مەملەكەت باسشىسىنىڭ اقش-قا ساپارى بارىسىندا قانداي ماسەلەلەر تالقىلانۋى مۇمكىن جانە قانداي تىڭ باستامالار جاريالانۋى مۇمكىن ەكەنىن قازاقستاننىڭ ينتەرنەت قاۋىمداستىعىنىڭ پرەزيدەنتى شاۆكات سابيروۆ ايتتى، دەپ جازادى Qamshy.kz اقپارات اگەنتتىگى.

قازاقپاراتتىڭ مالىمەتىنە سۇيەنسەك، سابيروۆ ەلباسىنىڭ اقش-قا ساپارى بارىسىندا تالقىلانۋى مۇمكىن نەگىزگى ەكى تاقىرىپتى اتادى.

«جالپى، وسى ساپاردان ەكى تاقىرىپتى ءبولىپ الۋعا بولادى. ءبىرىنشى بولىگى مەملەكەت باسشىسىنىڭ ەكىجاقتى كەزدەسۋلەرىن قامتيدى، ونىڭ ىشىندە اقش پرەزيدەنتى دونالد ترامپپەن كەلىسسوزدەر ەسكەرىلىپ وتىر. وسى ورايدا قازاقستان مەن اقش اراسىنداعى قاتىناستارعا بايلانىستى بولادى. ەكىنشى بولىگى ءبىزدىڭ پرەزيدەنتتىڭ بۇۇ قاۋىپسىزدىك كەڭەسى وتىرىسىنا قاتىسۋىن قامتۋدا. بۇل ماڭىزدى شاراعا الەم ەلدەرىنەن لاۋازىم يەلەرى كەلەدى دەپ كۇتىلۋدە.  ەكىجاقتى قاتىناستارعا توقتالساق، بۇل رەتتە قازاقستان ورتالىق ازيادا كوشباسشى رولدە ەكەنىن انىق. سونىمەن قاتار اۋعانستان ماسەلەسىن شەشۋدە دە ەلىمىز ماڭىزدى ىستەرگە باستاماشى بولىپ وتىر. سوڭعى 10-15 جىلدا اۋعان ماسەلەسى بارشا الەمدىك قوعامداستىقتى الاڭداتىپ وتىرعانى بەلگىلى. سوندىقتان بۇل تاقىرىپتاعى وڭتايلى شەشىمدەردە قازاقستاننىڭ بەلسەندىگى ارتۋى ىقتيمال. ويتكەنى قازاقستاننىڭ بىتىمگەرلىك باستامالارى الەمگە بۇرىننان بەلگىلى، سونداي-اق بۇل باعىتتا جاقسى ناتيجەلەر بارشىلىق. اقش-تىڭ الدىڭعى قاتارلى باق-تارىندا جاريالانعان ماقالالارعا سۇيەنسەك، قازاقستان مەن وزبەكستان اۋعانستان پروبلەمالارىن شەشۋدە ەلەۋلى ءرول اتقارۋى مۇمكىن»، - دەدى ش. سابيروۆ.

ونىڭ سوزىنە قاراعاندا، بۇۇ قاۋىپسىزدىك كەڭەسىندە مەملەكەت باسشىسىنىڭ سويلەگەن سوزىندە قاۋىپسىزدىككە قاتىستى ەلىمىزدىڭ بىتىمگەرلىك باستامالارى جاريالانۋى مۇمكىن. سونىمەن قاتار يادرولىق قارۋسىزدانۋ پروبلەمالارى دا بار. سەبەبى وعان سولتۇستىك كورەياداعى جاعداي قوسىلىپ وتىر.

ايتا كەتەيىك، مەملەكەت باسشىسىنىڭ اقش-قا رەسمي ساپارى 16 قاڭتاردا باستالادى. ساپار اياسىندا اقش پرەزيدەنتى دونالد ترامپپەن، سونىمەن قاتار رەسمي ءارى ىسكەر توپتاردىڭ وكىلدەرىمەن كەزدەسۋ جوسپارلانعان. ن. نازاربايەۆ بۇۇ ءقاۋىپسىزدىڭ كەڭەسى وتىرىسىنا قاتىسادى دەپ كۇتىلۋدە.