قازاقستاندا ديزاينى وزگەرتىلگەن 1000 (ءبىر مىڭ) تەڭگەلىك بانكنوت اينالىمعا شىقتى، - دەپ حابارلايدى Tengrinews.kz ءتىلشىسى ۇلتتىق بانكتىڭ باسپا ءسوز قىزمەتىنە سىلتەمە جاساپ. "ق ر ۇلتتىق بانكى تۋرالى" زاڭىنا، ق ر پرەزيدەنتىنىڭ جارلىعىمەن بەكىتىلگەن قازاقستان تەڭگەسى – ۇلتتىق ۆاليۋتا بانكنوتتارى مەن مونەتالارى ديزاينىنىڭ تۇجىرىمداماسىنا سايكەس، ۇلتتىق بانك باسقارماسىنىڭ "ديزاينى وزگەرتىلگەن نومينالدىق قۇنى 1000 (مىڭ) تەڭگە بانكنوتتى اينالىمعا شىعارۋ تۋرالى" قاۋلىسىن باسشىلىققا الا وتىرىپ، ۇلتتىق بانك 2014 جىلعى 1 جەلتوقساننان باستاپ ديزاينى وزگەرتىلگەن مىڭ تەڭگەلىك بانكنوتتى اينالىمعا شىعاردى دەپ حابارلايدى"، - دەلىنگەن حابارلامادا.

ديزاينى وزگەرتىلگەن مىڭ تەڭگەلىك بانكنوت مولشەرى 134ح70 مم قاعازدا دايىندالعان. بەتكى جاعىندا سارى-قوڭىر ءتۇس باسىم، بەينەلەر تىگىنەن ورنالاسقان. نەگىزگى بەينەلەر بانكنوتتىڭ وڭ جاعىندا بەينەلەنگەن، ولار "قازاق ەلi" مونۋمەنتى جانە تومەنگى جاعىندا ورتادا ۇشىپ جۇرگەن كوگەرشىندەردىڭ بەينەسى بار. جوعارعى بولىگىندە مەملەكەتتىك ەلتاڭبا جانە مەملەكەتتىك تۋ بەينەلەنگەن. سول جاق تومەنگى جانە جوعارعى بولىگىندە نومينالدىڭ سيفرلىق بەلگىسى مەن سول جاق ورتادا نومينالدىڭ مەملەكەتتىك تىلدەگى ءارىپ بەلگىسى باسىلعان.

"نومينالدىڭ سىرت جاعىنداعى دا باسىم ءتۇس - سارى-قوڭىر، باسىم بەينەلەر كولدەنەڭىنەن ورنالاسقان"، - دەيدى ۇلتتىق بانك ماماندارى. وندا باتىس قازاقستانداعى ءۇستىرت شوقىسى، ارتقى جاعىندا قازاقستان كارتاسىنىڭ كونتۋرى بەينەلەنگەن.

ەسكە سالا كەتەيىك، ق ر ۇلتتىق بانكى وتكەن جىلى دا 1000 تەڭگەلىك بانكنوتتىڭ ديزاينى وزگەرگەن نۇسقاسىن اينالىمعا شىعارعان ەدى. بۇل بانكنوت "كۇلتەگىن" تۇركى جازبا ەسكەرتكىشىنە ارنالدى.