مينيستر ەرمەكبايەۆ «ۋاقىپ» قورىنىڭ قىزمەتى تۋرالى ايتىپ بەردى

/uploads/thumbnail/20170803130527169_small.jpg

ورتالىق كوممۋنيكاسيالار قىزمەتىندە ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆتىڭ قاتىسۋىمەن «ۋاقىپ» كورپوراتيۆتىك قايىرىمدىلىق قورىنىڭ قۇرىلۋى تۋرالى» تاقىرىبىندا بريفينگ ءوتتى دەپ حابارلايدى Qamshy.kz اقپارات اگەنتتىگى. بريفينگ جۇمىسىنا قازاقستان ءدىني مۇسىلماندار باسقارماسىنىڭ ءنايب-مۋفتيى ناۋرىزباي وتپەنوۆ جانە «ۋاقىپ» كورپوراتيۆتىك قايىرىمدىلىق قورىنىڭ پرەزيدەنتى قايرات ايتباي قاتىستى.

2017 جىلعى مامىردا «ۋاقىپ» كورپوراتيۆتىك قايىرىمدىلىق قورى قۇرىلدى. «ۋاقىپ» قورىنىڭ قىزمەتى كوممەرسيالىق ەمەس قايىرىمدىلىق ۇيىم رەتىندە الەۋمەتتىك جوبالاردى قارجىلاندىرۋعا، ءبىلىم-اعارتۋشىلىق شارالاردى جۇرگىزۋگە، سونىمەن قاتار، ءدىني بىرلەستىك قىزمەتكەرلەرلەرى جۇمىسىنىڭ تيىمدىلىگىن كوتەرۋ جانە ءدىني مەكەمەلەردىڭ قىزمەتىن قولداۋعا باعىتتالادى.

قوردىڭ قۇرىلتايشىلارى ق ر ءدىن ىستەرى جانە ازاماتتىق قوعام مينيسترلىگىنىڭ حالىقارالىق دىندەر جانە مادەنيەتتەر ورتالىعى جانە ءدىن ماسەلەلەرى جونىندە تالداۋ جانە عىلىمي-زەرتتەۋ ورتالىعى بولىپ تابىلادى.

قور قىزمەتىنىڭ اشىقتىعىن جانە قارجىنىڭ ماقساتتى جۇمسالۋىن قاماتاماسىز ەتەتىن قامقورشىلىق كەڭەسى قۇرىلدى. ونىڭ قۇرامىنا ق ر پارلامەنتىنىڭ دەپۋتاتى، جوعارعى مۋفتيي، «ءدىنتانۋشىلار كونگرەسىنىڭ» ءتوراعاسى، قارجى مينيسترلىگىنىڭ، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ، «اتامەكەن» كاسىپكەرلەر پالاتاسىنىڭ، «استانا» حالىقارالىق قارجى ورتالىعىنىڭ وكىلدەرى جانە بەلگىلى قوعام قايراتكەرلەرى ەندى. ءدىن سالاسىنداعى ۋاكىلەتتى ورگاننىڭ ءبىرىنشى باسشىسى رەتىندە قامقورشىلىق كەڭەستىڭ ءتوراعاسى ءدىن ىستەرى جانە ازاماتتىق قوعام ءمينيسترى بولىپ سانالادى.

قوردى قۇرۋ بارىسىندا ءبىرقاتار مۇسىلمان ەلدەرىنىڭ، سونداي-اق، بەلگيا، رەسەي سياقتى ەلدەردىڭ تاجىريبەلەرى جان-جاقتى زەرتتەلدى.

مينيستر نۇرلان ەرمەكبايەۆ «ۋاقىپ» قورىنىڭ وزگەشەلىگى قايىرىمدىلىق قاراجاتتارىن باسقارۋمەن قاتار تابىس تابۋمەن اينالىسا الاتىندىعىن اتادى. سول سەبەپتى قارجى تۇرىندەگى اكتيۆتەرىمەن قاتار، جىلجيتىن جانە جىلجىمايتىن مۇلىكتەردى باسقارۋعا رۇقسات بار. اتالعان تابىستاردىڭ سالىقتارىن تولەگەننەن كەيىن اقشانى قايىرىمدىلىققا جۇمساۋعا بولادى. ال ناقتى ءبىر ماقساتقا ارنالعان كاپيتال (ەنداۋمەنت) قوماقتى بولسا، وندا ول كاسىبي باسقارۋشى ينۆەستيسيالىق كومپانيا باسقارۋىنا بەرىلەدى.

«ۋاقىپ» قورىنىڭ پرەزيدەنتى قايرات ايتبايدىڭ ايتۋىنشا، قور قايىرىمدىلىق، الەۋمەتتىك، مادەني، عىلىمي، ءبىلىم جانە باسقارۋ ماقساتتارىنا جەتۋگە اتسالىسىپ، الىس ەلدى مەكەندەردەگى بىلىكتى يامامداردى تارتۋعا ىقپال ەتەدى.

«ۋاقىپ» قورىنىڭ قىزمەتى كەلەسى مىندەتتەردى شەشۋگە باعىتتالعان:

  • ەلدەگى بەيبىتشىلىك پەن تۇراقتىلىقتى قامتاماسىز ەتۋگە ۇلەس قوسۋ؛
  • تۇرعىنداردىڭ الەۋمەتتىك از قامتىلعان توبى مەن مۇمكىندىگى شەكتەۋلى ازاماتتارعا كومەك كورسەتۋ؛
  • بالالار مەن جاستاردىڭ فيزيكالىق جانە ينتەللەكتۋالدىق دامۋىن قولداۋ؛
  • ءدىني راديكاليزم مەن ەكسترەميزمنىڭ الدىن-الۋ؛
  • مامانداردىڭ بىلىكتىلىگىن كوتەرۋ جانە شالعايدا ورنالاسقان ءدىني بىرلەستىكتەردىڭ الەۋمەتتىك ماسەلەلەرىن شەشۋ.

وسى اتالعان مىندەتتەردى شەشۋگە ساۋاپتى ءىس جاساۋعا نيەت بىلدىرگەن ەلدىڭ بارلىق ازاماتتارى، قازاقستاننىڭ كوممەرسيالىق جانە كوممەرسيالىق ەمەس ۇيىمدارى، سونداي-اق، شەتەلدىك جانە حالىقارالىق ۇيىمدار شاقىرىلادى.

پىكىر قالدىرۋ

قاتىستى ماقالالار