پاكىستان پرەزيدەنتى مامنۋن حۋسەين پرەمەر-مينيستر بولعان ناۆاز شاريف وتستاۆكاعا كەتكەن سوڭ جاڭا مينيسترلەر كابينەتىنەن انت قابىلدادى، دەپ جازادى Qamshy.kz اقپارات اگەنتتىگى.
4 تامىز كۇنى انت قابىلداعان ۇكىمەتتى ءشاريفتىڭ جاقىن وداقتاسى شاحيد حاكان ابباسي باسقارادى. ءابباسيدىڭ مينيسترلەر كابينەتىنىڭ ۇلكەن بولىگى بۇرىنعى بيلىكتىڭ ادامدارى نەمەسە ءشاريفتىڭ وداقتاستارىنان تۇرادى.
جوعارعى سوت ءشاريفتى كىرىستى جاسىرىپ قالعانى ءۇشىن بيلىكتەن الاستاتقان سوڭ پرەمەر-مينيسترلىكتەن كەتكەن. الايدا بۇرىنعى ۇكىمەت باسشىسى وزىنە تاعىلعان ايىپپەن كەلىسپەي، سوتقا ارىز بەرمەك.
جاڭا ۇكىمەتتە ءشاريفتىڭ وداقتاسى مەن بۇرىنعى قورعانىس ءمينيسترى حاۆادجا اسيفكە سىرتقى ىستەر ءمينيسترىنىڭ پورتفەلى بۇيىردى. ۇكىمەت باسشىلىعىندا ناۆاز شاريف وتىرعاندا پاكىستان سىرتقى ىستەر مينيسترلىگىن ءوزى باسقارعان. مۇنداي شەشىم 2013 جىلى شاريف ۇكىمەت باسشىلىعىنا كەلگەن سوڭ قابىلدانعان.
جوسپارلاۋ ءمينيسترى بولعان چاۋدحاري احسان يكبال بۇگىندە ىشكى ىستەر ءمينيسترى اتاندى. ال ىشكى ىستەر ءمينيسترى بولعان چاۋدحاري نيسارعا جاڭا ۇكىمەتتەن ەشقانداي لاۋازىم بۇيىرمادى.
پىكىر قالدىرۋ