ديرەكتورلار كەڭەسىنىڭ جاڭا قۇرامى 31 شىلدەدە وتكەن ءبىرىنشى وتىرىستىڭ بارىسىندا ءبىراۋىزدان تاۋەلسىز ديرەكتور ارمان دۋنايەۆتى قكب-نىڭ ديرەكتورلار كەڭەسىنىڭ ءتوراعاسى لاۋازىمىنا سايلادى دەپ حابارلايدى Qamshy.kz اقپارات اگەنتتىگى بانك باسپا ءسوز قىزمەتىنە سىلتەمە جاساي وتىرىپ.

قكب-نىڭ ديرەكتورلار كەڭەسىنىڭ جاڭا قۇرامى بانك اكسيونەرلەرىنىڭ 31 شىلدەدەگى كەزەكتەن تىس جالپى جينالىسىنىڭ شەشىمىمەن سايلانعان بولاتىن. ارمان دۋنايەۆپەن بىرگە بانكتىڭ باسقارۋ ورگانىنا ساۋلە كىشكىمبايەۆا، باس اكسيونەردىڭ وكىلى – ءاليا قارپىكوۆا، تاۋەلسىز ديرەكتورلار – ازامات جولداسبەكوۆ پەن اسقار ەلەمەسوۆ، سونداي-اق قكب-نىڭ باسقارما ءتوراعاسى لاۋازىمىنداعى ۋلف ۆوكۋركا كىردى.

«مەن ءۇشىن بۇل ۇلكەن قۇرمەت ءارى جاڭادان دامۋ كەزەڭىندە ەلدىڭ جۇيەقۇرۋشى بانكتىڭ بىرىندە ديرەكتورلار كەڭەسىن باسقارۋ ۇلكەن كاسىبيلىكتى قاجەت ەتەدى. مەملەكەتتىڭ قولداۋى مەن بانكتىڭ نەگىزگى اكسيونەرىن الماستىرۋ شارالارى بانكتە جيناقتالعان كوپتەگەن ماسەلەلەردى شەشۋگە مۇمكىندىك بەرەدى. قازىرگى ۋاقىتتا ءبىزدىڭ الدىمىزدا ماڭىزدى ماقسات-مىندەت تۇر ول - قازكوممەرسبانكتىڭ كورپوراتيۆتىك باسقارۋ جۇيەسىن حالىقارالىق ۇزدىك تاجىريبەلەر مەن Halyk Group قاعيداتتارىنا سايكەس كەلتىرۋ جانە قارجى ينستيتۋتى دامۋىنىڭ جاڭا ستراتەگياسىن جاساۋ»، – دەدى ءوزى سوزىندە  ارمان دۋنايەۆ مىرزا.