قازاقستان رەسپۋبليكاسى ۇلتتىق ۇلانىنىڭ الماتى قالاسىنداعى «وڭتۇستىك» وڭىرلىك قولباسشىلىعى اسكەري بولىمدەرىنىڭ جاس ساربازدارى سالتاناتتى تۇردە اسكەري انت قابىلدادى دەپ حابارلايدى Qamshy.kz اقپارات اگەنتتىگى. شارا الماتىداعى 28 پانفيلوۆشىلار ساياباعىندا ساعات تاڭعى 10.00-دە باستالدى. شارادا بارلىعى 300-گە تارتا جاس جاۋىنگەر انت بەردى.

ءراسىمدى اشقان 7552 اسكەري ءبولىمىنىڭ كومانديرى پودپولكوۆنيك سەرىك نارىمبەكوۆ  جيىن جونىندە ءسوز سويلەدى.

«قۇرمەتتى ساربازدار، انت قابىلداۋ - وتانىڭا، حالقىڭا اقتىق دەمىڭ شىققانشا ادال بولۋ، ەل باسىنا سىن ساعات تۇسسە، وندا مويىماي كوتەرۋ، قاجەت بولسا، جان قيۋ دەگەن ءسوز. سوندىقتان دا ەلدىڭ قورعانى اتاعىنا ساي، انتقا بەرىك بولىڭىزدار. تالاي عاسىر حالقىنىڭ ەركىندىگىن سىرتقى جاۋلاردان قورعاعان قابانباي، بوگەنباي، ناۋرىزباي سىندى باتىر بابالارىمىزدىڭ، ابزال اتالارىمىزدىڭ اماناتتاعان وتانىمىزدىڭ تاۋەلسىزدىگىن قىراعى كۇزەتىڭدەر»، - دەپ اق تىلەگىن ارنادى.

جاۋىنگەرلەردىڭ انت قابىلداۋ راسىمىنە ارنايى كەلگەن اتا-انالار، ارداگەرلەر دە ىزگى لەبىزدەرىن ءبىلدىردى.

«وڭتۇستىك» وڭىرلىك قولباسشىلىعىنىڭ ارداگاگەرلەر كەڭەسىنىڭ ءتوراعاسى وتستاۆكاداعى پولكوۆنيك گەنناديي فالەيەۆ:

«ەرلىك اتاۋلىنىڭ  قاينارى – وتاندى ءسۇيۋ. ەلىن، جەرىن سۇيگەن ازاماتتىڭ يمانى دا بەرىك. بۇگىن سىزدەر انت قابىلدادىڭىزدار. ول دا وتانعا دەگەن سۇيىسپەنشىلىكتىڭ بەلگىسى. سوندىقتان دا انتقا، بەرگەن ۋادەگە بەرىك، ەرجۇرەك بولىڭدار، - دەپ  جۇرەكجاردى ىقىلاسىن ايتتى.   

«كەنجە ۇلىمنىڭ بۇگىنگى انت قابىلداۋ راسىمىنە جانۇيامىز  - زايىبىم، قىزىم جانە ۇلكەن ۇلىم دا كەلدىك. ويتكەنى، انت بەرۋ ءراسىمى اسكەري ومىردەگى ماڭىزدى قادام. ەندى ءار جاس سارباز وتان الدىنداعى جاۋاپكەرشىلىگىن تۇسىنەرى ءسوزسىز. اسكەري ءبولىم باسشىلىعىنىڭ ءار قايسىمىزبەن جۇزدەسىپ، كوڭىل ءبولۋى، جالپى جاعدايلارىن كورىپ، كوڭىلىمىز كونشىدى»، - دەپ اعىنان جارىلدى ورالدىق عازى مۇسايەۆ.

سونداي-اق، سوناۋ ەكىباستۇزدان كەلگەن زايدا ءابدىراحمانوۆا: «ۇلدارىمنىڭ بارلىعى اسكەرگە باردى. ەندىگى كەزەك نەمەرەلەرىمدە. تۇڭعىش نەمەرەم وسىندا بورىشىن وتەۋدە. ونىڭ بۇگىنگى انت بەرۋ راسىمىنە ارنايى كەلدىم. الەمدى قاراساق، نەبىر قانتوگىس وقيعالاردى كورىپ وتىرمىز. ەلىمىز ەلباسىنىڭ ارقاسىندا وسى تىنىشتىعىنان جاڭىلماسىن. ۇلىما ەرجۇرەك بول دەيمىن»، - دەپ اق باتاسى ارنادى.      

انتتى ۇستىمىزدەگى جىلدىڭ كوكتەمىندە وتان الدىندا اسكەري مەرزىمدى بورىشىن وتەۋ ءۇشىن شاقىرىلعان ساربازدار قابىلدادى.

ۇلتتىق ۇلان جايلى اتاپ وتەر بولساق، ەلباسى ن.نازاربايەۆ تاۋەلسىزدىك العاننان كەيىنگى قۇقىقتىق ءتارتىپتى قامتاماسىز ەتۋگە ءجىتى كوڭىل بولە وتىرىپ، ەگەمەندىك دەكلاراسياسى جاريالانعاننان كەيىن نەبارى 26 كۇننەن كەيىن، ياعني 1992 جىلدىڭ 10 قاڭتارىندا مەملەكەتىمىزدە العاشقى كۇش-قۋات ورگانى رەتىندە ىشكى اسكەردى قۇرعان بولاتىن. سول كەزدەن باستاپ كەشەگى ىشكى اسكەر، بۇگىنگى ۇلتتىق ۇلاننىڭ جەكە قۇرامى العا قويىلعان تاپسىرمالاردى لايىقتى تۇردە ورىنداپ، جەكە ادام مەن ازاماتتىڭ كونستيتۋسيالىق قۇقىعىن، قاۋىپسىزدىگىن، قوعام قۇندىلىقتارىن، مەملەكەت تۇراقتىلىعى مەن تىنىشتىعىن قاۋىپ-قاتەرلەردەن جان-جاقتى قورعاۋ جولىنداعى جاۋاپتى قىزمەتى ابىرويمەن اتقارىپ كەلەدى بيىل ۇلتتىق ۇلاننىڭ قۇرىلعانىنا 25 جىل تولدى.

مايور ارمان اۋباكىروۆ،

الماتى قالاسى