حالقىمىز ءۇشىن تاۋەلسىزدىك كۇنى مەرەكەسىنىڭ ورنى بولەك، ارينە. ول تۋرالى ساناۋلى كۇندەردەن كەيىن، ءسات-ساعاتىندا جازاتىن بولامىز. ال، شەتتە تارىداي شاشىراپ جۇرگەن بەس ميلليون قانداسىمىز تۇرعىسىنان العاندا، بۇگىن – 13 جەلتوقسان دا سونداي قاسيەتتى، مارتەبەلى كۇن سانالادى. وسىدان تۇپ-تۋرا ون ءتورت جىل بۇرىن، اتاپ ايتسام، 1997-جىلدىڭ ءدال وسى 13-جەلتوقسانىندا تاۋەلسىز قازاقستاننىڭ تۇڭعىش پرەزيدەنتى، ۇلت كوشباسشىسى نۇرسۇلتان نازاربايەۆ تۇڭعىش رەت قابىلدانعان «حالىقتىڭ كوشى-قونى تۋرالى» زاڭىنا قول قويعان بولاتىن. اتالمىش كوشى-قون زاڭىن سول كەزدەگى ءماجىلىس دەپۋتاتى، قازاقتىڭ بەلگىلى اقىنى اكىم ىسقاقتىڭ ۇيتقى بولىپ جاساعانىن بۇل كۇندە ەل اڭىز ەتىپ ايتادى. ءسويتىپ، اكىم ىسقاق - ءبىرىنشى شاقىرىلعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى جانە تۇڭعىش قازاق تىلىندە جازىلعان «حالىقتىڭ كوشى-قونى تۋرالى» زاڭىنىڭ اۆتورى بولىپ تاريحتا قالدى. اكىم مىرزا الەمدىك تاجىريبە مەن زاڭنامالاردى نەگىزگە الىپ، الىستان كەلگەن باۋىرلارىمەن اقىلداسا وتىرىپ جاساعان سول زاڭنىڭ ارقاسىندا قانشاما قازاقتىڭ اتاجۇرتقا ورالعانىن وزدەرىڭىز جاقسى بىلەسىزدەر. سول قاسيەتتى 13-جەلتوقسان بيىل دەمالىس كۇنىنە تۋرا كەلدى. جىل باسىنان بەرى قايتا قارالسىن دەپ ەلباسى تاپسىرما بەرىپ، انە-مىنە وزگەرىستەر ەنگىزىلەدى دەگەن سول كوشى-قون زاڭى ۇكىمەت قورجىنىنان پارلامەنتكە تۇسپەگەن كۇيى بۇل جىل دا اقىرالاسىپ بارادى. تامارا دۇيسەنوۆا مەن اسلان قارجاۋبيەۆتىڭ قارشا بوراتىپ ءشۇيىنشى سۇراعان حابارىنىڭ دا ەش قايىرى بولمادى. الىستان كەلگەن اعايىن نە تۇراقتى تىركەۋگە تۇرا الماي، نە ازاماتتىققا قول جەتكىزە الماي ءبىر جىلدى سارساڭمەن وتكىزدى. ۇلت ەكىگە بولىنگەن كۇيى كۇن كەشىپ جاتىر. وكىنىشتى!!! ەسەسىنە، ەلىمىز الەمدەگى دامىعان ەلۋ ەلدىڭ قاتارىنا قوسىلدى. 2017-جىلى ەكسپو كورمەسىن وتكىزەدى. بيىل 29-مامىردا قازاقستان، رەسەي، بەلارۋس مەملەكەت باسشىلارى ەەو-نا قول قويدى... ودان ارعىسىن ايتىپ، ساناپ تاۋىسۋ مۇمكىن ەمەس! تالاپ بىرەۋ-اق: قازىرگى قولدانىستاعى كوشى-قون زاڭىنا شەتتەن كەلگەن قازاققا جەڭىلدەتىلگەن تارتىپپەن ءۇش ايدىڭ ىشىندە ازاماتتىق بەرۋگىزەتىن جالعىز-اق سويلەم ەنگىزۋ!

اۋىت مۇقيبەك