قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى 20-شى قازاندا «مەملەكەتتىك  ءتىلدى  ۇيرەتۋ: ءادىس، تاجىريبە، يننوۆاسيا»  رەسپۋبليكالىق سەمينارىن وتكىزەدى دەپ حابارلايدى Qamshy.kz اقپارات اگەنتتىگى.   

سەميناردىڭ ماقساتى – مەملەكەتتىك ءتىلدى وقىتۋدىڭ ادىستەمەسىن جەتىلدىرۋ، وزىق تاجىريبەنى  زەردەلەۋ جانە قورىتۋ، وقىتۋدىڭ يننوۆاسيالىق ادىستەرى مەن تەحنولوگيالارىن تاجىريبەگە ەنگىزۋ.ق ر پرەزيدەنتى ن.ءا.نازاربايەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنداعى لاتىن الىپبيىنە ءوتۋدىڭ ماڭىزدىلىعىن تالقىلاپ، وقۋ-ادىستەمەلىك شارالار مەن جۇمىستاردى باعدارلاۋ.

سەمينارعا ق ر مادەنيەت جانە سپورت مينيسترلىگى  تىلدەردى دامىتۋ جانە قوعامدىق-ساياسي جۇمىس كوميتەتىنىڭ قىزمەتكەرلەرى، ادىسكەر عالىمدار، ءتىل ماماندارى، استانا، الماتى قالالارى جانە وبلىس ورتالىقتارىنداعى مەملەكەتتىك ءتىلدى وقىتۋ ورتالىقتارىنىڭ  ماماندارى قاتىسادى.

سەمينار بارىسىندا ادىسكەر-عالىمدار مەملەكەتتىك ءتىلدى وقىتۋدىڭ ءتيىمدى تەحنولوگيالارى مەن ءادىس تاسىلدەرىمەن بولىسەدى. تىلدەردى وقىتۋ ورتالىقتارى مەن رەسپۋبليكاعا بەلگىلى عالىمدار ءتىلدىڭ وزەكتى ماسەلەلەرى جايىندا بايانداما جاساپ، ادىسكەرلەر ۇزدىك ساباق ۇلگىلەرىن كورسەتەدى.