قىرعىزستاننىڭ سايلاۋ جانە رەفەرەندۋم وتكىزۋ جونىندەگى ورتالىق كوميسسياسىنا بيىلعى پرەزيدەنتى سايلاۋىنا قاتىسۋعا نيەت بىلدىرگەن تاعى ءۇش ادامنان ءوتىنىش تۇسكەن. قىرعىزستان پرەزيدەنتتىگىنە كانديدات بولعىسى كەلەتىندەر سانى ءقازىر 51 ادامعا جەتكەن، دەپ جازادى Qamshy.kz اقپارات اگەنتتىگى azattyq.org مالىمەتىنە سۇيەنىپ. 

قىرعىزستان پرەزيدەنتى سايلاۋىنا تۇسۋگە "پولوت بەك" قوعامدىق قورىنىڭ پرەزيدەنتى پولوتبەك كەنجەقۇلوۆ، "ريدۋان" جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى اقىلبەك مانسۋروۆ، قوعام قايراتكەرى تالعاتبەك كوجوگۋلوۆ ءوتىنىش بەرگەن.

قىرعىزستاندا پرەزيدەنت سايلاۋى بيىل قازاننىڭ 15ء-ى كۇنى وتەدى دەپ بەلگىلەنگەن. پرەزيدەنت سايلاۋىنا تۇسۋگە نيەت بىلدىرگەندەر رەسمي ورگانعا ءوتىنىشىن تامىزدىڭ 1-ىنە دەيىن تاپسىرۋى ءتيىس. پرەزيدەنتتىككە كانديداتتاردىڭ تۇپكىلىكتى ءتىزىمىن سايلاۋ جانە رەفەرەندۋم وتكىزۋ جونىندەگى ورتالىق كوميسسيا قىركۇيەكتىڭ 10-ى كۇنى جاريالايدى.

قىرعىزستان كونستيتۋسياسى بويىنشا، پرەزيدەنت تەك ءبىر عانا مەرزىمگە سايلاناتىنداقتان ەلدىڭ قازىرگى پرەزيدەنتى المازبەك اتامبايەۆ بۇل قىزمەتتەن كەتەدى. ءبىراق قىرعىزستان كونستيتۋسياسىنا سوڭعى ەنگىزىلگەن وزگەرتۋلەر پرەزيدەنتتىڭ وكىلەتىن ازايتىپ، پرەمەر-مينيستردىڭ قۇزىرەتىن كەڭەيتتى. ساياسي باسەكەلەستەرى اتامبايەۆ نەگىزگى زاڭعا وزگەرتۋلەردى ءوزى پرەزيدەنت قىزمەتىنەن كەتكەننەن كەيىن ۇكىمەت جەتەكشىسى رەتىندە بيلىككە قايتا كەلۋ ءۇشىن ەنگىزدى دەپ سانايدى.