مۋزەي قورىنان جاساقتالعان كورمە ارقىلى استانا قالاسىنىڭ قوناقتارى مەن تۇرعىندارى، جۇزدەگەن الىس جانە جاقىن شەتەلدەن كەلگەن تۋريستەر، ەلىمىزدىڭ وبلىسىنان كەلگەن قوناقتار جامبىل وبلىسىنىڭ جانە تاراز قالاسىنىڭ ماتەريالدىق جانە رۋحاني مادەنيەتىنىڭ بىرەگەي، قۇندى، قايتالانباس جادىگەرلەرىمەن تانىسا الادى دەپ حابارلايدى Qamshy.kz اقپارات اگەنتتىگى.
كورمەدە وبلىستىڭ جانە 2000 جىلدان اسا باي، مازمۇندى تاريحى بار قالانىڭ ساق كەزەڭىنەن قازاق حاندىعىنىڭ قالىپتاسۋ كەزەڭىنە دەيىنگى تاريحى قامتىلادى. بۇل تاراز قالاسىندا ءار جىلدارى قازبا جۇمىستارى ناتيجەسىندە تابىلعان جەتىتوبە وباسىنىڭ التىن بۇيىمدارى، ساق كەزەڭىنىڭ تاريحىن، مادەنيەتىن ايعاقتايتىن قولا قازاندىقتار، نايزانىڭ جانە جەبەنىڭ ۇشتارى، جانۋارلاردىڭ قولا مۇسىندەرى؛ تۇركى، قاراحانيد، موڭعول، سامانيد تەڭگەلەرىنىڭ اينالىمدا بولعان ەڭ قۇندى توپتامالارى، ورتاعاسىرلىق ساۋلەت ونەرىنىڭ جاۋھارى بولىپ تابىلاتىن ايشا ءبيبى كەسەنەسىنىڭ كىرپىشتەرى. ورتاعاسىرلىق تۇرمىستا ءتۇرلى ماقساتتا قولدانىلعان كۇيدىرىلگەن، كۇيدىرىلمەگەن، جالاتپالى قىش ىدىستار: ۇلكەندى-كىشىلى شىراعداندار، حوش ءيىستى اتىرلەردى، دارىلىك زاتتاردى، سىناپتاردى ساقتايتىن جۇمىرتاستار، مايشامدار، ءتۇرلى ويۋ-ورنەك تۇسىرىلگەن تارەلكەلەر، جيناق ساندىقشاسى، سىيىمدىلىعى ءار ءتۇرلى استىق، سۇيىقتىق ساقتايتىن حۋمدار، ساپتىاياقتار.
قازاق حاندىعىنىڭ قالىپتاسۋ كەزەڭىندەگى قازاق باتىرلارىنىڭ قارۋ-جاراقتارى: ساۋىت، دۋلىعا، شوقپار ت.ب. ۇسىنىلادى. قازاق حاندىعى جامبىل وبلىسى شۋ مەن تالاس وزەندەرىنىڭ اۋماعى قوزىباسى جەرىندە قۇرىلعان. 2015 جىلدىڭ قازان ايىندا قازاق حاندىعىنىڭ 550 جىلدىعى حالىقارالىق دەڭگەيدە اتاپ ءوتىلدى. جەرگىلىكتى شەبەرلەردىڭ قولىنان شىققان ءساندى – قولدانبالى ونەر بۇيىمدارى: اعاشتان جاسالعان بۇيىمدار. سونىمەن قاتار ەكسپوزيسيادا تاراز سۋرەتشىلەرىنىڭ كارتينالارى، ينستاللياسيالار ۇلكەن قىزىعۋشىلىق تۋدىرادى. كورمەگە 300-دەي جادىگەرلەر قويىلعان.
