رەسەي پرەزيدەنتى ۆلاديمير پۋتين كەزەكتى پرەزيدەنتتىك سايلاۋعا تۇسۋ-تۇسپەۋى جونىندە ويلانىپ جۇرگەنىن مالىمدەدى، دەپ جازادى Qamshy.kz اقپارات اگەنتتىگى. 2000 جىلدان بەرى رەسەي پرەزيدەنتى بولعان پۋتين 2008-2012 جىلدار ارالىعىندا پرەمەر-مينيستر بولىپ، بيلىك تاعىنا قايتا كەلگەن. كوپشىلىك ءپۋتيننىڭ تاعى دا پرەزيدەنتتىك سايلاۋعا ءتۇسىپ، مەملەكەتتى باسقارعانىن قالايتىن كورىنەدى.

بۋرياتيا رەسپۋبليكاسى مەن يركۋتسك وبلىستارىنداعى ورمان ورتتەرىن جويۋ بارىسى جايىندا وتكىزىلگەن جيىندا پرەزيدەنتتىڭ الدىندا ءورت سالدارىنان ءۇيى جاپا شەككەن تۇرعىن سويلەدى.

«ءبىزدىڭ سىزگە ءوتىنىشىمىز بار – كەلەسى پرەزيدەنتتىك سايلاۋعا ءسىزدىڭ دە قاتىسقانىڭىزدى، سايلاۋعا تۇسكەنىڭىزدى قالايمىز»، - دەدى جەرگىلىكتى تۇرعىن.

«جاقسى، ويلانىپ كورەيىن، راحمەت»، - دەپ جاۋاپ بەردى پۋتين.

بۇدان بۇرىن «بىرىككەن رەسەي» پارتياسى پرەزيدەنتتىك سايلاۋدا ءپۋتيندى قولدايتىندارىن مالىمدەگەن.

ال مەملەكەت باسشىسى كەزەكتى سايلاۋعا تۇسەر-تۇسپەسىن ءالى دە ويلانىپ جۇرگەن كورىنەدى. سونداي-اق، پۋتين سايلاۋ كامپانياسىنىڭ كونستيتۋسياعا سايكەس قاتاڭ تۇردە ءوتۋىن قاداعالايتىنىن ايتقان.

ايتا كەتەيىك، رەسەيدە پرەزيدەنتتىك سايلاۋ 2018 جىلى وتەدى. سايلاۋعا ءتۇسۋ جوسپارلارى جونىندە ليبەرالدى-دەموكراتيالىق پارتياسىنىڭ باسشىسى ۆلاديمير جيرينوۆسكيي مالىمدەدى. «يابلوكو» پارتياسى ءوز كەزەگىندە ۇمىتكەر رەتىندە گريگوريي ياۆلينسكييدى ۇسىنباق.