ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا، وبلىستار جانە استانا، الماتى قالالارى اكىمدەرىنىڭ ورىنباسارلارىمەن، حالىقتى الەۋمەتتىك قامسىزداندىرۋ جانە جۇمىسپەن قامتۋ ماسەلەلەرى جونىندە جيىن وتكىزدى دەپ حابارلايدى Qamshy.kz اقپارات اگەنتتىگى.

       سونىمەن قاتار، القالى باسقوسۋعا، ەڭبەك، الەۋمەتتىك قورعاۋ جانە كوشى-قون كوميتەتى اۋماقتىق دەپارتامەنتتەرىنىڭ ديرەكتورلارى، جەرگىلىكتى اتقارۋ ورگاندارداعى جۇمىسپەن قامتۋدى جانە الەۋمەتتىك باعدارلامالاردى ۇيلەستىرۋ باسقارمالارىنىڭ باسشىلارى، وزگە دە مۇددەلى تاراپتار قاتىستى.     

       كۇنتارتىبىندەگى باستى تاقىرىپ رەتىندە اتاۋلى الەۋمەتتىك كومەكتىڭ (ءارى قاراي – ااك) جاڭا سيپاتىن قولدانىسقا ەنگىزۋ، بازالىق زەينەتاقىنى تاعايىنداۋ ادىستەمەسىن وزگەرتۋ جانە ءوزىن جۇمىسپەن قامتىعان تۇرعىندار توبىمەن جۇمىس جايلارى تالقىلاندى.  

       جاڭا سيپاتتاعى ااك تۇرعىسىندا، مينيستر، جۇمىسپەن قامتۋ ورتالىقتارىن كۇشەيتۋ ارقىلى ولاردىڭ ماتەريالدىق-تەحنيكالىق جابدىقتالۋى مەن ماماندار دايارلاۋ ىسىنە اسا ءمان بەرۋ كەرەك ەكەنىن نۇسقادى.

       «ەگەر قازىرگى تاڭدا ااك تابىسى كۇنكورىس دەڭگەيىنەن 40% تومەن ادامدار مەن وتباسىلارعا قارجىلاي كومەك رەتىندە بەرىلەتىن بولسا، جاڭا جىلدان باستاپ جان باسىنا شاققانداعى تابىسى كۇنكورىس دەڭگەيىنەن 50% تومەن وتباسىلارعا بەرىلەتىن بولادى. سونىمەن بىرگە، جاڭا سيپاتتاعى ااك  - قازىرگى تاڭداعى ااك، بالالار جاردەماقىسى جانە ارنايى مەملەكەتتىك جاردەماقى سەكىلدى 3 الەۋمەتتىك تولەمنىڭ ورنىنا ءبىرىڭعاي جاردەماقى تۇرىندە تولەنەدى. ەڭ باستى ەسكەرەتىن جايت، جاڭا ااك مولشەرى جوعارىدا اتالعان 3 ءتۇرلى جاردەماقىنىڭ جالپى سوماسىنان جوعارى بولادى. وسىلايشا، جاڭا ااك تەك قانا قارجىلاي جاردەماقى عانا ەمەس، كەدەيلىك دەڭگەيىنەن شىعۋدىڭ كەشەندى شاراسى بولماق. جاردەماقىنىڭ قولجەتىمدىلىگى مەن بيزنەس-پروسەستەردى وڭتايلاندىرۋ ماقساتىندا جۇمىستى ءبىر تەرەزە جۇيەسىمەن جۇمىسپەن قامتۋ ورتالىقتارى ارقىلى جۇرگىزۋ ۇسىنىلادى»، - دەدى مينيستر.

       ەڭبەك جانە حالىقتى الەۋمەتتىك قورعاۋ ءمينيسترى جينالعانداردىڭ نازارىن كەلەر جىلدان باستاپ بازالىق زەينەتاقى تاعايىنداۋ تەتىگى وزگەرەتىنە دە اۋداردى.

       2018 جىلدىڭ 1 قاڭتارىنان باستاپ، مەملەكەت باسشىسىنىڭ تاپسىرماسىنا ساي، ىنتىماقتى زەينەتاقى 8 پايىزعا وسەدى. بازالىق زەينەتاقى، باسقا دا جاردەماقى تۇرلەرى سياقتى، 6 پايىزعا كوبەيەدى. وسى ارقىلى، بازالىق زەينەتاقىنى ەسكەرگەندەگى زەينەتاقىنىڭ تومەنگى مولشەرى كەلەسى جىلى 49 019 تەڭگەنى قۇراپ، ورتاشا دارەجەسى 71 333 تەڭگەنى توڭىرەكتەمەك.

       «قازىرگى ۋاقىتتا بازالىق زەينەتاقى زەينەت جاسىنا جەتكەندەرگە بارىنە بىردەي ەڭبەك ءوتىلىن جانە زەينەتاقى جيناعىن قالىپتاستىرۋعا قاتىسۋدى ەسكەرۋسىز تاعايىندالادى. كەلەسى جىلدان بازالىق زەينەتاقى جۇيەگە قاتىسۋ وتىلىنە قاراي بەرىلەتىنى كوزدەلۋدە. وسى ورايدا 1998 جىلدان كەيىنگى جيناقتاۋشى زەينەتاقى جۇيەسىنە زەينەتاقى جارنالارىنىڭ ءتۇسۋ ارالىعى عانا ەسەپتىلىنىپ قويماي، 1998 جىلعا دەيىنگى دە ەڭبەك ءوتىلى نازارعا الىناتىنى بولجانۋدا»، - دەپ ءتۇسىندىردى تامارا دۋيسەنوۆا.     

        مۇنداي ءادىس، 30-40 جىل ەڭبەك ءوتىلى بولسا دا، تومەن زەينەتاقى الىپ وتىرعان ادامدارعا قاتىستى ادىلدىك ورناتاتىنى كۇتىلۋدە. 1998 جىلعا دەيىن جانە ودان كەيىن دە 33 جىلدان اساتىن ءوتىلى بار تۇلعالارعا، بازالىق زەينەتاقى اعىمداعى كولەمىمەن سالىستىرعاندا ەكى ەسەگە كوبەيەدى. ەگەر بۇل سوما ءقازىر 14 مىڭ تەڭگەنى كورسەتسە، 2018 جىلدىڭ 1 شىلدەسىنەن زەينەتكەرلەردىڭ اتالعان توبى ىنتىماقتى جانە جيناقتاۋشى زەينەتاقىعا قوسا، 28 مىڭ تەڭگەنى يەمدەنەتىن بولادى. 

      10 جىلدان اسقان ءار جىل سايىن بازالىق زەينەتاقى 2 پايىزعا وسپەك. ماسەلەن، 20 جىلدىق ەڭبەك وتىلىندە بازالىق زەينەتاقى ەڭ تومەنگى كۇنكورىس دەڭگەيىنىڭ 74%-ىن قۇراسا، 30 جىلدا 94%-دى مەجەلەمەك. زاڭدا ايقىندالعانداي، 33 جىلدى ەڭسەرگەن ءوتىل بەلەسىندە بازالىق زەينەتاقى كۇنكورىس دەڭگەيىنىڭ تولىق 100% كولەمىن قامتىماق.

      ءوزىن جۇمىسپەن قامتىعان تۇرعىندار قىزمەتىن رەتتەۋدە 2018-2019 جىلدارعا ارنالعان جول كارتاسى جاسالۋدا.

       تامارا دۇيسەنوۆا، جوعارىدا كورسەتىلگەن بارلىق مىندەتتەردى قاپەرگە العان رايدا، ۇكىمەتتىڭ الەۋمەتتىك سالادا جۇرگىزىپ وتىرعان ساياساتىن وڭىرلەردە ءتۇسىندىرۋ ءىس-قيمىلدارىن شيراتۋ قاجەتتىگىن اتاپ ءوتتى.  

        ەستەرىڭىزگە سالا كەتەيىك، 2018 جىلدىڭ 1 قاڭتارىنان باستاپ، ەلباسىنىڭ «ۇلت جوسپارى – 100 ناقتى قادام» يدەياسى مەن  حالىققا جولداۋىنان تۋىندايتىن تاپسىرمالاردى جۇزەگە اسىرۋ ماقساتىندا الەۋمەتتىك-ەڭبەك سالاسىن جاڭعىرتۋعا باعىتتالعان كەشەندى شارالار جۇزەگە اسادى.