استانا ۋاقىتى بويىنشا، ساعات 20:21-دە ەسەپكە الۋ جۇيەسى ەكسپو-2017 كورمەسىنىڭ ەكى ميلليونىنشى كەلۋشىسىن تىركەدى. ول 34 جاستاعى ورالدىق كاسىپكەر - عايسا جۇمالييەۆ. لوندون بيزنەس مەكتەبىنىڭ تۇلەگى اتاپ وتكەندەي، ول بيزنەس سالاسىندا ەڭبەك ەتىپ جۇرگەنىنە بيىل بەس جىلدىڭ ءجۇزى بولىپتى. بۇل ونىڭ كورمەگە ءبىرىنشى كەلۋى ەمەس. كورمە كەلۋشىسى استاناعا جۇمىس ساپارىمەن ات باسىن بۇرىپتى. بۇگىن ول «ەكسپو-2017» كورمەسى اياسىندا ءوتىپ جاتقان باتىس قازاقستان وبلىسىنىڭ مادەنيەت كۇندەرىنە وراي جەرلەستەرىن قولداۋعا كەلگەن. عايسانىڭ ايتۋىنشا، بۇل وقيعا ول ءۇشىن كۇتپەگەن جاعداي بولدى، اسىرەسە ونى ۇيدە كۇتىپ وتىرعان وتباسىنا اسىرەسە، ايەلى جانە ەگىز ۇلدارى تاڭقالادى، دەپ حابارلايدى Qamshy.kz اقپارات اگەنتتىگى ەكسپو-2017 مەدياورتالىعىنا سىلتەمە جاساي وتىرىپ.
«جەكەمەنشىك سەكتوردىڭ وكىلى جانە قازاقستاننىڭ ازاماتى رەتىندە، قازاقستاندا وسىنداي جوعارى دەڭگەيدە كورمەنىڭ وتكىزىلىپ جاتقانى، مەنى ارينە، قۋانتادى. مەن بىرنەشە جىل شەتەلدە تۇردىم، ونىڭ ەكى جىلىندا وقىدىم، ءتورت جىل جۇمىس ىستەدىم. جۇزدەن اسا مەملەكەت ءوز پاۆيلوندارىن كورسەتكەنى مەن ءۇشىن قۋانتارلىق جايتتاردىڭ ءبىرى بولدى. ءبىز كوپكە تانىلدىق، سونىمەن قاتار، جەتەكشى مەملەكەتتەردىڭ جاڭا يننوۆاسيالىق تەحنولوگيالارىن وزىمىزگە قابىلداي الامىز. قازىرگى ۋاقىتتا، كورىپ تۇرعانىمىزداي،كوپتەگەن تۋريستەر بىزدە قوناقتا جانە بۇكىل الەم ءبىزدىڭ ەلىمىزدى جاقسى قىرىنان كورۋگە مۇمكىندىك الدى. قازاقستانعا «ەكسپو -2017» كورمەسىن وتكىزۋگە مۇمكىندىك تۋعانىنا مەنىڭ تۋعان جەرىمە دەگەن ماقتانىش سەزىمىن وياتتى»،-دەپ اتاپ ءوتتى ەكى ميلليونىنشى كەلۋشى.
سونىمەن قاتار، «استانا ەكسپو-2017» ۇك» اق باسقارما ءتوراعاسى احمەتجان ەسىموۆ كورمە كەلۋشىسىن قۇتتىقتاپ، وعان ەستەلىك سىيلىقتاردى تارتۋ ەتتى. ۇلتتىق كومپانيا باسشىسى ءوز سوزىندە اتاپ وتكەندەي، جوسپارداعى مەجە ۋاقىتىنان ءبىر اي بۇرىن ورىندالدى.
«عايسا ءبىزدى باقىتتى ەتتى دەپ ايتا الامىن. كورمە، ءبارىڭىز بىلەتىندەي، بۇل ەلباسىمىزدىڭ ساليقالى ساياساتىنان تۋعان ۇلكەن جوبا. ەكسپو-2017 كورمەسىنىڭ ءاربىر قاتىسۋشى ءوز ەلىنىڭ تەك جاقسى قىرلارىن كورسەتۋگە تىرىسادى. ءبىز كورمە سوڭىنا دەيىن 30 كۇن قالعاندا جوسپارلى كورسەتكىش – ەكى ميلليون كەلۋشىگە قول جەتكىزدىك. ەكسپو-2017 كورمەسىنىڭ حالىقارالىق پاۆيلوندار مەن نىساندارىنىڭ كەلۋشى سانىنا توقتالاتىن بولساق، ولاردىڭ كورسەتكىشى 15 ملن-نان اسىپ كەتتى»، - دەپ اتاپ ءوتتى احمەتجان ەسىموۆ.
سونداي-اق، ۇلتتىق كومپانيا باسشىسى اتاپ وتكەندەي، «ەكسپو-2017» ارقاسىندا، استانامىزدىڭ ەكونوميكالىق جاعدايى جاقسارا ءتۇسىپ، ايتارلىقتاي ءوسىم كوردى. سونىمەن قاتار، استانا ءتۇرعىن-ۇي جالعا بەرۋ 33% -عا، قوناقۇيلەردىڭ سۇرانىسى 28% - دان 60% - عا دەيىن ءوستى. تۋريزم سالاسىنىڭ دامۋىنا كەلسەك، كورمەنىڭ ءوتۋ بارىسىندا تۋروپەراتورلارعا جۇگىنۋ 78%-عا دەيىن جەتتى. كۇن سايىن استاناعا تىكۇشاقپەن ۇشاتىن ادامدار سانى 7 مىڭ جانە 16 مىڭ ادام تەمىر جولمەن كەلەدى. بۇل رەتتە تاۋار اينالىمى استانادا 20% - عا ءوستى، ال قىزمەت كورسەتۋ سالاسىنا سۇرانىس 2،5% - عا دەيىن كوتەرىلدى.
ايتا كەتەيىك، 11 شىلدە كۇنى حالىقارالىق مامانداندىرىلعان ەكسپو-2017 كورمەسى ميلليونىنشى كەلۋشىنى قارسى العان بولاتىن. بۇل قۋانىشقا استانا قالاسىنىڭ 27 جاستاعى تۇرعىنى يە بولدى.
پىكىر قالدىرۋ