الماتى قالاسى ناۋرىزباي اۋدانى قارعالى وزەنىنىڭ اۋماعىندا قازاقستان رەسپۋبليكاسى توتەنشە جاعدايلار دەپارتامەنتى، ناۋرىزباي اۋداندىق اكىمدىگى، ناۋرىزباي اۋداندىق توتەنشە جاعدايلار ءبولىمى، الماتى قالاسى ىشكى ىستەر دەپارتامەنتىنىڭ جەرگىلىكتى پوليسيا قىزمەتى، قازاقستان رەسپۋبليكاسى ءىىم توتەنشە جاعدايلار كوميتەتىنىڭ رەسپۋبليكالىق جەدەل-قۇتقارۋ وتريادى، «قازسەلقورعاۋ» جانە «اپاتتار مەديسيناسى ورتالاعى» مەملەكەتتىك مەكەمەسىنىڭ فيليالى، الماتى قالاسى اكىمىنىڭ اپپاراتى «الماتى قالاسىنىڭ قۇتقارۋ قىزمەتى - 109» قىزمەتكەرلەرى، سونىمەن قاتار ۇلتتىق ۇلاننىڭ 28237 اسكەري ءبولىمىنىڭ اسكەري قىزمەتشىلەرى مەن ساربازدارى قاتىسقان «سەل - 2017»  بىرلەسكەن كولەمدى كوماندالىق-شتابتىق جاتتىعۋلارى وتكىزىلدى دەپ حابارلايدى Qamshy.kz اقپارات اگەنتتىگى.

كوماندالىق-شتابتىق جاتتىعۋلاردى الماتى قالاسى توتەنشە جاعدايلار دەپارتامەنتىنىڭ باستىعى، ورتكە قارسى قىزمەتىنىڭ گەنەرال-مايورى سەرىك اۋباكىروۆ اشىپ، اتالعان وقۋ-جاتتىعۋلار كەشەنى اۋماقتا توتەنشە جاعدايلار ءقاۋپى تۋىنداعان كەزدە سەل ءجۇرۋ اپاتىنىڭ الدىن الۋ ماقساتىندا قۇتقارۋ جۇمىستارىن ۇيىمداستىرىپ جۇرگىزۋ ءۇشىن، سونداي-اق توتەنشە جاعداي تۋىنداۋى مۇمكىن ەلدى-مەكەندەردىڭ عيماراتتارى مەن حالقىن اپاتتان قورعاۋ ماقساتىندا وتكىزىلىپ جاتقاندىعىن اتاپ ءوتتى.

گەنەرال-مايور سەرىك اۋباكىروۆتىڭ كوماندالىق-وقۋ جاتتىعۋدى باستاۋ تۋرالى پارمەنى قابىلدانىسىمەن، ءار سالا قىزمەتكەرلەرى ءوز باعىتتارى بويىنشا قۇتقارۋ جۇمىستارىن جۇرگىزۋدى باستادى.

وقۋ-جاتتىعۋ جۇمىستارى كەزىندە الماتى قالاسى ناۋرىزباي اۋدانى قارعالى وزەنىندەگى سۋ دەڭگەيىنىڭ شامادان تىس كوتەرىلۋىنە بايلانىستى سۋ جيناۋ توعانىنىڭ اپاتىنا اكەپ سوقتىرۋى مۇمكىن جاعداي بويىنشا ءىس-شارالار ورىندالدى. كەشەندى ءىس-قيمىلعا 24 بىرلىك تەحنيكا مەن 159 ادام تارتىلدى.

الماتى وبلىسى ۇزىناعاش اۋىلىندا ورنالاسقان قازاقستان رەسپۋبليكاسىنىڭ ۇلتتىق ۇلانى ازاماتتىق قورعانىس جونىندەگى 28237 اسكەري ءبولىمىنىڭ اسكەري قىزمەتشىلەرى بۇل وقۋ-جاتتىعۋلارعا ەرەكشە ازىرلىكپەن كەلدى. ءبولىم كومانديرىنىڭ بۇيرىعىمەن «اپات» دابىلىمەن كوتەرىلگەن جەكە قۇرام دەرەۋ بەس قارۋىن سايلاپ ساپقا تۇرعىزىلىپ، بولۋى مۇمكىن توتەنشە جاعداي ورنىنا ۋاقتىلى كەلىپ جەتتى..

توتەنشە جاعدايلار دەپارتامەنتى باسشىسىنىڭ بۇيرىعىمەن ۇلاندىق جاۋىنگەرلەردىڭ قۇتقارۋشىلار توبى ناۋرىزباي اۋدانى قارعالى وزەنى بويىنداعى سەل ءجۇرىپ وتكەن ەلدى-مەكەندەردەگى قيراپ قالعان تۇرعىن ۇيلەر مەن عيماراتتار ورنىندا اپاتتىڭ زارداپتارىن جويۋ جانە تۇرعىنداردى قۇتقارۋ مەن ولارعا كومەك كورسەتۋ بويىنشا جۇمىستاردى بىلەكتەرىن سىبانا ءجۇرىپ بەلسەنە اتقاردى. ولاردىڭ ىس-ارەكەتتەرىن توتەنشە جاعدايلار دەپارتامەنتىنىڭ باسشىلىعى ەرەكشە اتاپ ءوتتى.

جالپى «سەل - 2017» بىرلەسكەن كوماندالىق-شتابتىق وقۋ-جاتتىعۋلار قورىتىندىسى بويىنشا ۇلاندىق قۇتقارۋشى جاۋىنگەرلەر وزدەرىنە تاپسىرىلعان مىندەتتەردى ءمىنسىز اتقارىپ، توتەنشە جاعداي سالدارىمەن ويداعىداي كۇرەسە ءبىلدى. وقۋ-جاتتىعۋ كەزىندە وزدەرىنە جۇكتەلگەن مىندەتتەردى تاباندىلىقپەن ورىنداپ، اسكەري انتتارىنا ادال بولعانى ءۇشىن 28237 اسكەري ءبولىمىنىڭ كومانديرى پودپولكوۆنيك بايانعالي ەسجانوۆ جەكە قۇرامعا العىس جاريالادى.