يتاليا ەلىندە ورماندى ورتەگەن ءورت ءسوندىرۋشى ۇستالدى دەپ حابارلايدى Qamshy.kz اقپارات اگەنتتىگى شەتەلدىك باق-قا سىلتەمە جاساي وتىرىپ.

پاۆيا قالاسىنداعى ورمان ءجيى ورتەنگەندىكتەن، ارنايى كۇزەت قويىلعان. يتاليانىڭ پوليسيا قىزمەتكەرلەرى 28 جاستاعى ەر ادامنىڭ ورماندى ورتەپ جاتقانىن ۆيدەوعا ءتۇسىرىپ الىپتى. كەيىننەن ورماندى ورتەگەن ەر ادامنىڭ ءورت ءسوندىرۋشى ەكەنى بەلگىلى بولعان.

تەرگەۋ كەزىندە ول ورماندى نە ءۇشىن ورتەگەنىن ايتىپ بەردى. ونىڭ ايتۋى بويىنشا، ول ورماندى ورتەپ، كەيىن ءورتتى سوندىرگىسى كەلگەن.  ال بۇنداي ىس-ارەكەتكە بارۋىنىڭ سەبەبى ادرەناليندى سەزىنىپ، تاجىريبە جاساپ كورگىسى كەلگەن.

ءورت ءسوندىرۋشىنىڭ سوزىنشە، ول امەريكالىق سەريالدارداعى ءورت سوندىرۋشىلەردىڭ باتىرلىعىنا قىزىققان. ول يتاليانىڭ سولتۇستىگىندە تۇرادى ەكەن. ال ول جاقتا ورنالاسقان ورمانداردا ءورت ءجيى بولمايدى. سوندىقتان ءورت ءسوندىرشى ءوز ەركىمەن ورماندى ورتەپ، كەيىن ءوزى كورگەن سەريال كەيىپكەرىنىڭ قاھارماندىعىن قايتالاعىسى كەلىپتى.