23 شىلدە كۇنى قاراعاندىدا ارداق جۇمكەشوۆ ەسىمدى 20 جاستاعى جىگىت قايتىس بولدى. مارقۇمنىڭ اناسى بالاسىنىڭ ولىمىنە پوليسيا قىزمەتكەرلەرىنىڭ قاتىسى بار دەپ وتىر. بۇل تۋرالى Qamshy.kz اقپاراتتىق اگەنتتىگى حابارلايدى.

مارقۇمنىڭ اناسى مەرۋەرت جۇمكەشوۆانىڭ ايتۋىنشا،  23 شىلدە تۇندە قاراعاندى قالاسىنىڭ 14-ىقشام اۋدانىندا ارداقتىڭ وق اتىلعان، جارالى دەنەسى تابىلعان. ارداق ولەر الدىندا حات قالدىرىپ، وندا پوليسيا قىزمەتكەرلەرىن كىنالاعان.

مەرۋەرت جۇمكەشوۆانىڭ ايتۋىنا قاراعاندا پوليسيا وعان بالاسىنىڭ سۋيسيد جاساپ ولگەنىن ايتقان، ءتىپتى اناسىنان سوت مەديسينالىق ساراپتامانى قايتارا جاساتپاۋى تۋرالى كەلىسىمە قول قويۋدى تالاپ ەتكەن.

ارداقتىڭ دەنەسى اتالعان ىقشام اۋدانىنداعى گاراجداردىڭ بىرىندە تابىلعان.

قاراعاندى وبلىستىق ىىد-دە اتالعان وقيعا بويىنشا ارداق جۇمكەشوۆتىڭ جول ەرەجەسىن بۇزىپ، ماس كۇيىندە كولىك ايداعانىن، وسى ورايدا ونى تەرگەۋگە العانىن حابارلادى.  ال وسى وقيعا ورىن العان كۇننىڭ ەرتەسىندە ارداق جۇمكەشوۆتىڭ ءمايىتى تابىلعان.

وقيعاعا بايلانىستى تەرگەۋ ارەكەتتەرى جۇرگىزىلۋدە.