«قازكوممەرسبانك» اق ديرەكتورلار كەڭەسىنىڭ جاڭا قۇرامى دك ءتوراعاسىن سايلادى. بۇل قىزمەتكە ءبىراۋىزدان تاۋەلسىز ديرەكتور ارمان دۋنايەۆ لايىق دەپ تانىلدى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

«مەن ءۇشىن بۇل ۇلكەن قۇرمەت. جاڭادان دامۋ كەزەڭىندە ەلدەگى جۇيەقۇراۋشى بانكتەردىڭ بىرىندە ديرەكتورلار كەڭەسىن باسقارۋ ۇلكەن كاسىبي شەبەرلىكتى تالاپ ەتەدى. مەملەكەتتىڭ قولداۋى مەن بانكتىڭ نەگىزگى اكسيونەرىن الماستىرۋ شارالارى جيناقتالعان كوپتەگەن ماسەلەلەردى شەشۋگە مۇمكىندىك بەرەدى. قازىرگى ۋاقىتتا ءبىزدىڭ الدىمىزدا ماڭىزدى ماقسات تۇر. ول - قازكوممەرسبانكتىڭ كورپوراتيۆتىك باسقارۋ جۇيەسىن حالىقارالىق ۇزدىك تاجىريبەلەر مەن Halyk Group قاعيداتتارىنا سايكەس كەلتىرۋ جانە قارجى ينستيتۋتى دامۋىنىڭ جاڭا ستراتەگياسىن جاساۋ»، - دەدى ا. دۋنايەۆ.

ارمان عالياسقار ۇلى دۋنايەۆ - تاجىريبەلى ءارى كاسىبي قارجىگەر، ەكونوميكا عىلىمدارىنىڭ كانديداتى. مەملەكەتتىك جانە جەكە سەكتوردا، سونداي-اق قارجى نارىعىندا جۇمىس تاجىريبەسى مول. تاۋەلسىز ديرەكتور رەتىندە Halyk Group توبىنىڭ ءبىرقاتار كومپانيالارىنىڭ ديرەكتورلار كەڭەسىنىڭ قۇرامىنا كىرەدى: «قازاقستاننىڭ حالىق بانكى» اق، «Halyk Finance» اق جانە «حالىك-Life» اق. «Altyn Bank» اق («قازاقستاننىڭ حالىق بانكى» اق ەب) ديرەكتورلار كەڭەسىن باسقارادى.

ايتا كەتۋ كەرەك، 31 شىلدە كۇنى وتكەن العاشقى جينالىستا بانكتىڭ ديرەكتورلار كەڭەسىنىڭ جاڭا قۇرامى سايلانعان بولاتىن.

ارمان دۋنايەۆپەن بىرگە بانكتىڭ باسقارۋ ورگانىنا ساۋلە كىشكىمبايەۆا، باس اكسيونەردىڭ وكىلى - ءاليا قارپىكوۆا، تاۋەلسىز ديرەكتورلار - ازامات جولداسبەكوۆ پەن اسقار ەلەمەسوۆ، سونداي-اق قكب-نىڭ باسقارما ءتوراعاسى لاۋازىمىنداعى ۋلف ۆوكۋركا كىردى.