«قازكوممەرسبانك» ديرەكتورلار كەڭەسىنىڭ جاڭا ءتوراعاسى بولىپ ارمان دۋنايەۆ سايلاندى، دەپ حابارلايدى Qamshy.kz اقپارات اگەنتتىگى.

قكب-نىڭ ديرەكتورلار كەڭەسىنىڭ جاڭا قۇرامى بانك اكسيونەرلەرىنىڭ 31 شىلدەدەگى كەزەكتەن تىس جالپى جينالىسىنىڭ شەشىمىمەن سايلانعان بولاتىن. ارمان دۋنايەۆپەن بىرگە بانكتىڭ باسقارۋ ورگانىنا ساۋلە كىشكىمبايەۆا، باس اكسيونەردىڭ وكىلى – ءاليا قارپىكوۆا، تاۋەلسىز ديرەكتورلار – ازامات جولداسبەكوۆ پەن اسقار ەلەمەسوۆ، سونداي-اق قكب-نىڭ باسقارما ءتوراعاسى لاۋازىمىنداعى ۋلف ۆوكۋركا كىردى.

«مەن ءۇشىن بۇل ۇلكەن قۇرمەت ءارى جاڭادان دامۋ كەزەڭىندە ەلدىڭ جۇيە قۇرۋشى بانكتىڭ بىرىندە ديرەكتورلار كەڭەسىن باسقارۋ ۇلكەن كاسىبيلىكتى قاجەت ەتەدى. مەملەكەتتىڭ قولداۋى مەن بانكتىڭ نەگىزگى اكسيونەرىن الماستىرۋ شارالارى بانكتە جيناقتالعان كوپتەگەن ماسەلەلەردى شەشۋگە مۇمكىندىك بەرەدى. قازىرگى ۋاقىتتا ءبىزدىڭ الدىمىزدا ماڭىزدى ماقسات-مىندەت تۇر، ول - قازكوممەرسبانكتىڭ كورپوراتيۆتىك باسقارۋ جۇيەسىن حالىقارالىق ۇزدىك تاجىريبەلەر مەن Halyk Group قاعيداتتارىنا سايكەس كەلتىرۋ جانە قارجى ينستيتۋتى دامۋىنىڭ جاڭا ستراتەگياسىن جاساۋ»، – دەدى ءوز سوزىندە دۋنايەۆ.

ارمان عالياسقار ۇلى دۋنايەۆ – تاجىريبەلى ءارى كاسىبي قارجىگەر، ەكونوميكا عىلىمدارىنىڭ كانديداتى. مەملەكەتتىك جانە جەكە سەكتور، سونداي-اق قارجى نارىعىنداعى جۇمىس تاجىريبەسى مول.

تاۋەلسىز ديرەكتور رەتىندە Halyk Group توبىنىڭ ءبىرقاتار كومپانيالارىنىڭ ديرەكتورلار كەڭەسىنىڭ قۇرامىنا كىرەدى: «قازاقستاننىڭ حالىق بانكى» اق، «Halyk Finance» اق جانە «حالىك-Life» اق. «Altyn Bank» اق («قازاقستاننىڭ حالىق بانكى» اق ەب) ديرەكتورلار كەڭەسىن باسقارادى.