋگە ۇزىلدى-كەسىلدى قارسى شىعىپ، بيلىكتىڭ ۇسىنىسىن قابىل الماي تاستادى، دەپ حابارلايدى Qamshy.kz اقپارات اگەنتتىگى موي گورود سايتىنا سىلتەمە جاساپ.

اۋداندىق جانە قالالىق اكىمشىلىك قىزمەتكەرلەرى جاساعان جينالىسقا ەكى كوشەدەن بار-جوعى 30 عانا تۇرعىن كەلىپ قاتىسقان. ولاردىڭ دەنى – يۋبيلەينايا كوشەسىنىڭ تۇرعىندارى. «اتالمىش كوشەدە قانشاما حالىق تۇرىپ جاتىر؟» دەگەن سۇراققا ولار جاۋاپ بەرە المادى.

بۋرلين اۋدانىنىڭ اكىمدىك اپپاراتىنىڭ باسشىسى دارحان اقەدىلوۆ ماراتوريي ءوز كۇشىن جويعاندىقتان، كوپتەگەن اۋىل-ايماقتارداعى كوشەلەردىڭ ەسىمىن اۋىستىرۋ ءىسى قولعا الىنعاندىعىن ايتىپ، اتى ەش ءمان-ماعىنا بەرمەيتىن كوشەلەر وزگە اتاۋعا يە بولاتىندىعىن جەتكىزگەن.

«يۋبيلەينايا كوشەسى ناقتى قانداي مەرەكەنىڭ نەمەسە ناقتى كىمنىڭ قۇرمەتىنە بەرىلگەندىگىن ەشكىم دە بىلمەيدى. بۋرلينسك اۋدانىنىڭ قۇرمەتتى تۇرعىندارىنىڭ بىرىنەن كوشە ەسىمىن 18 عاسىردا ءومىر سۇرگەن باتىر جولبارىستىڭ اتىنا اۋىستىرۋعا ۇسىنىس كەلىپ ءتۇستى»، - دەپ مالىمدەدى اقەدىلوۆ.

الايدا، اكىمنىڭ بۇل سوزىنە اشۋلانعان تۇرعىندار بۇل ۇسىنىسقا قارسى شىعىپ، كوشە اتاۋىن وزگەرتۋگە رۇقسات بەرمەيمىز دەدى.

«ءبىر ادام ۇسىندى ەكەن دەپ كوشەنىڭ اتاۋىن وزگەرتە سالۋىمىز كەرەك پە؟ سىزدەر ەڭ الدىمەن كوشەگە دۇرىستاپ جوندەۋ جۇمىستارىن جۇرگىزىڭىزدەر، بۇل كوشەدە اياق الىپ ءجۇرۋ مۇمكىن ەمەس. ال جاڭاعى ۇسىنىس بىلدىرگەن «قۇرمەتتى ازامات» دەگەنىڭىز كىم؟ ءاتى-جونىن ايتىڭىز»، - دەپ زالدا وتىرعانداردىڭ ءبىرى ءوز شاعىمىن ايتىپ قالدى.

بەلگىلى بولعانداي، كوشە اتاۋىن اۋىستىرۋعا جولدىعالي باتىرحانوۆ ەسىمدى تۇرعىن ۇسىنىس بىلدىرگەن ەكەن. ءوزى – جولبارىس باتىردىڭ ۇرپاعى. دەنساۋلىعىنا قاتىستى جينالىسقا كەلە الماعان، الايدا ونىڭ وي-پىكىرىن بالالارى مەن نەمەرەلەرى جەتكىزىپتى.

جينالىس بارىسىندا ەكى تاراپتىڭ دا پىكىرى تىڭدالىپ، داۋىسقا سالعان. الايدا كوشە ەسىمىن وزگەرتۋگە ۇسىنىس بىلدىرگەن كىسىنىڭ تۋىستارى عانا كەلىسىم بەرگەن، ال قالعان تۇرعىندار ۇزىلدى-كەسىلدى قارسى شىعىپتى. ءبىر قۋانتارلىعى - №5 مەكتەپتىڭ جانىنان جولبارىس باتىرعا ارناپ ەسكەرتكىش ورناتۋعا شەشىم قابىلدانعان. تۇرعىندار بۇعان رۇقسات بەرىپتى.

ەستەرىڭىزگە سالا كەتسەك، اقساي قالاسىندا كوشە اتاۋلارىنا قاتىستى نارازىلىقتار 2014 جىلدىڭ كۇزىندە باستالعان. ول كەزدە 50 كوشەنىڭ اتىن وزگەرتۋ كوزدەلگەن. الايدا، جەرگىلىكتى تۇرعىنداردىڭ ارىز-شاعىمدارى مەن ءتۇرلى نارازىلىق حاتتارى بۇل ءىستى كەيىنگە شەگەرگەن بولاتىن. سونىمەن قاتار قازاقستانداعى موراتوريي 2016 جىلعا دەيىن سوزىلعان.

كەيىننەن كوشە ەسىمىن وزگەرتۋ ماسەلەسى 2016 جىلى تاعى دا كوتەرىلگەن. ول كەزدە بۋرلينسك اۋدانىندا بىرنەشە كىشىگىرىم كوشەلەردىڭ اتاۋى وزگەرتىلگەن. 2016 جىلى بۇل ماسەلەگە قاتىستى جەرگىلىكتى تۇرعىنداردىڭ تىم از بولىگى عانا جينالىسقا قاتىسقانىمەن، سولاردىڭ قالاۋىنا بايلانىستى كوشە اتاۋلارى وزگەرتىلگەن ەدى. الايدا، قازىرگى كەزدە ول كوشەلەردى جاڭا اتاۋىمەن ەشكىم دە اتامايدى ەكەن. بارلىعى ەسكى اتاۋىنا ۇيرەنىپ قالعان.

 دايىنداعان: نازەركە لابيحان