بەلگىلى تەنور پلاسيدو دومينگو ءوزىنىڭ Facebook جانە Instagram پاراقشاسىندا قازاقتىڭ ۇلتتىق كيىمى شاپانمەن تۇسكەن فوتوسىن جاريالاپ، استىنا «جەرگىلىكتى ءداستۇردى ساقتاۋ...قازاقستان – كەرەمەت ەل» دەپ جازعان.

ەستەرىڭىزگە سالا كەتەيىك، يسپاندىق وپەرا ءانشىسى، ءديريجور پلاسيدو دومينگو قازاقستانعا كەلىپ، ەكسپو-2017 حالىقارالىق كورمەسىن تاماشالادى. سونىمەن قاتار، «استانا وپەرا» تەاتر ساحناسىندا ونەر كورسەتتى. شاپاندى وعان قازاقستانعا كەلگەن كەزدە سىيلادى.

قازاقتىڭ شاپانى كىم-كىمگە بولسا دا جاراسا كەتەدى. قازاق حالقى شاپاندى سىيلى ادامدارعا جاپقان. ۇرپاقتان-ۇرپاققا ميراس بولىپ كەلە جاتقان بۇل ءۇردىس ءالى كۇنگە دەيىن كۇشىن جويماعان. بۇل جاعداي كوڭىلگە جىلۋ سىيلايدى. سەبەبى كوپ ۇلتتىڭ ءوز داستۇرىنەن، مادەنيەتىنەن اجىراپ قالعانىن كورگەندە ەرىكسىز قىنجىلاسىڭ. سەبەبى ۇلتتىق قۇندىلىقتار تامىرى تەرەڭگە بويلاعان، جىل ءتىپتى عاسىر وتسە دە، قانداي تابيعي قۇبىلىس بولسا دا توپىراعىنان اجىرامايتىن الىپ تامىر ىسپەتتەس. ول دارىپتەلگەن سايىن، تامىرى دا تەرەڭدەي تۇسپەك.

ادەمى ويۋلارمەن ورىلگەن، كوزدىڭ جاۋىن الاتىن شاپان جابۋ ۇلكەن مارتەبە. قازاق حالقى قوناعىنا شاپان جابۋ ارقىلى وعان دەگەن قۇرمەتىن، ەرەكشە سىيلاستىعىن بىلدىرگەن.

قازاقتىڭ ۇلتتىق كيىمى – تۇگەل ۇلتتىڭ مادەنيەتى. سونىڭ ىشىندە شاپان قازاقستاننىڭ عانا ەمەس ورتا ازيا حالىقتارىنىڭ دا ۇلتتىق كيىمى. ونىڭ بىرنەشە ءتۇرى بولادى. شاپاننىڭ تەك ەر ازاماتتارعا عانا ەمەس، ايەلدەرگە ارنالعان ءتۇرى دە بار. ماسەلەن، قيمالى شاپان. ونىڭ تىگىلۋ ءادىسى دە ەرەكشە كەلەدى.

2017 جىلى قازاقستان تاريحىندا ايتۋلى داتالارمەن ەستە قالارى ءسوزسىز. سەبەبى بيىل «الاش وردانىڭ» قۇرىلعانىنا 100 جىل تولدى. سونىمەن قاتار، حالىقارالىق ەكسپو-2017 كورمەسى قازاقستاندا ءوتىپ جاتىر. بۇل ەل ءۇشىن ۇلكەن مارتەبە، جاۋاپكەرشىلىك جانە مۇمكىندىك. الەمدىك دەڭگەيدەگى ءىس-شاراعا دۇنيەجۇزىنە تانىلعان الەمدىك جۇلدىزدار كەلدى. ونىڭ ىشىندە پلاسيدو دومينگو مەن قاتار گولليۆۋدتىق اكتەر نيكولاس كەيدجە دە بار.

وعان دا سىي، قۇرمەت رەتىندە شاپان جابىلدى. مۇنداي توسىن سىيعا دايىن بولماعان اكتەردىڭ شاپان كيگىزگەندەگى بەت-بەينەسى الەۋمەتتىك جەلىدە كەڭىنەن تاراپ، ءازىل سۋرەتتەر دە پايدا بولعان ەدى.

جەلى قولدانۋشىلارى اكتەرگە الدىن-الا قازاقتىڭ شاپان جابۋ ءداستۇرى بار ەكەنىن ەسكەرتۋ كەرەك ەدى دەگەندەر دە كوپ بولدى. دەسە دە شەتەلگەن كەلگەن قوناققا شاپان جابۋ ارقىلى ءوز ءداستۇرىمىز بەن مادەنيەتىمىزدى تانىستىرعانىمىزدى ۇمىتپايىق.