بايگەنىڭ العاشقى جاۋاپتارى(تولىعىراق: http://qamshy.kz/؟p=16377)
نۇرلان ءسادىر:
جىلداعىداي تويلادى، الايدا بيىل قازاقستان رەسپۋبليكاسى دەگەن اتپەن قاتار «قازاق ەلى» دەگەن جىلىلاۋ ءھام جۇمىرلاۋ ءسوز تىركەسى كوپ قولدانىلدى. «شۇكىر» دەپ قويايىق. بۇكىل قازاقستاندى قايدام، ءبىزدىڭ ورالدا بيىل تاۋەلسىزدىك مەرەكەسىنىڭ ۇستىنەن «قاشان بىتەسىڭ/كەتەسىڭ؟!» دەگەندەي شىرشا ءتونىپ تۇرمادى، شىرشا تاۋەلسىزدىك كۇنىنە دەيىن تىگىلگەن جوق. ول دا بولسا كوڭىلگە دەمەۋ. بيىلعى تاۋەلسىزدىك كۇنى ەۆرازيالىق وداق كۇشىنە ەنەر الدىندا تويلانىپ وتىر، ال بولاشاق وداقتاسىمىز ءقازىر ءوز باسىمەن، دالىرەك ايتساق رۋبلمەن اۋرە. سوندىقتان، «بۇل وداق بىزگە وپا بەرە مە؟!» دەگەن الاڭ تويدىڭ دۋمانىنا الاڭدى دا ارالاستىرىپ قويدى. تاۋەلسىزدىك مەرەكەسى كەزىندە استاناداعى ەكسپو قۇرىلىسشىلارىنىڭ دا نارازىلىعى زارەزاپ بولىپ قالعان جۇرەكتى «زىرك» ەتكىزدى. ءبىراق قۇداي ساقتاپ، پولكوۆنيك قولداپ شيلەنىس شەشىمىن تاپتى. ءوز باسىم، 16 جەلتوقسان كۇنى تاڭەرتەڭ تاۋەلسىزدىك جولىندا كۇرەسكەن اتا بابالارىمىز بەن زامانداستارىمىزدىڭ رۋحىنا قۇران باعىشتاۋدى، بۇكىل مەملەكەتتىك سالتاناتتى شارالاردى سوسىن بارىپ باستاۋدى ۇسىنامىن. بۇل «مىنا كۇن مەيرام ەمەس، ەسكە الۋ كۇنى» دەگەن ءارتۇرلى (جانى جوق ەمەس) اڭگىمەلەردىڭ الدىن الار ما ەدى. ءسويتىپ، تاۋەلسىزدىك كۇنى – ساياسي ۇستانىمىنا قاراماستان بارلىعىمىزدىڭ دەرلىك باسىمىزدى بىرىكتىرەتىن اتاۋلى كۇنگە اينالار ما ەدى. جاراتقان يەمىز ءبىزدى، ەندى، تاۋەلسىزدىگىمىزدەن ايىرا كورمەسىن!
حازىرەت ءابدىلدا:
قازاق تاۋەلسىزدىگىن كەرەمەت تويلادى. شىرشاسىن جاقتى، شامپانىن اتتى. اياز اتا توپتىڭ باسىندا ءجۇردى، اق قار حانىشا كۇلىمدەپ قاسىندا ءجۇردى. شىرشانىڭ باسىندا كرەست تۇردى، ءارتۇرلى شىراق سىرەسىپ تۇردى. سويتسە بۇل «تاۋەلسىزدىك» ەمەس «1 قاڭتاردىڭ» دايىندىعى ەكەن. «اتتەڭ!» دەپ 100 قازاق ەسىن جيىپتى. الاڭعا كەلسە جاقسىلار از، ساقشىلار كوپ ەكەن. بالالاردى ۇرەي بيلەپ، قايتايىق دەپتى، اكەسى «ءانۇراندى» ايتايىق دەپتى. قورقىپ قالعان بالاسى: «9 مامىر بار عوي، اكە!» سول كەزدە «ۇلى وتاننىڭ» مەرەكەسىن تويلايمىز دەپ قويماپتى...
ءسويتىپ، ۇيگە قايتىپتى، «جانازاعا» بارعان كۇيدە قايتىپتى. «نۇرلى جولمەن» كەلە جاتسا، الدىنان شىققان اقساقال: «تەك قانا العا، بالالار! الەمدەگى دامىعان 30 ەلدىڭ قاتارىندامىز، بەرەكە بولسىن، بەرەكە بولسا مەرەكە بولادى» دەپ باتا بەرىپتى.
