قىتايدىڭ ءۇرىمجى قالاسىندا تۇراتىن ونەرتاپقىش قازاق جاستارى بالا تاربيەسىندە تاپتىرماس قۇرالعا اينالار «بالا-بالا» اتتى جاڭا ويىنشىقتى جاساپ شىعاردى. بۇل ويىنشىقتىڭ ەرەكشەلىگى سول – قۇرىلعى تازا قازاقى تىلدە بالاڭىزعا اڭگىمەلەر، ءان مەن كۇي، ەرتەگى ايتىپ بەرمەك. 

دەمەك بالاڭىز بىردەن وزىنە ۇناعان اڭگىمەنى نەمەسە ەرتەگىنى قايتا-قايتا تىڭداۋ ارقىلى ونى جاتتاپ الادى. ءتىپتى ءتىلى جاڭا شىعىپ جاتقان بالالاردىڭ دۇرىس قالىپتاسۋىنا، وي-ورەسىنىڭ تولىق جەتىلۋىنە بۇل ويىنشىقتىڭ تيگىزەر پايداسى وراسان بولماق، – دەيدى جوبا اۆتورلارى.

مەللات سەيفوللا ۇلى، جوبا جەتەكشىسى:

– ءقازىر ءبارىمىز قالالىق بوپ بارامىز، ونى جاسىرۋدىڭ قاجەتى جوق. ءبىزدىڭ بالالارىمىزعا ەرتەگى ايتىپ، اڭگىمە وقىپ بەرۋگە، ءان سالدىرۋعا ۋاقىتىمىز دا جوق، جۇمىسىمىزدىڭ ىڭعايى دا كەلمەيدى. سوندا دا ولاردى ۇلتتىق تامىردان اجىراتىپ الۋعا بولمايدى. ءبىز وسى ماقساتتى كوزدەپ، قازاق بالاسى كۇنى بويىنا تەلەديدارعا ءۇڭىلىپ، ونداعى نەبىر قۋلىق پەن سۇمدىقتى تالعاۋسىز ءوز بويىنا قابىلداي بەرمەسى ءۇشىن بالدىرعانداردىڭ بويىنا ۇلتتىق رۋحاني قورعانىش يممۋنيتەتىن قالىپتاستىرۋدى كوزدەيتىن ويىنشىقتى جاسادىق. ەلگە ۇناپ، كادەگە اسىپ جاتسا، قازاقتىڭ وعلان ۇلدارى وسىنداي تالىمگە تەربەلىپ وسسە ماقساتىمىزعا جەتكەنىمىز. ان-ەرتەكپەن ايتىلاتىن ءتالىمى، ونى تىڭدار بولاشاقتىڭ عالىمى. ءار ءسابيدىڭ قولدارىندا بولسا ەكەن، ادىرنانىڭ «بالا-بالا» دابىلى، – دەمەكشى، ۇلتتىق قۇندىلىقتارىمىزدى ۇلىقتايتىن، بالدىرعاندار ءۇشىن ارنايى ازىرلەنگەن جاڭا تارتۋ «بالا-بالا» دابىلى ۇلت مۇراتىن شىڭدايتىن بولاشاق عالىمداردىڭ اقىل-ويىنىڭ ەرتە جەتىلۋىنە كومەگى زور. اڭگىمە، بالالار ءانى، ەرتەگى قاتارلى مازمۇندارمەن وسكەن ۇرپاق ءارقاشان ۇلت مۇددەسىن وزىنە ۇستىن ەتپەك. انە سولار ناعىز ۇلت جاناشىرى، كەمەڭگەر ويشىلداردان سانالماق. بۇل رەتكى بالدىرعاندارعا ارنايى ازىرلەنگەن دابىل زالاسىز ماتەريالدارمەن قۇراستىرىلىپ، قۇرىلىمى جاعىنان مەملەكەتتىك ولشەمگە سايما-ساي. جاڭا زاماناۋي تەحنولوگيالىق ءونىم ساتىلىمعا شىقتى. "الاش ايناسى"