تەگەراندا يراننىڭ جاڭادان سايلانعان پرەزيدەنتى حاسان ءرۋحانيدىڭ قىزمەتكە كىرىسۋىنىڭ سالتاناتتى ءراسىمى بولدى. قازاقستان پرەزيدەنتى نۇرسۇلتان نازاربايەۆتىڭ تاپسىرماسى بويىنشا ۇلىقتاۋعا سىرتقى ىستەر ءمينيسترى قايرات ءابدىراحمانوۆ قاتىستى. بۇل تۋرالى Qamsy.kz سايتى ءسىم باسپا ءسوز قىزمەتىنە سىلتەمە جاساپ حابارلايدى.

سالتاناتتىڭ قارساڭىندا ق.ءابدىراحمانوۆتىڭ يراننىڭ جاڭادان سايلانعان پرەزيدەنتىمەن كەزدەسۋى بولىپ ءوتتى. «بۇگىن يراننىڭ عانا ەمەس، ءسىزدىڭ ەلىڭىزدىڭ بارلىق دوستارىنىڭ ومىرىندەگى ايتۋلى كۇن. ءسىزدى قازاقستان پرەزيدەنتى نۇرسۇلتان نازاربايەۆتىڭ اتىنان قۇتتىقتاۋ مەن ءۇشىن ۇلكەن قۇرمەت. سوڭعى جىلدار ىشىندە ءسىز قازاقستان باسشىسىمەن بىرلەسىپ ەكىجاقتى قاتىناستاردى ستراتەگيالىق ىنتىماقتاستىق دەڭگەيىنە كوتەردىڭىزدەر»، - دەدى ق. ءابدىراحمانوۆ.

قازاقستاندىق ءمينيستردىڭ ايتۋى بويىنشا، ەكى ەلدىڭ سىرتقى ساياساتىنىڭ مىندەتى 2016 جىلدىڭ ىشىندە وتكەن ن.نازاربايەۆتىڭ تەگەرانعا جانە ح.ءرۋحانيدىڭ استاناعا ساپارلارىنىڭ شەڭبەرىندە قول جەتكىزىلگەن ۋاعدالاستىقتاردىڭ تولىق ىسكە اسىرىلۋىنا بارىنشا جاردەمدەسۋ بولىپ تابىلادى. ترانزيتتىك كولىك سالاسىنداعى، تۋريزم، اۋىل شارۋاشىلىعى سالالارىنداعى، كەن ءوندىرۋ سالاسىنداعى جوبالاردى ساپالى جۇزەگە اسىرۋدىڭ ماڭىزى زور، - دەدى ق. ءابدىراحمانوۆ.

مينيستر يران پرەزيدەنتىن 10-11 قىركۇيەكتە استانادا وتەتىن يسلام ىنتىماقتاستىعى ۇيىمىنىڭ عىلىم جانە تەحنولوگيالار جونىندەگى ءبىرىنشى سامميتىنە جۇرگىزىلىپ جاتقان دايىندىق تۋرالى حاباردار ەتتى جانە قازاقستان پرەزيدەنتىنىڭ بۇكىل يسلام الەمى ءۇشىن ماڭىزدى وسى ءىس-شاراعا قاتىسۋعا شاقىرۋىن جەتكىزدى.

ءوز كەزەگىندە يران پرەزيدەنتى دە ەكى ەلدىڭ دامۋ ۇستىندەگى ىنتىماقتاستىعىن قاناعاتتاندىق سەزىممەن اتاپ ءوتتى. «پرەزيدەنت ن.نازاربايەۆ پەن ەكەۋىمىزدىڭ ارامىزدا ەكەۋارا دوستىق جانە ءوزارا تولىق تۇسىنىستىك بار. قازاقستاننىڭ كوشباسشىسى – الەمدە اسا قۇرمەتتى تۇلعا، ول بۇكىل ءوڭىر ءۇشىن كوپتەگەن جاقسى ىستەر ىستەدى»، دەپ اتاپ ءوتتى يران پرەزيدەنتى. ح.رۋحاني استاناداعى عىلىم جانە تەحنولوگيالار جونىندەگى يىۇ ءسامميتىنىڭ وتكىزىلۋىنە ريزاشىلىعىن ءبىلدىردى جانە يراننىڭ وسى ماڭىزدى وقيعاعا قاتىساتىنىنا سەندىردى. بۇدان باسقا، ح.رۋحاني تەرروريزمگە قارسى كۇرەستە ىنتىماقتاستىقتىڭ قاجەتتىگىنە، يراك پەن سيريانىڭ اۋماعىنان لاڭكەستەردىڭ ىعىستىرىلۋى سالدارىنان ونىڭ تارالۋىنا جول بەرمەۋ كەرەكتىگىنە كۇمان جوقتىعىن ايتتى.

پرەزيدەنت مۇناي بويىنشا سۆوپ وپەراسيالارىن، قازاقستان-تۇركمەنستان-يران تەمىر جول ماگيسترالىن دامىتۋدى، كاسپييدە تەڭىزبەن جۇك جانە جولاۋشىلار تاسىمالدارىن جولعا قويۋدى، سونداي-اق اۋىل شارۋاشىلىعىن قوسا العاندا، بارلىق بىرلەسكەن ەكونوميكالىق جوبالار بويىنشا يراننىڭ قازاقستانمەن ءوزارا تىعىز ءىس-قيمىل جاساۋعا دايىن ەكەنىن اتاپ كورسەتتى. كاسپيي ماڭى مەملەكەتتەرىنىڭ ساۋدا، كەمە قاتىناسى، ەكولوگيا سالالارىنداعى ىنتىماقتاستىعى جەمىستى دامۋدا. تەڭىزدىڭ قۇقىقتىق مارتەبەسىمەن بايلانىستى ءبىرقاتار ماسەلەلەردى بىرلەسىپ رەتتەۋ عانا قالدى، دەدى ح.رۋحاني.

قازاقستان-يران ىنتىماقتاستىعىنىڭ بارىنشا ەگجەي-تەگجەيلى ماسەلەلەرى ق. ءابدىراحمانوۆتىڭ ءوز ارىپتەسى – يران سىرتقى ىستەر ءمينيسترى موحامماد دجاۆادزاريفپەن جۇرگىزگەن كەلىسسوزدەردىڭ بارىسىندا تالقىلاندى. اعىمداعى ساتتە بىرنەشە جۇزدەگەن ميلليون دوللار سوماسىنداعى 21 ينۆەستيسيالىق جوبا بىرلەسكەن ازىرلەۋدە جاتىر. كولىك جانە لوگيستيكا سالاسىنداعى ىنتىماقتاستىقتى ارتتىرۋ پارسى شىعاناعىنىڭ جاعاسىنداعى يراننىڭ باندار-ابباس پورتتىق قالاسىندا قازاقستان كونسۋلدىعىنىڭ تەزىرەك اشىلۋىنا ىقپال ەتەتىن بولادى، ول تۋرالى ەكى ەل اراسىندا ۋاعدالاستىق تا بار.

م.زاريف يران ءۇشىن قازاقستان ماڭىزدى دوس جانە كورشى بولىپ تابىلادى دەپ اتاپ ءوتتى. وتكەن جىلعى پرەزيدەنتتەر دەڭگەيىندەگى ءوزارا ساپارلار ەكىجاقتى قاتىناستاردى ايتارلىقتاي ىلگەرىلەتتى. يراندا پرەزيدەنت ن.نازاربايەۆقا ونىڭ وڭىرلىكجانە حالىقارالىق ىستەردەگى ءرولى ءۇشىن ۇلكەن قۇرمەتپەن قارايدى. م.ءزاريفتىڭ ايتۋى بويىنشا، قازاقستان يراننىڭ يادرولىق باعدارلاماسى بويىنشا بىرلەسكەن جان-جاقتى ءىس-قيمىل جوسپارىنا قول جەتكىزۋدە جانە ونى ىسكە اسىرۋدا پايدالى ءىس اتقاردى جانە يران قازاقستاننىڭ وسى ماسەلەگە ىسكەرلىك قاتىسۋىن جالعاستىرادى دەپ ۇمىتتەنەدى. يران ءمينيسترى كاسىپكەرلەر ءۇشىن وڭايلاتىلعان ۆيزالىق رەجيمدى قامتاماسىز ەتۋ، تۋريستەرمەن الماسۋدى ۇلعايتۋ قاجەتتىگى، سونداي-اق بانكارالىق بايلانىستاردى جولعا قويۋ ماسەلەلەرىن قوزعادى.

كەلىسسوزدەر بارىسىندا تاراپتار حالىقارالىق كۇن ءتارتىبىنىڭ ءارتۇرلى ماسەلەلەرى، ونىڭ ىشىندە سيريا بويىنشا استانا پروسەسىنىڭ كەزەكتى راۋندىنا دايىندىق، تاياۋ شىعىستاعى جاعداي، سونداي-اق يسلامارالىق جاقىنداسۋ سالاسىنداعى باستامالار بويىنشا پىكىر الىستى.

تەگەرەنعا جاساعان ءبىر كۇندىك ساپارىنىڭ بارىسىندا ق.ءابدىراحمانوۆ قازاقستاندا جۇمىس ىستەيتىن نەمەسە ءبىزدىڭ ەلگە ينۆەستيسيا سالعىسى كەلەتىن يراننىڭ ءىرى بيزنەسمەندەرىمەن كونسۋلتاسيالار وتكىزدى. مينيستر قازاقستان ۇكىمەتىنىڭ ەكونوميكالىق ديپلوماتيانى كۇشەيتۋ جانە ەكونوميكانىڭ باسىم سەكتورلارىنا ينۆەستورلار تارتۋ جونىندەگى شارالارى تۋرالى حاباردار ەتتى. يران كاسىپكەرلەرىمەن كەزدەسۋ كەزىندە قازاقستان مەن يراننىڭ اراسىنداعى ساۋدا-ەكونوميكالىق بايلانىستاردى ارتتىرۋ ءۇشىن شەشۋ قاجەت بولىپ تۇرعان وزەكتى پروبلەمالار ءسوز بولدى.