جۇڭگو ساراپشىلارىنىڭ ءبىرقاتارى نەكەگە تۇرماعان جاستار مەملەكەتكە ءقاۋىپ توندىرەدى دەپ ەسەپتەيدى. بۇل تۋرالى Sputnik جۇڭگو پورتالى جازدى دەپ حابارلايدى Qamshy.kz اقپارات اگەنتتىگى.

باسىلىمنىڭ مالىمەتىنە سۇيەنسەك، قىتايدا 2015 جىلى جالعىز باستى جاستاردىڭ سانى 200 ميلليوننان اسقان. عالىمداردىڭ ساراپتاماسىنا سايكەس، نەكەگە تۇرماعانداردىڭ كوبى جوعارعى وقۋ ورنىن بىتىرگەن، تابىسى مول ءارى قالادا تۇراتىن جاستار بولىپ شىقتى.

حالىقارالىق ەكونوميكالىق فورۋمنىڭ دەرەگىنشە، بۇگىندە 35 جاسقا دەيىنگى ايلىعى جوعارى ماماندار 20 جىل بۇرىنعى زامانداستارىنا قاراعاندا كەرەك-جاراعىنا جۇمسايتىن قاراجات كولەمى 40 ەسەگە ارتىق. عالىمدار، بۇل قوعامدىق ماسەلە ەكەنىن ەسكەرتتى. اتالمىش فاكت ەكونوميكاعا كەرى اسەرىن تيگىزۋى مۇمكىن ەكەن.

جۇڭگو ۇلتتىق ەكونوميكالىق ستراتەگيا اكادەمياسىنىڭ ساراپشىسى چجان ءنيننىڭ پىكىرىنشە، تابىسى مول ءارى جالعىز باستى جاستاردىڭ كوبەيۋى ويىن-ساۋىق يندۋسترياسىندا ساتىلىمنىڭ ارتۋىنا سەپتىگىن تيگىزگەنىمەن، ەل ەكونوميكاسىن شىعىنعا ۇشىراتادى. ونىڭ ايتۋىنشا، وتباسىنىڭ قامىن ويلامايتىن جالعىز باستى جاستار ءوز كارەراسىنا اسا ءمان بەرىپ، تابىسىن قالاي كوتەرۋدىڭ جولىن ىزدەيدى.

«جالعىز ادامداردىڭ كوبەيۋى ۋاقىت وتە كەلە تۋۋ دەڭگەيىنىڭ تومەندەۋىنە ءارى قارت ادامداردىڭ وسۋىنە اكەلىپ سوعادى. 10-20 جىلدان سوڭ ەڭبەككە جارامدى ازاماتتاردىڭ سانى ازايىپ، زەينەتاقىمەن قامسىزداندىرۋ ماسەلەلەرىندە قيىندىق تۋىندايتىنى ءسوزسىز»، – دەدى ساراپشى.