2017 جىلى كومەديا جانرىنىڭ وزىنەن ونداعان كينو كورەرمەنگە جول تارتتى.  سونىڭ ىشىندەگى ەڭ قاتتى تالقىلانعانى مىنالار بولدى:

 «اعا ما، الدە نەكە مە» (برات يلي براك). ەرنار نۇرعالييەۆتىڭ رەجيسسەرلىك ەتۋىمەن تۇسىرىلگەن فيلم كورەرمەن اراسىندا قولداۋ تاپتى. كومەديا جانرىنداعى بۇل تۋىندىدا گاۋحار ەسىمدى قىز ءوزىنىڭ سۇيىكتىسىن بەس بىردەي اعاسىمەن تانىستىرماقشى. سيۋجەت بويىنشا ەكى عاشىق بەس ءتۇرلى ەر ادامنىڭ قارسىلىعى مەن قىرسىق مىنەزىنە قاراماستان قوسىلادى. كينوسۇيەر قاۋىمنىڭ ايتۋىنشا، اتالمىش تۋىندى «ءبىر رەت كورۋگە جارايدى». جەڭىل كومەديانىڭ كەمشىلىگى دە از ەمەس. بىرىنشىدەن، فيلم ناقتى ءبىر تىلدە تۇسىرىلمەگەن. ياعني ديالوگتىڭ بارلىعى «شالا قازاقشا» جۇرەدى. ەكىنشىدەن، سەناريي گولليۆۋد فيلمدەرىنىڭ نەگىزىندە جازىلعان سياقتى. ءبىزدىڭ مەنتاليتەتىمىزگە جات. ماسەلەن، 50 جاستاعى ەر ادام كلۋبتان-كلۋبقا قىدىرىپ جۇرەتىن، باسىنا پاريك كيگەن، اقىل-ەسى توقتاماعان ادام رەتىندە كورسەتىلەدى. ال مارسەلدىڭ (باستى رولدەگى قىزدىڭ بۇرىنعى جىگىتى) اناسى – وزىنەن جاس ايەل، نەگە ەكەنى بەلگىسىز، ەكەۋى موتوسيكلمەن سەرۋەندەپ جۇرەدى. فيلمدەگى قالجىڭدار دا تۇسىنىكسىز.

«قازاقشا بيزنەس 1،2» (بيزنەس پو-كازاحسكيي 1،2)

رەجيسسەرى جەڭىسحان مومىشيەۆ. كينونىڭ ءبىرىنشى بولىمىندە جومارت ەسىمدى جىگىتتىڭ تۋىسقاندارىمەن بىرلەسىپ كاسىپ باستاۋى سۋرەتتەلەدى. قازاقستاندا «قازاقشا بيزنەس» جاساۋدىڭ تاسىلدەرى مەن بيزنەسكە تۋىسقانداردىڭ ارالاسۋى نەگە اكەپ سوعاتىنى باياندالادى. ەكىنشى بولىمدە اقش-قا ساياحاتتاعان قازاقتاردىڭ شەتەلدە جۇرسە دە، ءوز ءداستۇرىن ۇمىتپايتىنى كورسەتىلەدى. فيلم 2017 جىلداعى وتاندىق كينولاردىڭ ىشىندە ەڭ كوپ  كاسسالىق جيناق – 299 683 300 تەڭگە جيناعان.

ناشار فيلمدەر

سوڭعى جىلدارى وتاندىق كينو قورجىنى كومەديا، دراما جانرىنداعى فيلمدەرمەن  تولىعىپ كەلەدى. كورەرمەننىڭ ءوز قىزىعۋشىلىعىنا ساي فيلم كورىپ، ءوز ەركىمەن تاڭداۋ جاساۋعا مۇمكىندىك تۋدى.

قازاقستاندىق كينوسىنشى كارىم قادىربايەۆتىڭ ايتۋىنشا، بىلتىر پروكاتقا شىققان قازاقستاندىق فيلمدەردىڭ كوپشىلىگى «ناشار فيلمدەر» (زولوتايا مالينا) قاتارىنا ەنۋى مۇمكىن.

«ماجورلار»، «سوقىر ماحاببات»، «مۇراعا قالعان ماحاببات»، «ءبىز ساندىقتاۋدانبىز» فيلمدەرىن قاراپ شىقتىم، شىن مانىندە بۇل فيلمدەردە اكتەرلەردىڭ وينىنان باستاپ رەجيسسيۋرا مەن سەنراييگە دەيىن پروبلەما وتە كوپ، - دەيدى ول.

2017 جىلى ەرەكشە بەلسەندى بولعان رەجيسسەرلەردىڭ توپ-3-تىگى

اقان ساتايەۆ

تانىمال قازاق كينورەجيسسەرى، پروديۋسەر اقان ساتايەۆتىڭ سوڭعى ەكى جىلدا تۇسىرگەن تۋىندىلارى كورەرمەننىڭ ىستىق ىقىلاسىنا بولەندى.  كەيىنگى جىلدارى ونىڭ  «رەكەتير 2»، «حاكەر»، «بلوگەر»، «اناعا اپارار جول»، «رايونى»، «كاسىپكەرلەر»، «ول»، «كوشباسشى جولى» فيلمدەرى جارىققا شىقتى. رەجيسسەردىڭ «اناعا اپارار جول» اتتى كينوسى «وسكار» سىيلىعىنا ۇسىنىلدى، «رايونى» ءفيلمى «تۇلپار» ۇلتتىق كينو سىيلىعىن الدى.

رۇستەم ابدىراشيەۆ

رەجيسسەر، سەناريست رۇستەم ابدىراشيەۆ بىلتىر «قازاق حاندىعى» تەلەحيكاياسىنا رەجيسسەرلىك ەتتى.

قازاق حاندىعىنا 550 جىل تولۋىنا بايلانىستى تۇسىرىلگەن «قازاق حاندىعى» تۋىندىسى 2017 جىلى 5 قاڭتاردا جالپىۇلتتىق پروكاتقا شىقتى. وسى اتتاس تولىقمەترلى كوركەم فيلم قازاقستاندىق پروكاتتا 72 ميلليون تەڭگەدەن استام قارجى جينادى. رەجيسسەردىڭ وتاندىق، حالىقارالىق ماراپاتى وتە كوپ.

اسقار ۇزاقبايەۆ

قازاقستاندىق تانىمال رەجيسسەر بىلتىر «91»، «گلامۋر دليا دۋر»، «قازاققا عاشىق بولماۋعا 5 سەبەپ»، «كەلىن دە ادام» فيلمدەرىن ءتۇسىردى. ونىڭ بۇل كينوكارتينالارى قوعامدا قىزۋ تالقىعا سالىندى.

وتاندىق كينوداعى جاڭا «كەلبەت»

قازاقستاندىق كينو سالاسىنداعى جاڭا ەسىمدەر قاتارىنا راشيد سۇلەيمەنوۆتىڭ رەجيسسەرلىك ەتۋىمەن تۇسىرىلگەن «پەرىشتەلەر ۇيىقتاپ جاتقاندا» فيلمىندەگى باستى ءرولدى سومداعان جۇلدىز ابدىكارىموۆانى جاتقىزۋعا بولادى. بۇعان دەيىن ەشبىر جەردە بوي كورسەتپەگەن جۇلدىز ابدىكارىموۆاعا وسى تۋىندىدان كەيىن  ونىڭ اكتەرلىك شەبەرلىگى تۋرالى ءبىراز سىن دا، ماقتاۋلار دا ايتىلدى.

سونىمەن بىرگە  "قازاق ارۋى" حيكاياسىندا باستى رولدەردىڭ ءبىرىن سومداعان گۇلزادا تۇرلاش جانە «الاۋ» توبىنىڭ ءانشىسى ەرجان مۇقاتايەۆتىڭ «قوزى كورپەش بايان سۇلۋ» كوپسەريالى حيكاياسىنداعى ويىندارى تالاي اڭگىمەگە ارقاۋ بولدى. دارحان ساركەنوۆتىڭ رەجيسسەرلىگىمەن جارىققا شىققان تۋىندىنىڭ جەلى قولدانۋشىلارىنىڭ قاتاڭ سىنىنا ۇشىرادى.

رەجيسسەر ساتىبالدى نارىمبەتوۆ «وتاندىق رەجيسسەرلەر پاتريوت ەمەس، ولار ءوز قالتالارىن ويلايدى» دەيدى. بۇل دا شىندىققا جاناسادى.

قازاق كينولارىنىڭ كوپشىلىگىنە ءتان كەمشىلىك – كارتينادا كاسىبي اكتەرلەردىڭ ويناماۋى، رەيتينگ ءۇشىن تانىمال جۇلدىزدار مەن انشىلەردىڭ باستى رولدەردى سومداۋى. كاسىبيلىك بولماعان سوڭ اكتەر ويىنىن شىنايى  قابىلداۋ وتە قيىن. سەنارييدەگى سوزدەر جاتتاندى، ورفوگرافيالىق زاڭدىلىقتار بويىنشا ايتىلادى، جارگون، ديالەكت سوزدەر قولدانىلادى. بۇل ءفيلمنىڭ سيقىن كەتىرەدى.

وتاندىق كينو سالاسىنداعى تاعى ءبىر  ۇلكەن كەمشىلىك – فيلمدەردىڭ قازاقشا دىبىستالماۋى. قازاق اۋديتورياسى وتاندىق تۋىندىلاردى «شالا قازاقشا» تىلدە كورۋگە ءماجبۇر.

ارينە، قازاقستاندىق ونىمدەردى قولداۋ كەرەك، ناسيحاتتاۋ كەرەك، ءبىراق ول ءۇشىن ءونىم دە ساپالى بولۋى كەرەك دەپ ەسەپتەيمىز. شۇبار تىلدە، باتىستىڭ ستيلىندە تۇسىرىلگەن، قازاقتىڭ ءيىسى سەزىلمەيتىن، اكتەرلەرى جاتتاندى سويلەيتىن ءفيلمدى كورەرمەنگە ۇسىنۋدىڭ ءوزى قىلمىس سياقتى.