تۇنشىقتىرىپ تىرلىگىمدى تىنىمسىز، 
تاس توبەمنەن ءتوندى تاعى ءتۇن ءۇنسىز. 
ماعان قاراپ مۇڭايادى مىڭ جۇلدىز، 
جەتىمسىرەپ مەنىڭ ءمولدىر مۇڭىمسىز. 

مەنىڭ مۇڭىم، مەنىڭ مۇڭىم – ءمولدىر مۇڭ، 
(مۇڭسىز ءومىر سۇرە المايمىن مەن ءبىر كۇن). 
تۇنگى اسپاننان تۇنىق ىزدەپ كوز الماي، 
قاراپ جاتىپ قانشا جۇلدىز ءسوندىردىم. 

بۇگىن تاعى قۇربان بولىپ بار ءۇمىت، 
سانادان تىس قۇدىرەتكە باعىنىپ. 
مىڭ جۇلدىزدىڭ اراسىنان ءبىر جۇلدىز، 
اعىپ ءتۇستى. جالعىزدىقتان جالىعىپ. 

ولار، ءسىرا، عاشىق مەنىڭ مۇڭىما، 
مەن دە ولاردىڭ قۇمار ەدىم سىرىنا. 
مۇڭسىز – ءمىنسىز عۇمىر كەشۋ، قۇداي-اۋ، 
قاسىرەت قوي جەردىڭ اقىن ۇلىنا. 

ءاپپاق ايدىڭ ءبىر ساۋلەسى تيسە ارتىق، 
كەتەر، شىركىن، كوڭىلىمدە كۇي شالقىپ. 
وزگەشە ءبىر ولەڭ جازىپ وتىرام، 
مىڭ جۇلدىزدان مۇڭدارىمنىڭ ءيىسى اڭقىپ. 

مەنىڭ مۇڭىم ساۋلە توگىپ كۇنگە ۇقساپ، 
مۇڭلى شاققا سىيلايدى ءبىر نۇرلى ءسات. 
تۇنگى ىزعاردان توڭىپ تۇرعان تومسارىپ، 
جۇلدىزداردان گۇل جاسايدى ءبىر قۇشاق. 

اسپانىمدا – تۇنىپ تۇرعان كۇمىس شىق، 
اسپان استى – سىر ۇقتىرعان تىنىشتىق.
...ءوزىم ءسۇيىپ، ءوزىم كۇيىپ جاتاتىن، 
مەنىڭ مۇڭىم ىپ-ىستىق.

قالقامان سارين