ق ر پارلامەنتى ءماجىلىسى قارجى جانە بيۋدجەت كوميتەتىنىڭ مۇشەسى امانجان جامالوۆ  سۇحباتىندا ديەۆالۆاسيا بولۋى مۇمكىن دەگەن قاۋەسەتتەرگە قاتىستى پىكىر ءبىلدىردى، دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

"قازىرگى ۋاقىتتا باق-تاردا Tele Trade Central Asia ساراپشىلارىنىڭ "جىل سوڭىنا ۇلتتىق ۆاليۋتانىڭ دوللارعا قاتىستى باعامى 420-450 تەڭگە بولادى" دەگەن مالىمدەمە كەڭىنەن جاريالانىپ جاتىر. Tele Trade كومپانياسىنىڭ ساراپشىلارى "ەكسپو اياقتالادى"، "بانكتەرگە قارجىلىق شىعىنداردى وتەۋ كەرەك" cياقتى نەگىزدەرگە سۇيەنىپ وسىنداي مالىمدەمە جاساپ وتىر. بۇگىندە تەڭگە ەركىن اينالىمدا. وعان ەكى نەگىزگى فاكتور اسەر ەتىپ وتىر: 1) مۇناي باعاسى؛ 2) ءرۋبلدىڭ دوللارعا قاتىستى باعامى"، - دەپ ايتىپ ءوتتى دەپۋتات.

سونداي-اق، ماجىلىسمەن 2017 جىلدىڭ 28 شىلدەسىندە اقش-تىڭ رەسەيگە قاتىستى ەنگىزگەن سانكسياسىنان كەيىن دە (1 دوللار 60 رۋبلگە تەڭ) ۇلتتىق ۆاليۋتانىڭ دوللارعا قاتىستى باعامى 330 تەڭگە بولاتىنىن ايتتى.

"وسىلايشا، تەڭگەنىڭ دوللارعا قاتىستى باعامى جىل سوڭىنا دەيىن 330-340 تەڭگە شاماسىندا بولادى دەپ بولجاۋعا بولادى"، - دەدى ماجىلىسمەن امانجان جامالوۆ.